ಮಾವಿನ ವಸ್ತುಸಂಗ್ರಹಾಲಯಗಳಿಂದ ಮಾವಿನ ಹಳ್ಳಿಗಳವರೆಗೆ, ಮಾವು ಪ್ರಿಯರು ಭೇಟಿ ನೀಡಲೇಬೇಕಾದ ಸ್ಥಳಗಳಿವು
ಮಾವು ಹಣ್ಣುಗಳ ರಾಜ. ಮಾವಿನ ಸೀಸನ್ ಬಂತೆಂದರೆ ಸಾಕು ಎಲ್ಲಿ ನೋಡಿದರೂ ಮಾವಿನಹಣ್ಣುಗಳ ರಾಶಿ ಕಣ್ಣಿಗೆ ಬೀಳುತ್ತದೆ. ಮಾರುಕಟ್ಟೆಯಲ್ಲಿ ರಸ್ತೆ ಬದಿ ವ್ಯಾಪಾರಿಗಳ ತಳ್ಳುಗಾಡಿಗಳಲ್ಲಿ, ಮನೆ ಮನೆಗೆ ಹಣ್ಣು ಹೊತ್ತು ತರುವ ಮಹಿಳೆಯರ ಬುಟ್ಟಿಯಲ್ಲಿ ಮಾವು ತುಂಬಿರುತ್ತದೆ. ಇದೀಗ ಅಲ್ಲಲ್ಲಿ ಮಾವು ಮೇಳಗಳು ಕೂಡಾ ನಡೆಯುತ್ತಿರುತ್ತದೆ. ಇಲ್ಲಿ ವಿವಿಧ ತಳಿಯ ಮಾವುಗಳು ಮಾವು ಪ್ರಿಯರಿಗೆ ರಸದೌತಣ ನೀಡುತ್ತದೆ. ಈಗೀಗ ಮಾವಿನ ಮ್ಯೂಜಿಯಂ, ಮಾವಿನ ಹಳ್ಳಿ, ಮಾವಿನ ತೋಟ ಹೀಗೆ ಮಾವಿಗಾಗಿಯೇ ಮೀಸಲಾಗಿರುವ ಅನೇಕ ಸ್ಥಳಗಳಿವೆ. ಭಾರತದಿಂದ ಫಿಲಿಪೈನ್ಸ್ವರೆಗೆ ಇರುವ ಈ ಮಾವಿನ ತಾಣಗಳು ಮಾವು ಪ್ರಿಯರ ಪಾಲಿಗೆ ಸ್ವರ್ಗವೇ ಸರಿ.
1. ಅನಿಲ್ ಫಾರ್ಮ್ಸ್ ಮಾವಿನ ಮ್ಯೂಜಿಯಂ:
ಗುಜರಾತ್ ಗಿರ್ ರಾಷ್ಟ್ರೀಯ ಉದ್ಯಾನವನದಿಂದ ಕೆಲವೇ ಕಿಲೋಮೀಟರ್ ದೂರದಲ್ಲಿರುವ ಅನಿಲ್ ಫಾರ್ಮ್ಸ್ ಮ್ಯಾಂಗೋ ಮ್ಯೂಜಿಯಂ ಮಾವಿನ ಪ್ರಿಯರಿಗೆ ಒಂದು ಕನಸಿನಂತೆ ತೋರುತ್ತದೆ. ಶಾಂತವಾಗಿ ಹರಿಯುತ್ತಿರುವ ಹಿರಣ್ ನದಿಯ ಪಕ್ಕದಲ್ಲಿ 12.5 ಎಕರೆ ಪ್ರದೇಶದಲ್ಲಿ ಹರಡಿರುವ ಈ ಸುಂದರವಾದ ತೋಟ 230 ಕ್ಕೂ ಹೆಚ್ಚು ಬಗೆಯ ಮಾವಿನ ತಳಿಗಳ ನೆಲೆಯಾಗಿದೆ.
ಇಲ್ಲಿ ನೀವು ಹಿಂದೆಂದೂ ಕೇಳಿರದ ವಿವಿಧ ಬಣ್ಣ, ಆಕಾರ, ಗಾತ್ರ ಮತ್ತು ಹೆಸರುಗಳ ಹಣ್ಣುಗಳನ್ನು ಹೊಂದಿರುವ ಮಾವಿನ ಮರಗಳಿವೆ. ಕೆಲವು ಮಾವಿನ ಹಣ್ಣುಗಳು ಚಿಕ್ಕದಾಗಿರುತ್ತವೆ, ಕೆಲವು ದೊಡ್ಡದಾಗಿರುತ್ತವೆ, ಕೆಲವು ಕಡು ಕೆಂಪು ಬಣ್ಣದ್ದಾಗಿದ್ದರೆ, ಇನ್ನು ಕೆಲವು ಸೇಬುಗಳು ಅಥವಾ ಸ್ಟ್ರಾಬೆರಿಗಳಂತೆ ಕಾಣುತ್ತವೆ. ಹಾಗೆ ನೋಡಿದರೆ ಇಲ್ಲಿ ಸ್ಟ್ರಾಬೆರಿ ಮ್ಯಾಂಗೋ ಮತ್ತು ರೆಡ್ ಆಪಲ್ ಮ್ಯಾಂಗೋ ಹೆಸರಿನ ಮಾವಿನ ಹಣ್ಣುಗಳೂ ಇವೆ.
ಈ ಹಣ್ಣಿನ ತೋಟದಲ್ಲಿ ಥೈಲ್ಯಾಂಡ್, ಆಸ್ಟ್ರೇಲಿಯಾ, ಇಸ್ರೇಲ್, ಯುರೋಪ್ ಮತ್ತು ಯುಎಸ್ಎಯ ಅಂತರರಾಷ್ಟ್ರೀಯ ಪ್ರಭೇದಗಳ ಮಾವನ್ನು ಬೆಳೆಯಲಾಗುತ್ತದೆ. ಜೊತೆಗೆ ಕೇಸರ್, ದಾಸೇರಿ, ಲ್ಯಾಂಗ್ಡಾ, ಚೌನ್ಸಾ, ಹಪಸ್, ತೋತಾಪುರಿ ಮತ್ತು ಮಲ್ಗೋವಾಗಳಂತಹ ಶ್ರೇಷ್ಠ ಮಾವುಗಳನ್ನು ಕೂಡಾ ಕಾಣಬಹುದು. ಸಿಂಧು-117 ನಂತಹ ಬೀಜರಹಿತ ಮಾವಿನಹಣ್ಣುಗಳು ಮತ್ತು ವರ್ಷಕ್ಕೆ ಹಲವಾರು ಬಾರಿ ಫಲ ನೀಡಬಲ್ಲ ವಿಶೇಷ "ಬರಮಸಿ" ಪ್ರಭೇದಗಳೂ ಇಲ್ಲಿವೆ.
2. ಕುರುವಕ್ಕಾವು, ಕೇರಳ:
ಕೇರಳದ ಕಣ್ಣೂರು ಜಿಲ್ಲೆಯ ಒಂದು ಸಣ್ಣ ಹಳ್ಳಿ ಅಸಾಧಾರಣವಾದ ಕೆಲಸವನ್ನು ಮಾಡುತ್ತಿದೆ. ಕುರುವಕ್ಕಾವು ಭಾರತದ ಅಪರೂಪದ ಸ್ಥಳೀಯ ಮಾವಿನ ಹಣ್ಣುಗಳನ್ನು ಸಂರಕ್ಷಿಸುವ ಪ್ರಮುಖ ಸ್ಥಳಗಳಲ್ಲಿ ಒಂದಾಗಿದೆ. ಈ ಪುಟ್ಟ ಹಳ್ಳಿಯು ನಂಬಲಾಗದಷ್ಟು ಸಣ್ಣ ಜಾಗದಲ್ಲಿ 100 ಕ್ಕೂ ಹೆಚ್ಚು ಬಗೆಯ ಮಾವಿನ ಹಣ್ಣುಗಳನ್ನು ಬೆಳೆಯುತ್ತದೆ. ವಿಶಾಲವಾದ ಕಣ್ಣಾಪುರಂ ಪ್ರದೇಶದಲ್ಲಿ 200 ಕ್ಕೂ ಹೆಚ್ಚು ಸ್ಥಳೀಯ ಮಾವಿನ ವಿಧಗಳಿವೆ ಎಂದು ಹೇಳಲಾಗುತ್ತದೆ. ಈ ಮಾವಿನ ಹಣ್ಣುಗಳಲ್ಲಿ ಕೆಲವು ನೆಲ್ಲಿಕಾಯಿಯಷ್ಟು ಚಿಕ್ಕದಾಗಿದ್ದರೆ, ಕೆಲವು ತೆಂಗಿನಕಾಯಿಯಷ್ಟು ದೊಡ್ಡದಾಗಿರುತ್ತವೆ. ಕೆಲವು ಅತ್ಯಂತ ಸಿಹಿ ರುಚಿಯನ್ನು ಹೊಂದಿದ್ದರೆ, ಇನ್ನು ಕೆಲವು ಹುಣಸೆ ಹಣ್ಣಿನಂತೆ ಆಶ್ಚರ್ಯಕರವಾಗಿ ಹುಳಿಯಾಗಿರುತ್ತವೆ.
ಈ ಸಂರಕ್ಷಣಾ ಆಂದೋಲನ ಹೇಗೆ ಪ್ರಾರಂಭವಾಯಿತು ಎಂಬ ಕಥೆ ಬಹಳ ಕುತೂಹಲಕಾರಿಯಾಗಿದೆ. ವರದಿಗಳ ಪ್ರಕಾರ, 200 ವರ್ಷ ಹಳೆಯದಾದ ಮಾವಿನ ಮರವನ್ನು ಕಡಿದ ನಂತರ ಗ್ರಾಮಸ್ಥರ ಮನದಲ್ಲಿ ತೊಳಲಾಟ ಎದ್ದಿತು. ಆ ಮರವು ಸ್ಥಳೀಯರು ತಿಂದು ಬೆಳೆದ ಅತ್ಯಂತ ವಿಶೇಷವಾದ, ಸಿಹಿಯಾದ ಮಾವನ್ನು ಉತ್ಪಾದಿಸಿತ್ತು. ಅದನ್ನು ಕಳೆದುಕೊಂಡ ನಂತರ ಸಮುದಾಯವು ಸಾಂಪ್ರದಾಯಿಕ ಮಾವಿನ ಪ್ರಭೇದಗಳು ಎಷ್ಟು ಸುಲಭವಾಗಿ ಶಾಶ್ವತವಾಗಿ ಕಣ್ಮರೆಯಾಗಬಹುದು ಎಂಬುದನ್ನು ಅರಿತುಕೊಂಡಿತು.
ಆ ಕ್ಷಣ ಸ್ಥಳೀಯರಿಗೆ ಸ್ಥಳೀಯ ಮಾವಿನ ಮರಗಳನ್ನು ರಕ್ಷಿಸಲು ಮತ್ತು ಮತ್ತೆ ಬೆಳೆಸಲು ಪ್ರೇರಣೆ ನೀಡಿತು. ಇಂದು, ಸುಮಾರು 20 ಕುಟುಂಬಗಳು ಈ ವಿಶಿಷ್ಟ ಪ್ರಭೇದಗಳನ್ನು ಸಂರಕ್ಷಿಸಲು ಒಟ್ಟಾಗಿ ಕೆಲಸ ಮಾಡುತ್ತವೆ.
3.ಐಸಿಎಆರ್-ಸೆಂಟ್ರಲ್ ಇನ್ಸ್ಟಿಟ್ಯೂಟ್ ಫಾರ್ ಸಬ್ ಟ್ರಾಪಿಕಲ್ ಹಾರ್ಟಿಕಲ್ಚರ್ ಮ್ಯಾಂಗೋ ಮ್ಯೂಜಿಯಂ ಲಕ್ನೋ:
ಮಾವಿನ ಹಣ್ಣುಗಳನ್ನು ಹೇಗೆ ಸಂಶೋಧಿಸಲಾಗುತ್ತದೆ, ರಕ್ಷಿಸಲಾಗುತ್ತದೆ, ಸುಧಾರಿಸಲಾಗುತ್ತದೆ ಮತ್ತು ವೈಜ್ಞಾನಿಕವಾಗಿ ಹೇಗೆ ಬೆಳೆಸಲಾಗುತ್ತದೆ ಎನ್ನುವ ಕುತೂಹಲ ನಿಮಗೂ ಇದೆಯಾ? ಲಕ್ನೋದಲ್ಲಿರುವ ICAR-CISH ಮಾವಿನ ವಸ್ತು ಸಂಗ್ರಹಾಲಯವು ಈ ಬಗ್ಗೆ ಅನ್ವೇಷಿಸಲು ಸೂಕ್ತ ಸ್ಥಳವಾಗಿದೆ. 2022ರಲ್ಲಿ ತೆರೆಯಲಾದ ಈ ಸಂಗ್ರಹಾಲಯವು ಭಾರತದ ಅತ್ಯುತ್ತಮ ತೋಟಗಾರಿಕೆ ಸಂಶೋಧನಾ ಸಂಸ್ಥೆಗಳಲ್ಲಿ ಒಂದಾಗಿದೆ. ಇದು ಹಳೆಯ ವಸ್ತುಗಳಿಂದ ಮಾತ್ರ ತುಂಬಿರುವ ಸಾಂಪ್ರದಾಯಿಕ ವಸ್ತುಸಂಗ್ರಹಾಲಯಗಳಿಗಿಂತ ಭಿನ್ನವಾಗಿದೆ. ಇದು ಸಂವಾದಾತ್ಮಕ, ಶೈಕ್ಷಣಿಕ ಮತ್ತು ಸಂಪೂರ್ಣವಾಗಿ ಹಣ್ಣುಗಳ ಮೇಲೆ, ವಿಶೇಷವಾಗಿ ಮಾವಿನಹಣ್ಣಿನ ಮೇಲೆ ಕೇಂದ್ರೀಕೃತವಾಗಿದೆ.
ಈ ಮ್ಯೂಜಿಯಂ ಅನ್ನು ಏಳು ವಿಭಾಗಗಳಾಗಿ ವಿಂಗಡಿಸಲಾಗಿದೆ. ಪ್ರತಿಯೊಂದೂ ಮಾವಿನ ಕೃಷಿ ಮತ್ತು ಸಂಶೋಧನೆಯ ವಿಭಿನ್ನ ಬದಿಗಳನ್ನು ತೋರಿಸುತ್ತದೆ. ಸಂದರ್ಶಕರು ಮಾವಿನ ಇತಿಹಾಸ, ಜೈವಿಕ ತಂತ್ರಜ್ಞಾನ, ಕೀಟ ನಿಯಂತ್ರಣ, ಕೃಷಿ ತಂತ್ರಗಳು, ಸಾವಯವ ಕೃಷಿ, ಹೈಡ್ರೋಪೋನಿಕ್ಸ್, ಹಸಿರುಮನೆ ವ್ಯವಸ್ಥೆಗಳು ಮತ್ತು ಮಾವಿನಿಂದ ತಯಾರಿಸಿದ ಮೌಲ್ಯವರ್ಧಿತ ಉತ್ಪನ್ನಗಳ ಬಗ್ಗೆ ಇಲ್ಲಿಗೆ ಬೇಟಿ ನೀಡಿ ಮಾಹಿತಿ ಪಡೆಯುತ್ತಾರೆ.
ಆದರೆ, ಅತ್ಯಂತ ದೊಡ್ಡ ಆಕರ್ಷಣೆಯೆಂದರೆ ಮಾವಿನ ಗ್ಯಾಲರಿ. ಈ ವಿಭಾಗವು ಭಾರತದಾದ್ಯಂತದ ಪ್ರಸಿದ್ಧ ಮಾವಿನ ಪ್ರಭೇದಗಳ ಮಣ್ಣಿನ ಮಾದರಿಗಳನ್ನು ಪ್ರದರ್ಶಿಸುತ್ತದೆ. ಈ ಗ್ಯಾಲರಿಯು ಸುಮಾರು 250 ವರ್ಷಗಳಷ್ಟು ಹಳೆಯದು ಎಂದು ನಂಬಲಾದ ಭಾರತದ ಪೌರಾಣಿಕ ದಶೇಹರಿ ಮಾವಿನ ಮರವನ್ನು ಹೊಂದಿದೆ.
4. ಪ್ರೋಫುಡ್ ಮ್ಯಾಂಗೋ ಮ್ಯೂಜಿಯಂ ಫಿಲಿಪೈನ್ಸ್:
ಫಿಲಿಪೈನ್ಸ್ ಜನರು ಮಾವಿನ ಹಣ್ಣುಗಳನ್ನು ತುಂಬಾ ಇಷ್ಟಪಡುತ್ತಾರೆ. ಮಾಂಡೌ ಸಿಟಿಯಲ್ಲಿರುವ ಪ್ರೊಫುಡ್ ಮಾವಿನ ಸಂಗ್ರಹಾಲಯವೇ ಇದಕ್ಕೆ ಸಾಕ್ಷಿ. ದೇಶದ ರಾಷ್ಟ್ರೀಯ ಹಣ್ಣಿಗೆ ಸಂಪೂರ್ಣವಾಗಿ ಸಮರ್ಪಿತವಾಗಿರುವ ಈ ಸಂಗ್ರಹಾಲಯದಲ್ಲಿ ಮಾವಿನ ಹಣ್ಣುಗಳಿಗೆ ಸಂಬಂಧಿಸಿದ ಎಲ್ಲಾ ಪದಾರ್ಥಗಳೂ ಲಭ್ಯವಿದೆ. ವಿಶೇಷವಾಗಿ ಫಿಲಿಪೈನ್ಸ್ನ ಅತ್ಯಂತ ಪ್ರಸಿದ್ಧ ಆಹಾರ ರಫ್ತುಗಳಲ್ಲಿ ಒಂದಾದ ಒಣಗಿದ ಮಾವಿನ ಹಣ್ಣುಗಳನ್ನು ಹೊಂದಿದೆ.
ಈ ಸಂಗ್ರಹಾಲಯವು ವಿಶ್ವದ ಅತಿದೊಡ್ಡ ಒಣಗಿದ ಮಾವು ಉತ್ಪಾದಕರಲ್ಲಿ ಒಂದಾದ ಪ್ರೊಫುಡ್ ಇಂಟರ್ನ್ಯಾಷನಲ್ ಕಾರ್ಪೊರೇಷನ್ನ ಭಾಗವಾಗಿದೆ. ಮಾವಿನ ಹಣ್ಣುಗಳನ್ನು ಹೇಗೆ ಬೆಳೆಯಲಾಗುತ್ತದೆ, ಕೊಯ್ಲು ಮಾಡಲಾಗುತ್ತದೆ, ಕತ್ತರಿಸಲಾಗುತ್ತದೆ, ಒಣಗಿಸಲಾಗುತ್ತದೆ, ಪ್ಯಾಕ್ ಮಾಡಲಾಗುತ್ತದೆ ಮತ್ತು ಪ್ರಪಂಚದಾದ್ಯಂತ ಸಾಗಿಸಲಾಗುತ್ತದೆ ಎಂಬುದರ ಸಂಪೂರ್ಣ ದೃಶ್ಯ ಅನುಭವ ಇಲ್ಲಿಗೆ ಭೇಟಿ ನೀಡಿದರೆ ಪಡೆದುಕೊಳ್ಳಬಹುದು.
5. ಮಲಿಹಾಬಾದ್, ಲಕ್ನೋ:
ಮಾವಿನ ತಾಣಗಳ ಬಗ್ಗೆ ಮಾತನಾಡುವಾಗ ಮಲಿಹಾಬಾದ್ ಬಗ್ಗೆ ಉಲ್ಲೇಖಿಸದಿರಲು ಹೇಗೆ ಸಾಧ್ಯ. ಇದು ಲಕ್ನೋ ಬಳಿಯಿದೆ. ದಶೇಹರಿ ಮಾವಿನ ಹಣ್ಣುಗಳನ್ನು ಉತ್ಪಾದಿಸುವುದಕ್ಕೆ ಪ್ರಸಿದ್ಧವಾಗಿದೆ. ಇಲ್ಲಿ ಮೈಲುಗಳಷ್ಟು ಉದ್ದವಿರುವ ತೋಟಗಳಿವೆ. ಇವುಗಳನ್ನು ಹಲವು ತಲೆಮಾರುಗಳಿಂದ ಮಾವಿನ ಹಣ್ಣುಗಳನ್ನು ಬೆಳೆದ ಕುಟುಂಬಗಳು ನೋಡಿಕೊಳ್ಳುತ್ತವೆ.
ಇಲ್ಲಿನ ಅತಿ ದೊಡ್ಡ ಆಕರ್ಷಣೆಗಳಲ್ಲಿ ಒಂದು 200 ವರ್ಷಗಳಿಗೂ ಹಳೆಯದಾದ ಮೂಲ ದಶೇಹರಿ ಮಾವಿನ ಮರ. ಮಾವು ಪ್ರಿಯರು ಬೇಸಿಗೆಯಲ್ಲಿ ಮಲಿಹಾಬಾದ್ಗೆ ಭೇಟಿ ನೀಡಲೇ ಬೇಕು. ಅಲ್ಲಿಯ ಮಾವಿನ ಅನುಭವ ಪಡೆಯಲೇ ಬೇಕು.
6. ಗುಯಿಮಾರಸ್, ಫಿಲಿಪೈನ್ಸ್:
ಫಿಲಿಪೈನ್ಸ್ನ ಗುಯಿಮಾರಸ್ ದ್ವೀಪ ಪ್ರಾಂತ್ಯವು ನಂಬಲಾಗದಷ್ಟು ಸಿಹಿ ಮಾವಿನ ಹಣ್ಣುಗಳನ್ನು ಉತ್ಪಾದಿಸುವುದಕ್ಕೆ ಅಂತರರಾಷ್ಟ್ರೀಯವಾಗಿ ಪ್ರಸಿದ್ಧವಾಗಿದೆ. ಗುಯಿಮಾರಸ್ ಮಾವಿನ ಹಣ್ಣುಗಳು ವಿಶ್ವದ ಅತ್ಯುತ್ತಮವಾದವುಗಳಲ್ಲಿ ಸೇರಿವೆ ಎನ್ನಲಾಗಿದೆ.
ಈ ದ್ವೀಪವು ಮಾವಿನ ಋತುವನ್ನು ವರ್ಣರಂಜಿತ ಹಬ್ಬಗಳು, ಆಹಾರ ಮೇಳಗಳು, ಕೃಷಿ ಪ್ರವಾಸಗಳು ಮತ್ತು ಮಾವಿನ ಭಕ್ಷ್ಯಗಳೊಂದಿಗೆ ಆಚರಿಸುತ್ತದೆ. ಇಲ್ಲಿ, ಸಂದರ್ಶಕರು ಮಾವಿನ ಪಿಜ್ಜಾ, ಮಾವಿನ ಬರ್ಗರ್ಗಳು, ಮಾವಿನ ಐಸ್ ಕ್ರೀಮ್, ಮಾವಿನ ಜಾಮ್, ಮಾವಿನ ಪೇಸ್ಟ್ರಿಗಳು, ಮಾವಿನ ಶೇಕ್ಗಳು ಮತ್ತು ಮಾವಿನ ಕೆಚಪ್ ರುಚಿಯನ್ನು ನೋಡಬಹುದು.
(ಬರಹ: ರಂಜಿತಾ ಆರ್.ಕೆ.)
Click it and Unblock the Notifications
Sign in with Google