ದಸರಾ ವಸ್ತು ಪ್ರದರ್ಶನ ಜ.7ರವರೆಗೆ ಮುಂದುವರಿಕೆ

ಮೈಸೂರು : ವಿಶ್ವ ವಿಖ್ಯಾತ ದಸರಾ ಜಂಬೂಸವಾರಿಯಷ್ಟೇ ಪ್ರಸಿದ್ಧವಾದದ್ದು ದಸರಾ ವಸ್ತು ಪ್ರದರ್ಶನ. ಹತ್ತು ದಿನಗಳ ದಸರೆಯ ಉತ್ಸವ ಮುಗಿದರೂ ತಿಂಗಳುಗಟ್ಟಲೆ ಜನಾಕರ್ಷಣೆಯ ಕೇಂದ್ರವಾಗಿ ವಿಜೃಂಭಿಸುವ ದಸರಾ ವಸ್ತುಪ್ರದರ್ಶನ ಈ ಬಾರಿ ವಿಳಂಬವಾಗಿ ಆರಂಭಗೊಂಡಿತು.

ಈ ಹಿನ್ನೆಲೆಯಲ್ಲಿ ಪ್ರದರ್ಶನವನ್ನು ಜನವರಿ 7ನೇ ತಾರೀಖಿನವರೆಗೂ ಮುಂದುವರಿಸಲು ರಾಜ್ಯ ವಸ್ತು ಪ್ರದರ್ಶನ ಪ್ರಾಧಿಕಾರ ತೀರ್ಮಾನ ಕೈಗೊಂಡಿದೆ. ಈ ವಿಷಯವನ್ನು ಪ್ರಾಧಿಕಾರದ ಅಧ್ಯಕ್ಷ ಎಸ್‌. ಪುಟ್ಟಸ್ವಾಮಿ ಅವರು ಇಲ್ಲಿ ತಿಳಿಸಿದ್ದಾರೆ.

ರಾಜ್‌ಕುಮಾರ್‌ ಅವರ ಅಪಹರಣ ಹಿನ್ನೆಲೆಯಲ್ಲಿ ವಸ್ತು ಪ್ರದರ್ಶನದ ಆರಂಭದಲ್ಲಿ ವಿಳಂಬವಾಗಿದ್ದರೆ, ಮೈಸೂರಿನಲ್ಲಿ ಸತತವಾಗಿ ಸುರಿದ ಮಳೆಯಿಂದ ವಸ್ತು ಪ್ರದರ್ಶನದ ಲಾಭ ಸಾರ್ವಜನಿಕರಿಗೆ ಸೂಕ್ತರೀತಿಯಲ್ಲಿ ದೊರಕಲಿಲ್ಲ. ಮಿಗಿಲಾಗಿ ಪ್ರೇಕ್ಷಕರ ಸಂಖ್ಯೆ ಗಣನೀಯವಾಗಿ ಇಳಿದ ಕಾರಣ, ಮಳಿಗೆಗಳ ವ್ಯಾಪಾರಿಗಳು ಹಾಗೂ ಗುತ್ತಿಗೆದಾರರು ವಸ್ತು ಪ್ರದರ್ಶನವನ್ನು ಮುಂದುವರಿಸಲೇ ಬೇಕು ಎಂದು ಮನವಿ ಮಾಡಿದ್ದರು.

ಮಳಿಗೆದಾರರ ಮನವಿಯನ್ನು ಪುರಸ್ಕರಿಸಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಅವರು ತಿಳಿಸಿದ್ದಾರೆ. ಪ್ರದರ್ಶನದ ಉತ್ತಮ ಮಳಿಗೆಗೆ ಬಹುಮಾನ ನೀಡಿ ಮಾತನಾಡುತ್ತಿದ್ದ ಅವರು, ರಂಜಾನ್‌ ಹಾಗೂ ಕ್ರಿಸ್‌ಮಸ್‌ ಹಬ್ಬಗಳೂ ಇರುವ ಹಿನ್ನೆಲೆಯಲ್ಲಿ ಪ್ರದರ್ಶನ ಮುಂದುವರಿಸಲಾಗಿದೆ ಎಂದೂ ತಿಳಿಸಿದರು.

ಮುಖಪುಟ / ಊರು ಕೇರಿ