ಅಮ್ಮಾ! ಅಬ್ಬಾ!!

ಅಮ್ಮಾ! ಅಬ್ಬಾ!!

ಹಂ.ಕ. ರಾಮಪ್ರಿಯನ್‌ [email protected] ಶಿಷ್ಯನಿಂತೆಂದನು: ಣಾ-ಡಾಗ್‌ ನಾ-ದಾಗ್‌ ವ್ಯತ್ಯಾಸ್ವನ್ನ ತೋರಿಸ್‌ ಚೆನ್ನಾಗ್‌ ಹೇಳ್ಕೊಟ್ರಿ । ಬೇರೇದ್‌ ಕೇಳೊಕ್ಕಿನೊಂದ್‌ ದಿವ್ಸ ಬಾರೋಂತಂದ್ಬಿಟ್‌ ಕಳ್ಸ್ಕೊಟ್ರಿ ।। ಹಾಗೇ ಮತ್ತೆರಡಕ್ಷರ್ಗಳ್ಗೂ ವ್ಯತ್ಯಾಸಾನ್‌ ನೀವ್‌ ಹೇಳ್ಕೊಟ್ರೆ । ಮತ್ತಷ್ಟ್‌ ಕಲ್ತ್ಕೊಂಡ್‌ ಹೋಗ್ಬಿಡ್ತೀನಿ ದಯವಿಟ್‌ ಹೇಳ್ತೀರಾ ಮೇಷ್ಟ್ರೇ ।। ಗುರುವಿಂತೆಂದನು: ನೀ ಕೇಳಿ ಕಲಿಯುತಿರಲೆನಗೆ ಸಂತಸವಯ್ಯ ಮತ್ತಷ್ಟು ಪದಗಳನು ಕೇಳ ಬಾರಯ್ಯ । ಣಡಗಳಿಗು ನದಗಳಿಗು ಭೇದವನು ಕಲಿತೆ ಮಬಗಳೊಳು ಭೇದವನು ನೀನಿಂದು ಕಲಿವೆ ।। ಆಡುತಲೋಡುತ ಬೀಳುತ ಕೂಗುತ ರೋದಿಸೆ ಮಗ ‘’ಹಾ! ಅಮ್ಮಮ್ಮಾ!!’’। ನೋಡುತಲಮ್ಮನು ಹೇಳಿದಳೈ ‘ಮರಿ! ಏಕಿಷ್ಟಬ್ಬರ? ಅಬ್ಬಬ್ಬಾ!!’ ।। ಮಾವಿನ ತೋಟದೊಳೇರುತಲಿದೆ ಘಮ ಕಾಯ್ಗಳು ಹಣ್ಣಾಗಿರೆ ಮಾಗಿ । ಸಾವಿರ ಹಣ್ಗಳ ಭಾರದಿ ಕೊಂಬೆಗಳ್‌ ಆಹ್ವಾನಿಸುತಿವೆ ತಲೆಬಾಗಿ* ।। ಮಾಡಲು ಜಳಕವ ನದಿಗೆ ಹೋಗುವೆಯ? ಹೇಳುವೆ ಕೇಳೆನ್ನೀ ಮಾತ । ‘‘ನೋಡುವೆ ಬಾನಲಿ ಹಾರುತ ನೀರಲಿ ಧುಮುಕಿ ಮೀನ ಹಿಡಿಯುವ ಬಾತ’’ ।। ನಂದತನಯ ಗೋವಿಂದಮುಕುಂದನ ನೆನೆಯಲಿ ನಿತ್ಯವು ನಿನ್ನ ಮನ । ಬೃಂದಾವನವೇ ಗೋಪಿವೃಂದದೊಡನಾಡಲು ಕೃಷ್ಣನಿಗಿರುವ ಬನ ।। ಮಳೆಯು ಸಕಾಲದಿ ಸುರಿಯುತ ಬಂದರೆ ಬೆಳೆಯುತ ಹಿರಿದಾಗುವುದು ಮರ । ಕಳೆಯೂ ಬೆಳೆಯದು ಮಳೆಯೇ ಬರದಿರಲಂತಹ ಕಾಲದೊಳಿಹುದು ಬರ ।। ತಾತನ ತಾತನ ಕಾಲದಾಸ್ತಿಯಿಹುದದನವನೆಂದೆಂದಿಗು ಮಾರ । ‘‘ಮಾತನಾಡುವುದಕಾದರು ಬೆಲೆಯನು ಪೇಳಲು ಬಾ’’ ಎಂದರು ಬಾರ ।। ಹಣವಂತರು ಬೆಲೆ ಕೇಳುವುದಿಲ್ಲವು ಕೊಳ್ವುದಕಂಗಡಿಯಾಳು ಮಾಲ । ಹನುಮಂತಗೆ ಸರಿ ಸಾಧನವಾಯಿತು ಲಂಕಾದಹನಕೆ ಹಿರಿಬಾಲ ।। ಸಾತ್ವಿಕ ರಾಜಸ ತಾಮಸ ಗುಣಗಳು; ಸಾತ್ವಿಕಗುಣವೇ ನಿರ್ಮಲವು । ರಾಜಸಗುಣದಲಿ ಕೋಪದ ಹೆಚ್ಚಳ, ತಾಮಸದಲಿ ಮನ ನಿರ್ಬಲವು ।। ತಂದೆತಾಯಿಗಳ ಗುರುಗಳ ಭಕ್ತನು ಹಿರಿಯರ ಮಾತನ್ನವ ಮೀರ । ವಂದಿಸಿ ನಿತ್ಯವು ದೇವರಿಗರ್ಪಣೆ ಮಾಡಿಯೆ ತಿನ್ನುವನೈ ಬೀರ** ।। ಬೆಂಗಳೂರ ಬಳಿ ಯಾತ್ರಿಕರೇರುತ ತಂಪನು ಪಡೆಯಲು ನಂದಿ ಮಲೆ ಮಂಗಳೂರ ಬಳಿ ಸಾಗರದಲ್ಲಿದೆ ಬೆಸ್ತರು ಮೀನ್ಗಳು ಹಿಡಿಯೆ ಬಲೆ ।। ಓದು ಬರಹಗಳ ಕಲಿವುದು ಕಷ್ಟವು ಬುದ್ಧಿಯಾತನದು ಬಲು ಮಂದ । ಆದರು ಸರಸತಿಸೇವೆಯ ಸಲಿಸುತಲೇಳಿಗೆ ಪಡೆಯುತಲವ ಬಂದ ।। ಸಾರ್ವಜನಿಕರಿರುವೆಡೆಯಲಿ ತೆಗಳಿರಲಾತನಿಗಾಗಿತ್ತವಮಾನ । ಹಾರುವ ವಾಹನವೇರುತ ಸೇರಿದನಾತನು ದೇಶವ ಬಿಡೆ ಬಾನ ।। ಗಾನವಿಶಾರದ ಪಕ್ಕವಾದ್ಯಗಳ ಕೂಡಿಸಿ ವೇದಿಕೆಯ ಮೇಗಡೆ । ವರ್ಣವ ಹಾಡೆ ಕಚೇರಿಯ ಮೊದಲಲಿ ಬಳಸಿದ ರಾಗವು ಬೇಗಡೆ ।। ದೂರದಿ ವಾಸವ ಮಾಡಲು ಹೊರಟಿಹ ಮಗನಿಗೆ ಪೇಳ್ದಳು ‘‘ಎಲವೊ! ಮರಿ!’’ । ‘‘ವಾರವಾರವೂ ಯೋಗಕ್ಷೇಮವ ತಿಳಿಸಲು ಕಾಗದಗಳನು ಬರಿ’’ ।। ಎಲ್ಲ ದೇಶಗಳೊಳಿರುವರು ಭೂಮಿಗೆ ಭಾರವ ತರುತಿಹ ಬಲು ಮಂದಿ । ಕೊಲ್ಲುವ ಕಾಡುವ ಕದಿಯುವ ಕೆಲವರನಾಗಿಸಬೇಕಲ್ಲವೆ ಬಂದಿ ।। ಇಂತು ತೋರಿಹೆ ನಾನೀಗ ಮಬಗಳ್ಗಿರ್ಪ ಭೇದವಂ । ಅನುನಾಸಿಕಗಳ್ಬಗ್ಗೆ ಇಷ್ಟು ಪಾಠವೆ ಸಾಕೆಲೋ ।। * ‘‘ಭವಂತಿ ನಮ್ರಾಃ ತರವಃ ಫಲೋದ್ಗಮೈಃ’’ ಎಂದು ಸಂಸೃತ ಸುಭಾಷಿತದಲ್ಲಿರುವಂತ **ಬೀರ ಎನ್ನುವ ಪದ ಇಲ್ಲಿ ಪ್ರಥಮಾವಿಭಕ್ತಿಯ ನಾಮಪದ. ಕುಡಿಯುವ ಪದಾರ್ಥದ (beerಇನ) ದ್ವಿತೀಯಾವಿಭಕ್ತಿಯಲ್ಲ. ಅದರ ಸರಿಯಾದ ಉಚ್ಚಾರಣೆ ಬಿಯರ್‌ ಅಥವಾ ಬಿಅರ್‌, ಎಂದು. ಅನೇಕರು ಅದನ್ನು ಬೀರ್‌ ಎಂದೇ ಉಚ್ಚರಿಸುವುದರಿಂದ ಈ ಪದ್ಯವನ್ನು ‘ಕುಡಿಯುವನೈ ಬೀರ’ ಎಂದೂ ಮಾಡಿಕೊಳ್ಳಬಹುದು.) Post your views

ಮುಖಪುಟ / ಎನ್‌ಆರ್‌ಐ