ವೀರಶೈವ ಗಣತಿ ಗೊಂದಲ ಬೇಡ ಎಂದು ಚಿ.ಮೂ

ಬೆಂಗಳೂರು: ವೀರಶೈವ-ಲಿಂಗಾಯುತರು ಎಂದು ಪ್ರತ್ಯೇಕವಾಗಿ ಜನಗಣತಿಯಲ್ಲಿ ಬರೆಯಬೇಕೆಂದು ಕೆಲವರು ಹೇಳುತ್ತಿರುವುದಕ್ಕೆ ಸೊಪ್ಪು ಹಾಕಬಾರದೆಂದು ಸಂಶೋಧಕ, ಕನ್ನಡ ಶಕ್ತಿ ಕೇಂದ್ರದ ಪ್ರಧಾನ ಸಂಚಾಲಕ ಡಾ. ಎಂ. ಚಿದಾನಂದಮೂರ್ತಿ ಹೇಳಿದ್ದಾರೆ.

ಹಿಂದೂ ವಿವಾಹ ಮತ್ತು ದತ್ತಕ ಕಾನೂನುಗಳಲ್ಲಿ ವೀರಶೈವರು ಹಿಂದೂಗಳೆಂದು ಸ್ಪಷ್ಟವಾಗಿರುವುದರಿಂದ ಈ ಬಗ್ಗೆ ಯಾರೂ ಗೊಂದಲಕ್ಕೆ ಒಳಗಾಗಬಾರದು ಎಂದು ಶುಕ್ರವಾರ ಹೇಳಿರುವ ಚಿ.ಮೂ, ಜನಗಣತಿಯಲ್ಲಿ ಬೇರೆ ಬರೆಸಿದರೆ ಏನೂ ಲಾಭ ಸಿಗಲಾರದು. ಈ ಸಂಬಂಧ ಕೆಲವು ಜನಗಣತಿ ಅಧಿಕಾರಿಗಳೊಂದಿಗೆ ತಾವು ಮಾತುಕತೆ ನಡೆಸಿದ್ದು ಅವರೂ ತಮ್ಮ ಅಭಿಪ್ರಾಯಕ್ಕೆ ಬೆಂಬಲ ಸೂಚಿಸಿದ್ದಾರೆ ಎಂದು ಅವರು ಹೇಳಿದ್ದಾರೆ.

ತಮ್ಮ ಅಭಿಪ್ರಾಯಕ್ಕೆ ಸಿದ್ಧಗಂಗೆಯ ಡಾ. ಶಿವಕುಮಾರಸ್ವಾಮಿ ಹಾಗೂ ರಂಭಾಪುರಿ ಜಗದ್ಗುರುಗಳು ಸಹಮತ ವ್ಯಕ್ತಪಡಿಸಿರುವುದನ್ನು ಸ್ಮರಿಸಿರುವ ಅವರು ಈ ಬಗ್ಗೆ ಗೊಂದಲ ಬೇಡ ಎಂದು ಮತ್ತೊಮ್ಮೆ ಸ್ಪಷ್ಟಪಡಿಸಿದ್ದಾರೆ.