ತೀರ್ಪುಗಾರರ ಮೆಚ್ಚುಗೆ ಪಡೆದ ಕವಿತೆ

• ಕೆ.ಗಿರೀಶ ಐತಾಳ, [email protected]
  ವಿಳಾಸ : 50, ರಾಘವೇಂದ್ರ ನಗರ, ಡಿ ಬ್ಲಾಕ್‌, ಅಚಿದ್ರಹಳ್ಳಿ, ವಿಶ್ವನೀಡಂ ಅಂಚೆ, ಬೆಂಗಳೂರು- 560 091.

ಈ ಭೂಮಿಗೋ, ಸದಾ ಆ ಗಗನವನ್ನು ಚುಂಬಿಸುವ ಆಸೆ.

ಅದಕ್ಕೆ ಬೆಳೆಯುವುದು ಮರ, ಕೊರಳ ಚಾಚುವುದು ಗಿರಿ ಶಿಖರ ;

ಮತ್ತೆ ಮುಖ ಮಾಡಿ ಮುಗಿಲಿನತ್ತ , ಅರಳುವ ಆ ಸಣ್ಣ ಹೂಗಳು,

ನಿತ್ಯ ಯತ್ನಿಸುತ್ತಿವೆ ಬಾನ ಸಂಧಿಸಲು.

ಆ ಬಾನಿಗದೂನು ಸದಾ ಈ ಭೂಮಿಯನ್ನು ಅಪ್ಪಿಕೊಳ್ಳುವಾಸೆ.
ಹಗಲು ರಾತ್ರಿ ಬಿಡದೆ ನಿರಂತರ, ಬೆಳಗಿ ಹರಿಯುವ ಕದಿರ ಹೊಳೆ ;
ಕಣ್ಣ ತಣಿಸುವ ಕಾಮನಬಿಲ್ಲು , ಮೋಡಗಳ ಮೂಲಕ ಮಿಂಚು ಮಾತಾಡಿ,
ಮಳೆಯ ಸುರಿಸಿ ಮುಗಿಲು, ಇಳೆಯ ಪ್ರೀತಿಸುವುದು.

ಬಾರೆ ಗೆಳತಿ ಅಲ್ಲಿ ; ನೆಲ ಬಾನ ಕೂಡುವಲ್ಲಿ .
ಅಲ್ಲಿ ಸದಾ ಪ್ರೇಮದ ವರ್ಷಧಾರೆ.

ಅಲ್ಲಿ ಸಮಯ ಚಲಿಸುವುದಿಲ್ಲ .
ಅಲ್ಲಿ ಸೂರ್ಯ ಮುಳುಗುವುದಿಲ್ಲ .
ಅಲ್ಲಿ ದಾರಿ ಮುಗಿಯುವುದಿಲ್ಲ .
ಅಲ್ಲಿ ರಾತ್ರಿ ಮರಳುವುದಿಲ್ಲ .

ಬಾರೆ ಗೆಳತಿ ಅಲ್ಲಿ ; ನೆಲ ಬಾನ ಕೂಡುವಲ್ಲಿ .
ಅಲ್ಲಿ ಸದಾ ಪ್ರೇಮದ ವರ್ಷಧಾರೆ.

ಅಲ್ಲಿ ನೋವು ಸುಳಿಯುವುದಿಲ್ಲ .
ಅಲ್ಲಿ ಸವಿನೆನಪು ಮಾಸುವುದಿಲ್ಲ .

ಅಲ್ಲಿ ಬಣ್ಣಗಳು ಅಳಿಸುವುದಿಲ್ಲ .
ಅಲ್ಲಿ ಹಸಿವೆ, ನೀರಡಿಕೆಯೆಂಬುದಿಲ್ಲ .

ಬಾ,ಬಾ ಆ ದಿಗಂತದೆಡೆಗೆ !
ಅಲ್ಲಿ ಸುರಿಯುವ ಮಳೆ ಹೊಳೆಯಾಗಿ ಹರಿದು,
ಹೊಳೆ ಪೈರಾಗಿ ಬೆಳೆದು,
ನನ್ನ ನಿನ್ನ ಹೃದಯಗಳಲ್ಲಿ ಅರಳಲಿ
ಆ ಬೆಟ್ಟದ ಮೇಲಿನ ಸಣ್ಣ ಹೂಗಳು ;
ಕ್ಷಣವೊಂದಾದರೂ ಕಂಪ ಸೂಸಲು.

ಮುಖಪುಟ /

/