ಅಕ್ಕಿಆಲೂರು : ಕೋಮು ಘರ್ಷಣೆಗೆ ಯುವಕನ ಬಲಿ, 7ಮಂದಿಗೆ ಗಾಯ

ಹಾನಗಲ್‌ : ತಾಲ್ಲೂಕಿನ ಅಕ್ಕಿ ಆಲೂರು ಗ್ರಾಮದಲ್ಲಿ ಬುಧವಾರ ಎರಡು ಕೋಮುಗಳ ನಡುವೆ ನಡೆದ ಘರ್ಷಣೆಯಲ್ಲಿ ಒಬ್ಬ ಯುವಕ ಮೃತ ಪಟ್ಟಿದ್ದು, ಸಬ್‌ ಇನ್‌ಸ್ಪೆಕ್ಟರ್‌ ಮತ್ತು ಹೆಡ್‌ ಕಾನ್‌ಸ್ಟೇಬಲ್‌ ಸೇರಿದಂತೆ ಕನಿಷ್ಠ ಏಳು ಮಂದಿ ಗಾಯಗೊಂಡಿದ್ದಾರೆ.

ಎರಡು ಕೋಮುಗಳಿಗೆ ಸೇರಿದ ಸ್ಮಶಾನಗಳು ಅಕ್ಕ ಪಕ್ಕದಲ್ಲಿದ್ದು , ಬುಧವಾರದಂದು 65 ವರ್ಷದ ವೃದ್ಧೆಯಾಬ್ಬರು ಅಸುನೀಗಿದಾಗ ತಮ್ಮ ಸ್ಮಶಾನದ ಮೂಲಕ ಶವ ಒಯ್ಯಬಾರದು ಎಂದು ಇನ್ನೊಂದು ಕೋಮಿನವರು ತಗಾದೆ ತೆಗೆದು ಶವ ಯಾತ್ರೆಯ ಮೇಲೆ ಕಲ್ಲು ತೂರಿದಾಗ ಗಲಾಟೆ ಆರಂಭವಾಯಿತು.

ಕಲ್ಲು ತೂರಾಟದಲ್ಲಿ ಗಂಭೀರವಾಗಿ ಗಾಯಗೊಂಡಿದ್ದ ಬಸವರಾಜ ಬೆಲ್ಲದ(35) ಅವರನ್ನು ಹಾವೇರಿ ಆಸ್ಪತ್ರೆಗೆ ಸೇರಿಸಲು ಕರೆದೊಯ್ಯುತ್ತಿದ್ದಾಗ ಮಾರ್ಗ ಮಧ್ಯದಲ್ಲಿ ಮೃತ ಪಟ್ಟರು. ಶವ ಯಾತ್ರೆಯ ಸಂದರ್ಭದಲ್ಲಿ ಗಲಭೆಯಾಗಬಹುದು ಎಂಬ ಮುನ್ನೆಚ್ಚರಿಕೆಯಿಂದ ಗ್ರಾಮಕ್ಕೆ ಬಂದಿದ್ದ ಸಬ್‌ ಇನ್‌ಸ್ಪೆಕ್ಟರ್‌ ಅರವಿಂದ ಕಲಗಜ್ಜೆ ಮತ್ತು ಹೆಡ್‌ ಕಾನ್‌ಸ್ಟೇಬಲ್‌ ಒಬ್ಬರಿಗೆ ಕಲ್ಲು ತೂರಾಟದಲ್ಲಿ ಗಾಯವಾಗಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಗ್ರಾಮದಲ್ಲಿ 144ನೇ ಸೆಕ್ಷನ್‌ ಅನ್ವಯ ನಿಷೇಧಾಜ್ಞೆ ವಿಧಿಸಲಾಗಿದೆ. ಪರಿಸ್ಥಿತಿ ಹತೋಟಿಯಲ್ಲಿದೆ.

(ಇನ್ಫೋ ವಾರ್ತೆ)