ಪಂಚಾರತಿ

• ಸುಪ್ತ ದೀಪ್ತಿ , ಮಣಿಪಾಲ
  [email protected]

ಪಕ್ಕದಲ್ಲೊಬ್ಬ ಗಂಡ,
ಬಗಲಲ್ಲೊಬ್ಬ ಗುಂಡ,
ಇವೇ ನಿನ್ನ ಗುರಿಯಾದರೆ
ಹೆಣ್ಣೇ, ಬಾಳು ದಂಡ

*

ಶ್ರೀ ಹರಿಹರೇಶ್ವರ ಅವರಿಗೆ-

ನಮ್ಮೀ ಸಹೃದಯ ಮೇಷ್ಟ್ರು ಬಹಳ ಸ್ಟ್ರಿಕ್ಟು,
ಮೊಂಡು ವಿದ್ಯಾರ್ಥಿಯರನ್ನೂ ಹಿಡಿದಿಟ್ಟು-
ಹೋಂವರ್ಕ್‌ ಮಾಡಿಸುವ ಗಟ್ಟಿತನದ ಗುಟ್ಟು
ಅವರೊಬ್ಬರಿಗೇ ಗೊತ್ತು ; ಇದೋ ನನ್ನ ಸೆಲ್ಯೂಟ್‌.

*

ಬೀಗರಿಗೆ ಪತ್ರ

ನಮ್ಮ ಹುಡುಗಿ ಬಸುರಿದ್ದವಳು
ಬಾಣಂತಿಯಾದಳು,
ನಿಮ್ಮ ಮನೆಯಲಿ ನಗುವನು ಹರಡಲು
ಮಗುವನ್ನಿತ್ತಳು.

*

ನಮ್ಮ ಬೆನ್ನ ಮೇಲೆ...

ಕನ್ನಡ ಕೂಟದ ಕಾರ್ಯಕ್ರಮ,
ಬಣ್ಣದ ಲೋಕದ ಸಂಭ್ರಮ,
ಉಡುಗೆ-ಒಡವೆ-ಗೊಡವೆಗಳ ನಡುವೆ-
ವೇದಿಕೆ ಮೇಲೆ ಏನಾಗ್ತಿದೆ, ಸ್ವಲ್ಪ ಹೇಳಮ್ಮ !

*

ಸಾಕ್ಷಿ

ಜಾಲಿಯ ಮರದಲಿ ಗೀಜಗನ ಗೂಡು,
ಮುಳ್ಳೂ ಮನೆಯಾಗಬಹುದೆಂಬ ಸಾಕ್ಷಿ ;
ಆಲದ ಬೀಳಲ ಜೋಲಿಯಲ್ಲಿ ನಗು,
ಎಲ್ಲೂ ಮಮತೆ ಮಡಿಲು ಇಹುದೆಂಬ ಸಾಕ್ಷಿ .

1. ‘ಎನ್ನ ನಿದ್ದೆಯ ಕದ್ದ ಚಿತ್ತಚೋರನ ನೆನಪಲ್ಲಿ !’- ಶೈಲಜಾ ವಲಕಟ್ಟೆ
2. ಚಂದ್ರಮನ ಚುಟುಕುಗಳು - ಚಂದ್ರಶೇಖರ್‌ ಮಾಡಭಾವಿ

ಮುಖಪುಟ / ಸಾಹಿತ್ಯ-ಸಂಸ್ಕೃತಿ