ಅಹ್ಮದಾಬಾದ್‌ ಕನ್ನಡ ಸಂಘದಿಂದ ಎಸ್ಸೆಂ ಕೃಷ್ಣಗೆ ಸನ್ಮಾನ

ಅಹ್ಮದಾಬಾದ್‌: ಕರ್ನಾಟಕದ ಹೊರಗಡೆ ಇರುವ ಕನ್ನಡಿಗರಿಗೆ ಹೊರನಾಡ ಕನ್ನಡಿಗರ ನಿಧಿಯಾಂದನ್ನು ಸ್ಥಾಪಿಸಲು ಮುಖ್ಯಮಂತ್ರಿ ಎಸ್‌. ಎಂ. ಕೃಷ್ಣ ತಾತ್ವಿಕವಾಗಿ ಒಪ್ಪಿಕೊಂಡಿದ್ದಾರೆ.

ಅಹ್ಮದಾಬಾದ್‌ನ ಕರ್ನಾಟಕ ಸಂಘವು ಶನಿವಾರ (ಡಿ.7) ಏರ್ಪಡಿಸಿದ್ದ ಸನ್ಮಾನ ಸಮಾರಂಭದಲ್ಲಿ ಸನ್ಮಾನ ಸ್ವೀಕರಿಸಿದ ನಂತರ ಅಲ್ಲಿನ ಕನ್ನಡಿಗರನ್ನುದ್ದೇಶಿಸಿ ಮುಖ್ಯಮಂತ್ರಿ ಕೃಷ್ಣ ಮಾತನಾಡಿದರು. ಹೊರನಾಡಿನಲ್ಲಿ ಕನ್ನಡ ಭವನಗಳನ್ನು ಸ್ಥಾಪಿಸುವುದಿದ್ದರೆ ಜಾಗ ಸ್ವಾಧೀನಪಡಿಸಿಕೊಳ್ಳಲು ನೆರವು ನೀಡಲಾಗುವುದು. ಅಲ್ಲದೆ ಹೊರನಾಡಿನ ಕನ್ನಡಿಗರ ಮಕ್ಕಳ ವಿದ್ಯಾಭ್ಯಾಸಕ್ಕೆ ನೆರವಾಗುವಂತೆ ವಿದ್ಯಾರ್ಥಿ ವೇತನಗಳನ್ನೂ ಆರಂಭಿಸುವುದಾಗಿಯೂ ಆಶ್ವಾಸನೆ ಇತ್ತರು.

ಗುಜರಾತ್‌ ಭೂಕಂಪ ಪರಿಹಾರ ನಿಧಿಗಾಗಿ ಕರ್ನಾಟಕ ಸರಕಾರವು ಸಂಗ್ರಹಿಸಿರುವ 30 ಕೋಟಿ ರೂಪಾಯಿಗಳನ್ನು ಪಡೆಯಲು ಗುಜರಾತ್‌ ಸರಕಾರ ಇನ್ನೂ ಮುಂದೆ ಬಂದಿಲ್ಲ ಎಂದು ಬೇಜಾರು ಮಾಡಿಕೊಂಡ ಕೃಷ್ಣ ಹಣವನ್ನಂತೂ ಗುಜರಾತ್‌ ಸರಕಾರಕ್ಕೆ ನೀಡಲಾಗುವುದು. ಆದರೆ ಅದು ಕಾಂಗ್ರೆಸ್‌ ಸರಕಾರಕ್ಕೇ ತಲುಪುವ ಹಾಗಾದರೆ ಒಳ್ಳೆಯದು ಎಂದು ತಮ್ಮ ಕಾಂಗ್ರೆಸ್‌ ಪ್ರೀತಿಯನ್ನು ತೋರಿದರು. ಕೊನೆಯದಾಗಿ, ಗುಜರಾತ್‌ನಲ್ಲಿರುವ ಎರಡು ಸಾವಿರಕ್ಕೂ ಹೆಚ್ಚು ಮಂದಿ ಕನ್ನಡಿಗರು ಕಾಂಗ್ರೆಸ್‌ಗೆ ಮತ ಹಾಕಬೇಕು ಎಂದು ಮನವಿ ಮಾಡುತ್ತಾ ಕೃಷ್ಣ ಮಾತು ಮುಗಿಸಿದರು.

ಕಾರ್ಯಕ್ರಮದಲ್ಲಿ ಕೃಷ್ಣ ಜೊತೆಗೆ ಕಾಂಗ್ರೆಸ್‌ನ ಡಿ.ಕೆ. ಶಿವಕುಮಾರ್‌, ಟಿ. ಬಿ. ಜಯಚಂದ್ರ, ಸಲೀಂ ಅಹ್ಮದ್‌ ಮತ್ತಿತರರು ಭಾಗವಹಿಸಿದ್ದರು.

(ಇನ್ಫೋ ವಾರ್ತೆ)