ಬೆಂಗಳೂರಿನ ಹೊಸ ಮೇಯರ್ರಾಗಿ ಕಾಂಗ್ರೆಸ್ಸಿನ ಪ್ರೇಮಾ ಕಾರ್ಯಪ್ಪ
ಬೆಂಗಳೂರು : ಕಾಂಗ್ರೆಸ್ಸಿನ ಪ್ರೇಮಾ ಕಾರ್ಯಪ್ಪ ಅವರು ಮಹಾನಗರ ಪಾಲಿಕೆಯ ಮೇಯರ್ ಆಗಿ ಬುಧವಾರ ಚುನಾಯಿತರಾಗಿದ್ದಾರೆ.
ಬಿಜೆಪಿಯ ಅಭ್ಯರ್ಥಿ ಕವಿತಾ ಜೈನ್ ಅವರ ವಿರುದ್ಧ ಪ್ರೇಮಾ ಕಾರ್ಯಪ್ಪ ಅವರು 21 ಮತಗಳ ಅಂತರದಿಂದ ಜಯಗಳಿಸಿದರು. ಪ್ರೇಮಾ ಅವರು 53 ಮತ ಪಡೆದರೆ, ಕವಿತಾ ಅವರು ಪಡೆದಿದ್ದು 32 ಓಟು ಮಾತ್ರ. ಮತ್ತೊಬ್ಬ ಅಭ್ಯರ್ಥಿ ಸಂಯುಕ್ತ ಜನತಾದಳದ ಪದ್ಮಾವತಿ ಅವರು 11 ಓಟು ಪಡೆದರು.
ಕಾಂಗ್ರೆಸ್ಸಿನವರೆ ಆದ ಬಿ.ಎಸ್. ಪುಟ್ಟರಾಜು ಅವರು ಉಪ ಮೇಯರ್ ಆಗಿ ಆಯ್ಕೆಯಾದರು. ಅವರು 55 ಓಟುಗಳನ್ನು ಪಡೆದರೆ, ಎದುರಾಳಿಗಳಾದ ಬಿಜೆಪಿಯ ಎಸ್.ಕೆ. ನಟರಾಜ್ 32 ಮತ್ತು ಸಂಯುಕ್ತ ಜನತಾದಳದ ಎಸ್.ಡಿ. ಸೋಮಶೇಖರ್ 11 ಮತಗಳನ್ನು ಪಡೆದರು.(ಯುಎನ್ಐ)
3ನೇ ಮಹಿಳಾ ಮೇಯರ್: ಬೆಂಗಳೂರು ಮಹಾನಗರದ ಮೇಯರ್ ಆಗಿ ಆಯ್ಕೆಯಾದ 47 ವರ್ಷದ ಪ್ರೇಮಾ ಕಾರ್ಯಪ್ಪ ಅವರು ನಗರದ 3ನೇ ಮಹಿಳಾ ಮೇಯರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇದಕ್ಕೂ ಮುನ್ನ 1961ರಲ್ಲಿ ಇಂದ್ರಮ್ಮ ಅವರೂ 1997ರಲ್ಲಿ ಪದ್ಮಾವತಿ ಗಂಗಾಧರ ಗೌಡ ಅವರೂ ಮೇಯರ್ ಆಗಿ ಸೇವೆ ಸಲ್ಲಿಸಿದ್ದರು. ಚುನಾವಣಾ-ಕಾರಿಗಳು ಪ್ರೇಮಾ ಅವರ ಆಯ್ಕೆಯನ್ನು ಪ್ರಕಟಿಸುತ್ತಿದ್ದಂತೆ ಮಹಿಳಾ ಸದಸ್ಯರು ಪುಷ್ಪಗುಚ್ಛ ನೀಡಿ, ಹೂವಿನ ಹಾರ ಹಾಕಿ ನೂತನ ಮಹಿಳಾ ಮೇಯರ್ ಅವರಿಗೆ ಅಭಿನಂದನೆ ಸಲ್ಲಿಸಿದರು. ಮೇಯರ್ ಗೌನ್ ಧರಿಸಿದ ಪ್ರೇಮಾ ಕಾರ್ಯಪ್ಪ ಅವರು, ತಮ್ಮ ಗೆಲುವಿಗೆ ನೆರವಾದ ಎಲ್ಲರಿಗೂ ಧನ್ಯವಾದ ಅರ್ಪಿಸಿದರು.