ಮಂಗಳೂರಿನ 5 ಪ್ಲಾಸ್ಟಿಕ್‌ ಘಟಕಗಳಿಗೆ ನೋಟೀಸ್‌

ಮಂಗಳೂರು : ಪುನರ್‌ ಉತ್ಪಾದಿಸಿದ ಪ್ಲಾಸ್ಟಿಕ್‌ ಮತ್ತು ಅದರ ಬಳಕೆ ಕುರಿತ ಶಾಸನದ 1999ರ ಮಾರ್ಗ ಸೂಚಿಗಳನ್ನು ಉಲ್ಲಂಘಿಸಿ ಪ್ಲಾಸ್ಟಿಕ್‌ ಚೀಲ ತಯಾರಿಸಿದ ಮಂಗಳೂರಿನ ಐದು ಮತ್ತು ಪುತ್ತೂರಿನ ಒಂದು ಪ್ಲಾಸ್ಟಿಕ್‌ ತಯಾರಿಕಾ ಘಟಕಗಳಿಗೆ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ವಿವರಣೆ ಕೋರಿ ನೋಟೀಸ್‌ ಜಾರಿ ಮಾಡಿದೆ.

ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಕಪಿಲ್‌ ಮೋಹನ್‌ ಮಂಗಳವಾರ ಸುದ್ದಿ ಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ್ದಾರೆ. ಬೈಕಂಪಾಡಿ ಕೈಗಾರಿಕಾ ಪ್ರದೇಶದಲ್ಲಿರುವ ಸುಪ್ರೀಂ ಪ್ಲಾಸ್ಟಿಕ್‌ ಇಂಡಸ್ಟ್ರೀಸ್‌, ಡೆಕ್ಕನ್‌ ಪ್ಲಾಸ್ಟಿಕ್‌ ಇಂಡಸ್ಟ್ರೀಸ್‌, ರಾಯಲ್‌ ಪ್ಲಾಸ್ಟಿಕ್‌ ಇಂಡಸ್ಟ್ರೀಸ್‌, ಎಬಿಕೆಒ ಇಂಡಸ್ಟ್ರೀಸ್‌ ಮತ್ತು ಮತ್ತು ಪಾೖಸ್‌ ಪ್ಲಾಸ್ಟಿಕ್‌ ಇಂಡಸ್ಟ್ರೀಸ್‌ ಹಾಗೂ ಪುತ್ತೂರಿನ ಸುಭಾಷ್‌ ಪಾಲಿಮರ್ಸ್‌ ಘಟಕಕ್ಕೆ ಶೋಕಾಸ್‌ ನೋಟೀಸ್‌ ಜಾರಿ ಮಾಡಲಾಗಿದೆ.

ಉತ್ಪಾದಕರು, ಮಾರಾಟಗಾರರು ಪುನರ್‌ ಉತ್ಪಾದಿತ ಪ್ಲಾಸ್ಟಿಕ್‌ ಬಳಕೆ ಶಾಸನದ ನಿಯಮಾವಳಿಗಳನ್ನು ಕಟ್ಟು ನಿಟ್ಟಾಗಿ ಪಾಲಿಸದಿದ್ದರೆ ಅವರನ್ನು ಪರಿಸರ ಕಾಯ್ದೆ ಯಡಿಯಲ್ಲಿ ಶಿಕ್ಷೆಗೆ ಗುರಿಪಡಿಸಲಾಗುವುದು ಎಂದು ಜಿಲ್ಲಾಧಿಕಾರಿ ಎಚ್ಚರಿಸಿದ್ದಾರೆ. ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ನಡೆಯುತ್ತಿರುವ ಪ್ಲಾಸ್ಟಿಕ್‌ ಹೆಕ್ಕಿಕೋ ಚಳವಳಿ, ಮತ್ತು ಪ್ಲಾಸ್ಟಿಕ್‌ ಬಳಕೆಯನ್ನು ತಡೆಗಟ್ಟುವ ಕ್ರಮಗಳ ಹಿನ್ನೆಲೆಯಲ್ಲಿ ಈ ಎಚ್ಚರಿಕೆ ಮಹತ್ವದ್ದಾಗಿದೆ.

(ಮಂಗಳೂರು ಪ್ರತಿನಿಧಿಯಿಂದ)