Get Updates
Get notified of breaking news, exclusive insights, and must-see stories!

ವಾಷಿಂಗ್ಟನಿನಲ್ಲಿ ನೋಡವ್ವ ತಂಗಿ ಕೋಡಗನ ಕೋಳಿ ನುಂಗಿತ್ತಾ

Raghu Dixit in Washington DC, America
ವಾಷಿಂಗ್ಟನ್, ಮಾ. 5 : ಬಣ್ಣದ ಲುಂಗಿಯ ಉಡುಗೆ. ಕೈಯಲ್ಲೊಂದು ಗಿಟಾರ್. ಜತೆಯಲ್ಲಿನ ಮೂವರು ಸಹಕಲಾವಿದರದೂ ಅದೇ ವೇಷಭೂಷಣ. ಕನ್ನಡದ ಹೆಮ್ಮೆಯ ಹುಡುಗ ರಘು ದೀಕ್ಷಿತ್ ಶಿಶುನಾಳ ಶರೀಫರ ಪದವನ್ನು ಕುಣಿಕುಣಿದಾಡುತ್ತಲೇ ಹಾಡಿದಾಗ ಕೆನಡಿ ಸೆಂಟರ್‌ನ ಮಿಲೆನಿಯಂ ಸಭಾಂಗಣ ಅಕ್ಷರಶಃ ಹುಚ್ಚೆದ್ದು ಕುಣಿಯಿತು. ಪ್ರಪಂಚದ ಘಟಾನುಘಟಿ ಕಲಾವಿದರ ಅಪ್ರತಿಮ ಕಲಾಪ್ರದರ್ಶನಗಳಿಗೆ ಸಾಕ್ಷಿಯಾಗಿರುವ ಇಲ್ಲಿನ ಕೆನಡಿ ಸೆಂಟರ್ ಫಾರ್ ಪರ್ಫಾರ್ಮಿಂಗ್ ಆರ್ಟ್ಸ್'ನಲ್ಲಿ ಪ್ರಾಯಶಃ ಕನ್ನಡದ ಧ್ವನಿ ಮೊಳಗಿದ್ದು ಇದೇ ಮೊದಲು.

ಮಾರ್ಚ್ 1ರಿಂದ 20ರವರೆಗೆ ಕೆನಡಿ ಸೆಂಟರ್‌ನಲ್ಲಿ ನಡೆಯುತ್ತಿರುವ ಮ್ಯಾಕ್ಸಿಮಮ್ ಇಂಡಿಯಾ' ಸಾಂಸ್ಕೃತಿಕ ಹಬ್ಬದಲ್ಲಿ ಶುಕ್ರವಾರ (ಮಾರ್ಚ್ 4) ಸಂಜೆಯ ಪ್ರಧಾನ ಆಕರ್ಷಣೆ ರಘು ದೀಕ್ಷಿತ್ ಬಳಗದ ಸಂಗೀತ ಕಾರ್ಯಕ್ರಮ. ಬ್ಲೂಸ್, ರಾಕ್, ಸೂಫಿ, ಭಾಂಗ್ರಾ, ಲ್ಯಾಟಿನ್, ಕರ್ನಾಟಿಕ್ ಹೀಗೆ ಗಾಯನಕಲೆಯಲ್ಲೇ ಗ್ಲೋಬಲ್ ಟಚ್ ತೋರಿಸಬಲ್ಲ ರಘು ದೀಕ್ಷಿತ್ ಕಾರ್ಯಕ್ರಮಕ್ಕೆ ಸಭಾಂಗಣ ಹೌಸ್‌ಫುಲ್. ಕನ್ನಡಿಗರು ಮತ್ತು ಭಾರತೀಯರಷ್ಟೇ ಅಲ್ಲದೇ ಕಲಾರಸಿಕ ಅಮೆರಿಕನ್ ಪ್ರಜೆಗಳೂ ಬಹಳ ಸಂಖ್ಯೆಯಲ್ಲಿ ಬಂದಿದ್ದರು.

ಒಟ್ಟು ಒಂದು ಗಂಟೆ ಅವಧಿಯ ಕಾರ್ಯಕ್ರಮದಲ್ಲಿ ರಘು ದೀಕ್ಷಿತ್ ಹಿಂದಿ ಮತ್ತು ಇಂಗ್ಲಿಷ್ ಹಾಡುಗಳ ಜತೆಗೇ ದ ನೆಕ್ಸ್ಟ್ ಸಾಂಗ್ ಇಸ್ ಇನ್ ಮೈ ಮದರ್‌ಟಂಗ್ ಕನ್ನಡ' ಎಂದು ಉದ್ಘೋಷಿಸಿ, ಶಿಶುನಾಳ ಶರೀಫರ ಪದಗಳ ಶ್ರೇಷ್ಠತೆಯನ್ನು ಚುಟುಕಾಗಿ ವಿವರಿಸಿ, ಗುಡುಗುಡಿಯ ಸೇದಿ ನೋಡೊ' ಮತ್ತು ಕೋಡಗನ ಕೋಳಿ ನುಂಗಿತ್ತಾ' ಹಾಡಿದರು. ಇಲ್ಲಿ ಹಾಡಲು ಬಂದ ಪಾತರದವಳ ಮದ್ದಳೆ ನುಂಗಿತು ಎಂದಾಗಲಿಲ್ಲ. ಹಾಡಲು ಬಂದ ರಘು ದೀಕ್ಷಿತ್‌ನನ್ನು ವಾಷಿಂಗ್ಟನ್ನಿಗರ ಚಪ್ಪಾಳೆಯ ಹರ್ಷೋದ್ಗಾರವೇ ನುಂಗಿತು ಎನ್ನುವಂತಾಯ್ತು.

ಮ್ಯಾಕ್ಸಿಮಮ್ ಇಂಡಿಯಾ' ಉತ್ಸವದಲ್ಲಿ ಭಾರತದಿಂದ ವಿಶೇಷವಾಗಿ ಆಹ್ವಾನಿತರಾಗಿ ಬಂದಿರುವ ನೂರಾರು ಕಲಾವಿದರು ವಿವಿಧ ನೃತ್ಯ, ಸಂಗೀತ, ನಾಟಕ, ಮತ್ತಿತರ ಕಲಾಪ್ರದರ್ಶನಗಳನ್ನು ನೀಡುತ್ತಿದ್ದಾರೆ. ವಜ್ರ ಮತ್ತು ಚಿನ್ನದ ಆಭರಣಗಳು, ರೇಷ್ಮೆಸೀರೆಗಳು ಮತ್ತು ಕರಕುಶಲ ಸಾಮಗ್ರಿಗಳ ಪ್ರದರ್ಶನ ಮತ್ತು ಮಾರಾಟ ಮಳಿಗೆಗಳಿವೆ. ಉತ್ಸವಕ್ಕಾಗಿಯೇ ಭಾರತದಿಂದ ಬಂದಿರುವ ಪಂಚತಾರಾ ಬಾಣಸಿಗ ಹೇಮಂತ್ ಒಬೆರಾಯ್ ಇಲ್ಲಿನವರಿಗೆ ಭಾರತೀಯ ಖಾದ್ಯಗಳ ಸವಿಯುಣ್ಣಿಸುತ್ತಿದ್ದಾರೆ.

ದಿಲ್ಲಿಯ ಇಂಡಿಯನ್ ಕೌನ್ಸಿಲ್ ಫಾರ್ ಕಲ್ಚರಲ್ ರಿಲೇಷನ್ಸ್ ಮತ್ತು ವಾಷಿಂಗ್ಟನ್‌ನಲ್ಲಿರುವ ಭಾರತೀಯ ದೂತಾವಾಸಗಳ ಸಹಯೋಗದಲ್ಲಿ ನಡೆಯುತ್ತಿರುವ ಈ ಸಾಂಸ್ಕೃತಿಕ ಉತ್ಸವ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಅಮೆರಿಕ ದೇಶದಲ್ಲಿ ನಡೆಯುತ್ತಿರುವುದು ಅಭೂತಪೂರ್ವ ಎನ್ನಲಾಗಿದೆ. ವಾಷಿಂಗ್ಟನ್ ಪೋಸ್ಟ್ ದಿನಪತ್ರಿಕೆಯೂ ಸೇರಿದಂತೆ ಅಮೆರಿಕದ ಮಾಧ್ಯಮಗಳು ಈ ಸಾಂಸ್ಕೃತಿಕ ಹಬ್ಬಕ್ಕೆ ಸಾಕಷ್ಟು ಪ್ರಚಾರ ಕೊಟ್ಟಿವೆ, ಕಲಾಪ್ರದರ್ಶನಗಳನ್ನು ಮುಕ್ತಕಂಠದಿಂದ ಪ್ರಶಂಸಿಸುತ್ತ ವಿಮರ್ಶೆಗಳನ್ನೂ ಪ್ರಕಟಿಸುತ್ತಿವೆ. ಒಟ್ಟಿನಲ್ಲಿ ಈಗ ವಾಷಿಂಗ್ಟನ್‌ನಲ್ಲಿ ಪರಮಾವಧಿ ಭಾರತ' ಮೇಳೈಸಿದೆ. ಭಾರತೀಯ ಕಲೆ ಮತ್ತು ಸಂಸ್ಕೃತಿಯ ಹಿತವಾದ ಗಾಳಿ ಬೀಸುತ್ತಿದೆ.

More From
Prev
Next
Notifications
Settings
Clear Notifications
Notifications
Use the toggle to switch on notifications
  • Block for 8 hours
  • Block for 12 hours
  • Block for 24 hours
  • Don't block
Gender
Select your Gender
  • Male
  • Female
  • Others
Age
Select your Age Range
  • Under 18
  • 18 to 25
  • 26 to 35
  • 36 to 45
  • 45 to 55
  • 55+