ದೆಹಲಿಯಲ್ಲಿ ಐಟಿ ದಾಳಿ, 3.25 ಕೋಟಿ ರು ವಶ!
ನವದೆಹಲಿ, ಡಿಸೆಂಬರ್ 14: ಇಲ್ಲಿನ ಕರೋಲ್ ಭಾಗ್ ಪ್ರದೇಶದ ಹೋಟೆಲೊಂದರ ಮೇಲೆ ಜಂಟಿ ಕಾರ್ಯಾಚರಣೆ ನಡೆಸಿದ ದೆಹಲಿ ಪೊಲೆಸರು ಹಾಗೂ ಐಟಿ ಇಲಾಖೆ ಅಧಿಕಾರಿಗಳು ಅಪಾರ ಪ್ರಮಾಣದ ಹಳೆ ನೋಟುಗಳನ್ನು ವಶಪಡಿಸಿಕೊಂಡಿದ್ದಾರೆ.
ಕರೋಲ್ ಭಾಗ್ ಪ್ರದೇಶದ ಚೆನ್ನೈ ಮಾರ್ಕೆಟ್ ನಲ್ಲಿ ಹೋಟೆಲ್ ತಕ್ಷ್ ನ 202 ಹಾಗೂ 206 ರೂಮಿನ ಮೇಲೆ ದಾಳಿ ನಡೆಸಿ ಹಳೆಯ 500 ಮತ್ತು 1000 ರೂ. ಮುಖಬೆಲೆಯ 3.25 ಕೋಟಿ ರೂ. ನೋಟುಗಳನ್ನು ವಶ ಪಡಿಸಿಕೊಂಡು,, ಐವರನ್ನು ಬಂಧಿಸಲಾಗಿದೆ.
ಮಂಗಳವಾರ ರಾತ್ರಿ ನಡೆದ ಈ ಕಾರ್ಯಾಚರಣೆಯಲ್ಲಿ ಬಂಧಿತರಾದವರು ಮುಂಬೈ ಮೂಲದ ಹವಾಲಾ ಆಪರೇಟರ್ ಗಳು ಎಂದು ತಿಳಿದು ಬಂದಿದೆ. ವಿಶೇಷವಾಗಿ ಸೂಟ್ ಕೇಸ್ ಹಾಗೂ ಟೇಪುಗಳನ್ನು ಬಳಸಿ ಈ ನೋಟುಗಳನ್ನು ಪ್ಯಾಕ್ ಮಾಡಲಾಗಿತ್ತು. ಇದು ವಿಮಾನ ನಿಲ್ದಾಣದ ಸ್ಕ್ಯಾನಿಂಗ್ ಮಷಿನ್ ಗೂ ತಿಳಿಯದಂತೆ ಸೂಕ್ಷ್ಮವಾಗಿ ಪ್ಯಾಕಿಂಗ್ ಮಾಡಿದ್ದರು.
ಬಂಧಿತರನ್ನು ಅನ್ಸಾರಿ ಅಬುಜಾರ್, ಫಜಲ್ ಖಾನ್, ಅನ್ಸಾರಿ ಅಫಾನ್, ಲಾಡೂ ರಾಮ್ ಹಾಗೂ ಮಹವೀರ್ ಸಿಂಗ್ ಎಂದು ಗುರುತಿಸಲಾಗಿದೆ. ಮಹವೀರ್ ಹಾಗೂ ರಾಮ್ ಇಬ್ಬರು ರಾಜಸ್ಥಾನದವರಾಗಿದ್ದು, ಉಳಿದವರು ಮುಂಬೈ ಮೂಲದವರಾಗಿದ್ದಾರೆ.