ಗಂಗೂಲಿ ಶತಕ, ನ್ಯೂಜಿಲೆಂಡ್‌ಗೆ 265ರನ್‌ಗಳ ಸವಾಲು ಒಡ್ಡಿದ ಭಾರತ

ನೈರೋಬಿ : ಇಲ್ಲಿ ನಡೆಯುತ್ತಿರುವ ಐಸಿಸಿ ನಾಕೌಟ್‌ ಫೈನಲ್‌ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ ಭಾರತ, ನ್ಯೂಜಿಲೆಂಡ್‌ ವಿರುದ್ಧ 6 ವಿಕಟ್‌ ನಷ್ಟಕ್ಕೆ 264 ರನ್‌ ಮಾತ್ರ ಗಳಿಸಿತು.

ಆರಂಭ ಆಟಗಾರರಾದ ಸಚಿನ್‌ ತಂಡೂಲ್ಕರ್‌ ಹಾಗೂ ನಾಯಕ ಸೌರವ್‌ ಗಂಗೂಲಿಯವರು ಆಡುತ್ತಿದ್ದ ಶೈಲಿ, ಭಾರತ 300 ರನ್‌ಗಳ ಗಡಿ ದಾಟುವ ಸೂಚನೆ ನೀಡಿತ್ತು. ಆದರೆ, ವಿಶ್ವ ದಾಖಲೆ ಸ್ಥಾಪಿಸಿ, ವಿಶ್ವದ ಅತಿ ಹೆಚ್ಚು ರನ್‌ ಗಳಿಸಿದ ಕೀರ್ತಿಗೆ ಇಂದು ಪಾತ್ರರಾದ ಸಚಿನ್‌ ಹಾಗೂ ಕರ್ನಾಟಕದ ಹೆಮ್ಮೆಯ ಬ್ಯಾಟ್ಸ್‌ಮನ್‌ ರಾಹುಲ್‌ ದ್ರಾವಿಡ್‌ ಅವರಿಬ್ಬರೂ ರನೌಟ್‌ ಆದ ನಂತರ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ ನ್ಯೂಜಿಲೆಂಡ್‌ ಭಾರತವನ್ನು 264ರನ್ನುಗಳಿಗೆ ನಿಯಂತ್ರಿಸುವಲ್ಲಿ ಯಶಸ್ವಿಯಾಯಿತು.

ನಾಯಕ ಸೌರವ್‌ ಗಂಗೂಲಿ 130 ಚೆಂಡುಗಳನ್ನೆದುರಿಸಿ 117 ರನ್‌ ಸಂಪಾದಿಸಿದರೆ, ಸಚಿನ್‌ ತಂಡೂಲ್ಕರ್‌ 83 ಚೆಂಡುಗಳಲ್ಲಿ 69 ರನ್‌ ಮಾಡಿದರು. ದ್ರಾವಿಡ್‌ ತಾವು ಎದುರಿಸಿದ 35 ಚೆಂಡುಗಳಲ್ಲಿ 22ರನ್‌ ಗಳಿಸಿದರು. ಭಾರತದ ಯುವ ಬೌಲರ್‌ಗಳು ನ್ಯೂಜಿಲೆಂಡನ್ನು 265ರನ್‌ ಗಳಿಸದಂತೆ ಕಟ್ಟಿಹಾಕುತ್ತಾರೆಯೇ ಎಂಬುದನ್ನು ಕಾದು ನೋಡಬೇಕು.