‘ಯುಎನ್‌ ಶಾಂತಿ ಪಾಲನಾ ಪ್ರಮಾಣ ಪತ್ರ’ಕ್ಕೆ 3.5 ಕೋಟಿ ಭಾರತೀಯರ ಸಹಿ

*ದೀಪ್ಷಿಕ ಘೋಷ್‌ನವದೆಹಲಿ : ದಗಾಬಾಜಿ, ಕೊಲೆ- ಸುಲಿಗೆಗಳು ನಮ್ಮ ದೇಶದಲ್ಲಿ ನಿಲ್ಲುತ್ತದೋ ಇಲ್ಲವೋ. ಆದರೆ ಸಂಯುಕ್ತ ರಾಷ್ಟ್ರಗಳು (ಯುಎನ್‌) ಸಿದ್ಧಪಡಿಸಿರುವ ಮ್ಯಾನಿಫೆಸ್ಟೋ 2000 ಎಂಬ ಶಾಂತಿ ಪಾಲನಾ ಪ್ರಮಾಣ ಪತ್ರಕ್ಕೆ ಮೂರೂವರೆ ಕೋಟಿಗೂ ಹೆಚ್ಚು ಭಾರತೀಯರು ಸಹಿ ಹಾಕಿದ್ದಾರೆ.

ಈ ಭಾರತೀಯರ ಪೈಕಿ ಏಡ್ಸ್‌ ಜಾಗೃತಿ ಕಾರ್ಯಕ್ರಮಗಳಲ್ಲಿ ತೊಡಗಿಸಿಕೊಂಡಿರುವ ಚಳವಳಿಗಾರ್ತಿ ಮತ್ತು ಹಿಂದಿ ಚಿತ್ರನಟಿ ಶಬಾನ ಆಜ್ಮಿ ಕೂಡ ಒಬ್ಬರು. ನೊಬೆಲ್‌ ಪ್ರಶಸ್ತಿ ವಿಜೇತರೆಲ್ಲಾ ಸೇರಿ ಸಿದ್ಧಪಡಿಸಿರುವ ಈ ಪ್ರಮಾಣ ಪತ್ರದಲ್ಲಿ ಹಿಂಸೆಯ ನಿರ್ಮೂಲನೆ, ಜೀವನ ಪ್ರೀತಿ, ಕರುಣೆ ಇವುಗಳಿಗೆ ಬದ್ಧರಾಗಿರುತ್ತೇವೆ ಎಂದು ಬರೆಯಲಾಗಿದೆ. ವಿಶ್ವಾದ್ಯಂತ 100 ಕೋಟಿ ಜನರ ಸಹಿ ಪಡೆಯುವುದು ಸಂಯುಕ್ತ ರಾಷ್ಟ್ರಗಳ ಗುರಿ.

ಭಾರತದಲ್ಲಿ ಬ್ರಹ್ಮಕುಮಾರಿಯರು ಈ ಸಹಿ ಪಡೆಯುವ ಕೆಲಸವನ್ನು ನಡೆಸಿದ್ದಾರೆ. ನಮ್ಮ ಗುರಿ 4 ಕೋಟಿ ಜನರ ಸಹಿ ಪಡೆಯುವುದಾಗಿತ್ತು. ಈಗಾಗಲೇ ನಮ್ಮ ಗುರಿಯ ಶೇ. 90ರಷ್ಟು ಜನರ ಸಹಿ ಪಡೆದಿದ್ದೇವೆ ಎನ್ನುತ್ತಾರೆ ಬ್ರಹ್ಮಕುಮಾರಿ ಆಶಾ.

ಗೃಹ ಸಚಿವ ಎಲ್‌.ಕೆ.ಅಡ್ವಾಣಿ, ವಿತ್ತ ಸಚಿವ ಯಶವಂತ ಸಿನ್ಹ, ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ, ಪ್ರಸಿದ್ಧ ನ್ಯೂಕ್ಲಿಯಾರ್‌ ವಿಜ್ಞಾನಿ ಎ.ಪಿ.ಜೆ. ಅಬ್ದುಲ್‌ ಕಲಮ್‌, ಮಾಜಿ ರಾಷ್ಟ್ರಪತಿ ಆರ್‌.ವೆಂಕಟರಾಮನ್‌ ಹಾಗೂ ಆಂಧ್ರಪ್ರದೇಶದ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಶಾಂತಿ ಪ್ರಮಾಣ ಪತ್ರಕ್ಕೆ ಸಹಿ ಹಾಕಿರುವ ಪ್ರಮುಖ ಭಾರತೀಯರು.

ಹೆಚ್ಚು ಹಿಂಸಾ ಪ್ರಕರಣಗಳು ವರದಿಯಾಗುತ್ತಿರುವ ಗುಜರಾತ್‌ನ ಜನರೇ ಹೆಚ್ಚಾಗಿ ಸಹಿ ಮಾಡಿದ್ದಾರೆ. ಉಳಿದಂತೆ ಮಹಾರಾಷ್ಟ್ರ, ಕರ್ನಾಟಕದ ಜನ ಅಧಿಕ ಸಂಖ್ಯೆಯಲ್ಲಿ ಪ್ರಮಾಣ ಪತ್ರಕ್ಕೆ ಸಹಿ ಹಾಕಿದ್ದಾರೆ. ಸಹಿ ಸಂಗ್ರಹಿಸಲು ಬ್ರಹ್ಮಕುಮಾರಿಯರು ಹೊಟೇಲು, ಕಚೇರಿ, ಕ್ಲಬ್ಬು, ಜೈಲು ಎಲ್ಲೆಡೆಯೂ ಸುತ್ತಿದ್ದಾರೆ.

ನಮ್ಮ ದೇಶದ ಜನಸಂಖ್ಯೆ 100 ಕೋಟಿಯಾದರೆ, ಶಾಂತಿ ಕಾಪಾಡುತ್ತೇನೆ ಎಂದು ಸಹಿ ಹಾಕಿರುವವರು ಕೇವಲ 4 ಕೋಟಿ. ಶಾಂತಿ ಕಾಪಾಡಬೇಕಾದುದು ಪ್ರತಿಯಾಬ್ಬರ ನೈತಿಕ ಕರ್ತವ್ಯ. ಇದಕ್ಕೂ ಭಾಷೆ ತೆಗೆದುಕೊಳ್ಳುವ ಈ ಪರಿ ಹಿಂಸೆ ಎಂಥ ತಾರಕ ಮುಟ್ಟಿದೆ ಎಂಬುದಕ್ಕೆ ಹಿಡಿದ ಕನ್ನಡಿ.

(ಐಎಎನ್‌ಎಸ್‌)