ರಸ್ತೆ ಕಾಮಗಾರಿ ವೀಕ್ಷಣೆಗೆ ಇಬ್ಬರು ತಜ್ಞರ ಸಮಿತಿ ರಚನೆ ಪ್ರಸ್ತಾವ

ಬೆಂಗಳೂರು : ರಸ್ತೆ ಕಾಮಗಾರಿಗಳನ್ನು ಸ್ವತಂತ್ರವಾಗಿ ನಿರ್ವಹಿಸಲು ಅನುಕೂಲವಾಗುವಂತೆ ಇಬ್ಬರು ತಜ್ಞರ ಸಮಿತಿಯನ್ನು ನೇಮಿಸಲು ಯೋಚಿಸಲಾಗುತ್ತಿದೆ ಎಂದು ಲೋಕೋಪಯೋಗಿ ಸಚಿವ ಧರ್ಮಸಿಂಗ್‌ ಮಂಗಳವಾರ ಹೇಳಿದ್ದಾರೆ.

ಸಮಿತಿಯು ರಾಜ್ಯಾದ್ಯಂತ ಪ್ರವಾಸ ಮಾಡಿ ರಸ್ತೆ ಕಾಮಗಾರಿಗಳನ್ನು ವೀಕ್ಷಿಸಲಿದ್ದು, ಅಧ್ಯಯನ ವರದಿಗಳನ್ನು ಸಲ್ಲಿಸಲಿದೆ. ರಸ್ತೆ ಕಾಮಗಾರಿಗಳ ಗುಣಮಟ್ಟ ಪರಿಶೀಲನೆಗೆ ಸ್ಥಳೀಯ ಜನರ ಸಮಿತಿಯಾಂದನ್ನು ರಚಿಸಬೇಕೆಂಬ ಪ್ರಸ್ತಾವನೆ ಇದ್ದು, ಕಳಪೆ ಕಾಮಗಾರಿ ನಡೆಸುವವರನ್ನು ಶಿಕ್ಷಿಸಲು ಸರಕಾರ ಬದ್ದವಾಗಿದೆ ಎಂದು ಧರ್ಮಸಿಂಗ್‌ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ದುರಸ್ತಿಗೆ 145 ಕೋಟಿ ರುಪಾಯಿ : ಇತ್ತೀಚಿನ ಮಳೆಯಿಂದ ರಸ್ತೆಗಳು ತೀರಾ ಹದಗೆಟ್ಟಿವೆ ಎಂಬುದನ್ನು ಒಪ್ಪಿಕೊಂಡ ಧರ್ಮಸಿಂಗ್‌, ದುರಸ್ತಿ ಕೈಗೊಳ್ಳುವವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದ್ದು, ದುರಸ್ತಿಗೆ 145 ಕೋಟಿ ರುಪಾಯಿಗಳು ಬೇಕಾಗಿದೆ. ಪರಿಹಾರ ನಿಧಿಯಿಂದ ಕೇವಲ 57 ಕೋಟಿ ರುಪಾಯಿ ಬಂದಿದೆ ಎಂದು ಹೇಳಿದ್ದಾರೆ.

ರಾಜ್ಯದ 2043 ಕಿಲೋಮೀಟರ್‌ ಉದ್ದದ ರಸ್ತೆ ಕಾಮಗಾರಿ ಕೈಗೊಳ್ಳಲು ಹಣಕಾಸು ನೆರವು ನೀಡಲು ವಿಶ್ವಬ್ಯಾಂಕ್‌ ಒಪ್ಪಿಕೊಂಡಿದೆ. 191 ಕಿಲೋಮೀಟರ್‌ ಉದ್ದದ ಬೀದರ್‌-ಹಟ್ಟಿಗೂಡು ರಸ್ತೆಯನ್ನು 250 ಕೋಟಿ ರುಪಾಯಿ ವೆಚ್ಚದಲ್ಲಿ ನಿರ್ಮಿಸಲಾಗುತ್ತದೆ . ಇದಕ್ಕಾಗಿ ಜಾಗತಿಕ ಮಟ್ಟದ ಟೆಂಡರ್‌ ಕರೆಯಲಾಗುವುದು. 196 ಕಿಲೋಮೀಟರ್‌ ಉದ್ದದ ಶ್ರೀರಂಗಪಟ್ಟಣ - ಕಿಬ್ಬವನಹಳ್ಳಿ - ಹಳಿಯಾಳ - ಹಿರಿಯೂರು ರಸ್ತೆ ಕಾಮಗಾರಿಯನ್ನು ಶೀಘ್ರವಾಗಿ ಕೈಗೆತ್ತಿಕೊಳ್ಳಲಾಗುವುದೆಂದು ಸಚಿವರು ತಿಳಿಸಿದ್ದಾರೆ.

ವಿವಾದಿತ ಬೆಂಗಳೂರು - ಮೈಸೂರು ಕಾರಿಡಾರ್‌ ಯೋಜನೆಗೆ ಕೇಂದ್ರ ಪರಿಸರ ಇಲಾಖೆ ಅನುಮತಿ ನೀಡಿದ ತಕ್ಷಣ ಕಾಮಗಾರಿಯನ್ನು ಶೀಘ್ರವಾಗಿ ಆರಂಭಿಸಲಾಗುವುದುೆಂದು ಅವರು ಹೇಳಿದ್ದಾರೆ.

(ಯುಎನ್‌ಐ)