RCB: ಅವರಿಂದಲೇ ನನ್ನ ಬ್ಯಾಟಿಂಗ್ ಸಾಕಷ್ಟು ಸುಧಾರಿಸಿದೆ ಎಂದ ಆರ್ಸಿಬಿ ಸ್ಟಾರ್ ಆಟಗಾರ
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವಿಕೆಟ್ ಕೀಪರ್-ಬ್ಯಾಟರ್ ಜಿತೇಶ್ ಶರ್ಮಾ, ಐಪಿಎಲ್ 2025 ರ ಆವೃತ್ತಿಯಲ್ಲಿ ಅವಕಾಶ ಸಿಕ್ಕಾಗ ಉತ್ತಮ ಪ್ರದರ್ಶನ ನೀಡಿದ್ದಾರೆ. ದಿನೇಶ್ ಕಾರ್ತಿಕ್ ಅವರಂತೆ ಫಿನಿಷರ್ ಆಗಿ ಆಡಲು ಜಿತೇಶ್ ಶರ್ಮಾ ಅವರನ್ನು ಸಿದ್ಧಪಡಿಸಲಾಗುತ್ತಿದೆ. ಆರ್ ಸಿಬಿ ಜೊತೆಗಿನ ಒಡನಾಟದ ಬಗ್ಗೆ ಮಾತನಾಡಿರುವ ಅವರು ಮೆಂಟರ್ ಮತ್ತು ಬ್ಯಾಟಿಂಗ್ ಕೋಚ್ ದಿನೇಶ್ ಕಾರ್ತಿಕ್ ಅವರನ್ನು ಹಾಡಿ ಹೊಗಳಿದ್ದಾರೆ.
ಕಳೆದ ಮೂರು ವರ್ಷಗಳಿಂದ ಪಂಜಾಬ್ ಕಿಂಗ್ಸ್ ಪರವಾಗಿ ಉತ್ತಮ ಪ್ರದರ್ಶನ ನೀಡಿದ ಬಳಿಕ ಜಿತೇಶ್ ಶರ್ಮಾ ಅವರನ್ನು ಮೆಗಾ ಹರಾಜಿನಲ್ಲಿ ಆರ್ ಸಿಬಿ 11 ಕೋಟಿ ರೂಪಾಯಿಗೆ ಖರೀದಿ ಮಾಡಿತು. ಜಿತೇಶ್ ಶರ್ಮಾ ಅವರಿಗೆ ಆರ್ ಸಿಬಿ ತಂಡಕ್ಕಾಗಿ ಬ್ಯಾಟಿಂಗ್ ಮಾಡಲು ಹೆಚ್ಚಿನ ಅವಕಾಶ ಸಿಕ್ಕಿಲ್ಲದೇ ಇದ್ದರೂ ಸಿಕ್ಕ ಅವಕಾಶಗಳಲ್ಲಿ ಗಮನಾರ್ಹ ಪ್ರದರ್ಶನ ನೀಡಿದ್ದಾರೆ. ದಿನೇಶ್ ಕಾರ್ತಿಕ್ ತನ್ನ ಮೇಲೆ ಹೇಗೆ ಪ್ರಭಾವ ಬೀರಿದ್ದಾರೆ ಎನ್ನುವುದನ್ನು ಹೇಳಿರುವ ಜಿತೇಶ್ ಶರ್ಮಾ ಅವರ ಬ್ಯಾಟಿಂಗ್ ಫಾರ್ಮ್ಗೆ ಡಿಕೆ ಕೊಟ್ಟಿರುವ ಕೊಡುಗೆಯನ್ನು ಹೊಗಳಿದ್ದಾರೆ.
ಕಂಫರ್ಟ್ ಝೋನ್ನಿಂದ ಹೊರಬಂದೆ
ದಿನೇಶ್ ಕಾರ್ತಿಕ್ ನನ್ನನ್ನು ನನ್ನ ಕಂಫರ್ಟ್ ಝೋನ್ನಿಂದ ಹೊರಗೆಳೆದಿದ್ದಾರೆ ಮತ್ತು ನಾನು ಹಿಂದೆಂದೂ ಇಲ್ಲದ ಹೊಸ ಮನಸ್ಥಿತ ಬೆಳೆಸಿಕೊಳ್ಳುವಂತೆ ಮಾಡಿದ್ದಾರೆ. ಹಿಂದಿನ ಕೋಚ್ಗಳು ನೇರವಾಗಿ ಆಡು, ಆ ರೀತಿ ಮಾತ್ರ ಆಡು ಎಂದು ಹೇಳಿದ್ದರಿಂದ ಹೊಸದಾಗಿ ಏನೂ ಕಲಿಯಲು ಕೆಲಸ ಮಾಡಲಿಲ್ಲ. ಲಾಂಗ್ ಆನ್ ಮತ್ತು ಲಾಂಗ್ ಆಫ್ನಲ್ಲಿ ಸಿಕ್ಸರ್ ಬಾರಿಸುವುದು ನನ್ನ ಶಕ್ತಿ ಎನ್ನುವುದು ನಿಜ ಆದರೆ ನಾನು ಯಾವಾಗಲೂ ಇನ್ನಷ್ಟು ಕಲಿಯಲು ಬಯಸುತ್ತೇನೆ ಎಂದರು.
ಯಾರಾದರೂ ಕಲಿಸುತ್ತಿದ್ದರೆ ಮತ್ತು ನಾನು ಹೊಸ ಕೌಶಲ್ಯವನ್ನು ಹೊಂದಬಹುದು, ದಿನೇಶ್ ಕಾರ್ತಿಕ್ ನನ್ನ ಸ್ವಾಭಾವಿಕ ಕೈ ಚಲನೆಯನ್ನು ಬಳಸಲು ಹೇಳಿದರು ಮತ್ತು ವಿಭಿನ್ನ ಹೊಡೆಗಳನ್ನು ಆಡಲು ಪ್ರೋತ್ಸಾಹಿಸಿದರು. ಅದಕ್ಕಾಗಿಯೇ ನನ್ನನ್ನು ಆಯ್ಕೆ ಮಾಡಿದ್ದಾಗಿ ಹೇಳಿದರು. ನನ್ನಲ್ಲಿ ಏನೋ ಸಾಮರ್ಥ್ಯವಿದೆ ಎಂದು ದಿನೇಶ್ ಕಾರ್ತಿಕ್ ಗುರುತಿಸಿದರು. ಈಗ ಹೊಸ ಶೈಲಿಯ ಹೊಡೆತಗಳನ್ನು ಕಲಿಯುತ್ತಿದ್ದೇನೆ, ಇದು ಕೇವಲ ಆರಂಭ ಎಂದು ಜಿಯೋಹಾಟ್ಸ್ಟಾರ್ನ "ಜೆನ್ ಬೋಲ್ಡ್" ಸರಣಿಯಲ್ಲಿ ಹೇಳಿದ್ದಾರೆ.
ನಾನು ನಿಜವಾಗಿಯೂ ನನಗೆ ಕಲಿಸುವಂತಹ ವ್ಯಕ್ತಿಯನ್ನು ಕಂಡುಕೊಂಡಿದ್ದೇನೆ. ನಾನು ಕಲಿಯಲು ಆಸಕ್ತಿ ಹೊಂದಿದ್ದೇನೆ, ಅವರು ನನಗೆ ಕಲಿಸಲು ಉತ್ಸಾಹ ಹೊಂದಿದ್ದಾರೆ. ನಮ್ಮಿಬ್ಬರಿಗೂ ಹೊಂದಿಕೆಯಾಗುತ್ತದೆ. ನನ್ನಂತೆಯೇ ಇರುವ ವ್ಯಕ್ತಿ ದಿನೇಶ್ ಕಾರ್ತಿಕ್ ಅಣ್ಣಾ, ನಾನು ಸ್ಥಿರವಾಗಿರಲು ಅವರು ಕೂಡ ದೊಡ್ಡ ಕಾರಣ. ಅವರು ಭಾರತೀಯ ತಂಡ ಮತ್ತು ಐಪಿಎಲ್ನಲ್ಲಿಯೂ ಸಹ ಅದೇ ಪಾತ್ರವನ್ನು ನಿರ್ವಹಿಸಿದ್ದಾರೆ. ಅವರು ನಾನು ಯೋಚಿಸುವ ರೀತಿಯನ್ನು, ನನ್ನ ಆಟವನ್ನು ಅರ್ಥಮಾಡಿಕೊಳ್ಳುತ್ತಾರೆ ಮತ್ತು ಅವರು ಏನನ್ನು ತಿಳಿಸಲು ಪ್ರಯತ್ನಿಸುತ್ತಿದ್ದಾರೆಂದು ನನಗೆ ಅರ್ಥವಾಗಿದೆ ಎಂದರು.
ಈ ಮೊದಲು ಯಾರೊಂದಿಗೂ ನಾನು ಇಷ್ಟೊಂದು ಮಾತನಾಡಿಲ್ಲ, ಯಾಕೆಂದರೆ 6ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವ ಸಾಕಷ್ಟು ಆಟಗಾರರು ಯಶಸ್ಸು ಕಂಡುಕೊಂಡಿಲ್ಲ. ಹಾಗೆ ಮಾಡಿದವರು ಚೆನ್ನೈ ಸೂಪರ್ ಕಿಂಗ್ಸ್ ಅಥವಾ ಇತರ ದೊಡ್ಡ ಫ್ರಾಂಚೈಸಿಗಳಂತಹ ತಂಡಗಳಿಗೆ ಆಡುತ್ತಿದ್ದಾರೆ. ಆದರೆ ಈಗ, ನಾನು ಪ್ರತಿದಿನ ದಿನೇಶ್ ಕಾರ್ತಿಕ್ ಜೊತೆ ಸಂವಹನ ನಡೆಸುತ್ತೇನೆ. ವಿಕೆಟ್ಕೀಪರ್-ಬ್ಯಾಟರ್ ಆಗಿರುವುದರಿಂದ, ಅವರು ನನ್ನನ್ನು ಅರ್ಥಮಾಡಿಕೊಳ್ಳುತ್ತಾರೆ ಮತ್ತು ಅವರು ಏನನ್ನು ನಿರೀಕ್ಷಿಸುತ್ತಾರೆ ಎಂಬುದನ್ನು ನಾನು ಅರ್ಥಮಾಡಿಕೊಂಡಿದ್ದೇನೆ. ನನಗೆ ಇಲ್ಲಿ ಹೆಚ್ಚಿನ ಸ್ವಾತಂತ್ರ್ಯ ಸಿಕ್ಕಿದೆ. ನನ್ನ ಹಿಂದಿನ ತಂಡದಲ್ಲಿಯೂ ನನಗೆ ಅದು ಸಿಕ್ಕಿತು, ಆದರೆ ಈಗ ನಾನು ಹೊಸ ವಿಷಯಗಳನ್ನು ಕಲಿಯುತ್ತಿದ್ದೇನೆ ಎಂದಿದ್ದಾರೆ.
Click it and Unblock the Notifications
Sign in with Google