ವೀರಪ್ಪನ್‌ ಬೇಡಿಕೆ ಪ್ರಶ್ನಿ-ಸಿ-ದ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆ ರದ್ದು

ಚೆನ್ನೈ : ವೀರಪ್ಪನ್‌ ಬೇಡಿಕೆಗಳನ್ನು ತಮಿಳುನಾಡು ಸರ್ಕಾರ ಒಪ್ಪಬಾರದೆಂದು ಚೆನ್ನೈ ಮೂಲದ ವಕೀಲರು ಹೂಡಿದ್ದ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆಯನ್ನು ಮದ್ರಾಸ್‌ ಹೈಕೋರ್ಟ್‌ ವಿಭಾಗೀಯ ಪೀಠ ಗುರುವಾರ ರದ್ದು ಪಡಿಸಿದೆ.

ಹಂಗಾಮಿ ಮುಖ್ಯ ನ್ಯಾಯಾಧೀಶ ಎನ್‌.ಕೆ. ಜೈನ್‌ ಮತ್ತು ನ್ಯಾಯಮೂರ್ತಿ ರವಿರಾಜ ಪಾಂಡಿಯನ್‌ ಅವರನ್ನೊಳಗೊಂಡ ವಿಭಾಗೀಯ ಪೀಠ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆಯನ್ನು ರದ್ದು ಪಡಿಸಿದೆ. ಜನರ ಹಿತಾಸಕ್ತಿ ಕುರಿತಂತೆ ಸರ್ಕಾರ ಕೈಗೊಳ್ಳುವ ನಿರ್ಧಾರದ ಮಧ್ಯೆ ಕೋರ್ಟು ತಲೆ ತೂರಿಸಲಾಗದು ಎಂದು ಪೀಠ ತೀರ್ಪು ನೀಡಿದೆ.

ವಕೀಲ ಜಿ.ಕೃಷ್ಣಮೂರ್ತಿ ಅವರು ಸಲ್ಲಿಸಿದ್ದ ಅಹವಾಲಿನಲ್ಲಿ, ರಾಜ್‌ಕುಮಾರ್‌ ಬಿಡುಗಡೆಗೆ ವೀರಪ್ಪನ್‌ ಒಡ್ಡಿರುವ ಷರತ್ತುಗಳಲ್ಲಿ ಒಂದಾದ ತಮಿಳುನಾಡು ಜೈಲಿನ ಉಗ್ರಗಾಮಿಗಳನ್ನು ಬಿಡಕೂಡದು. ಅವರ ಮೇಲಿರುವ ಅನೇಕ ಆರೋಪಗಳ ವಿಚಾರಣೆ ನಡೆಯುತ್ತಿದೆ ಎಂದು ನಮೂದಿಸಲಾಗಿತ್ತು.

(ಯುಎನ್‌ಐ)