3 ಕ್ಷೇತ್ರಕ್ಕೆ ಲೋಕಸಭಾ ಚುನಾವಣೆ ದಿನಾಂಕ ಬದಲಾಯ್ತು
ಈ ಸಂಬಂಧ ಇದೀಗತಾನೆ ಪ್ರಕಟಣೆ ಹೊರಡಿಸಿರುವ ಮುಖ್ಯ ಚುನಾವಣಾ ಆಯೋಗವು ಬದಲಾದ ವೇಳಾಪಟ್ಟಿಯಂತೆ ಗೋವಾದ 2 ಲೋಕಸಭಾ ಕ್ಷೇತ್ರಗಳಿಗೆ ಏಪ್ರಿಲ್ 12 (ಶನಿವಾರ) ಚುನಾವಣೆ ನಡೆಯಲಿದೆ ಎಂದು ತಿಳಿಸಿದೆ. ಈ ಹಿಂದೆ ಇಲ್ಲಿ ಏಪ್ರಿಲ್ 17 ಮತದಾನ ನಿಗದಿಪಡಿಸಲಾಗಿತ್ತು.
ಅದೇ ರೀತಿ ಜಾರ್ಖಂಡಿನ ಹಜಾರಿಬಾಗ್ ಲೋಕಸಭಾ ಕ್ಷೇತ್ರದ ಚುನಾವಣೆಯನ್ನು ಸಹ ಮುಂದೂಡಲಾಗಿದೆ. ಏಪ್ರಿಲ್ 10ರ ಬದಲು ಇದೀಗ ಏಪ್ರಿಲ್ 17 (ಗುರುವಾರ) ಕ್ಕೆ ಚುನಾವಣೆ ನಡೆಯಲಿದೆ.
ಗೋವಾದಲ್ಲಿ ಕ್ಯಾಥೋಲಿಕ್ ಸಮುದಾಯದವರು ಏಪ್ರಿಲ್ 17 ರಂದು ಗುಡ್ ಫ್ರೈಡೆಗೆ ಮುನ್ನಾ ದಿನ ಪವಿತ್ರ ಹಬ್ಬ (Maundy Thursday) ಆಚರಿಸಲಿದ್ದು, ಅಂದು ಮತದಾನ ಮಾಡುವುದಕ್ಕೆ ತೊಂದರೆಯಾಗುತ್ತದೆ. ಹಾಗಾಗಿ ಮತದಾನ ದಿನಾಂಕ ಬದಲಿಸುವಂತೆ ಚುನಾವಣಾ ಆಯೋಗದ ಮೊರೆಹೋಗಿದ್ದರು.
ಇನ್ನು ಜಾರ್ಖಂಡಿನ ಹಜಾರಿಬಾಗ್ ನಲ್ಲಿ ಏಪ್ರಿಲ್ 8 ರಿಂದ 10 ರವರೆಗೆ ಶ್ರೀರಾಮ ನವಮಿ ಆಚರಣೆಯು ವೈಭವದಿಂದ ನಡೆಯುವುದರಿಂದ ಏಪ್ರಿಲ್ 10ರಂದು ಮತ ಚಲಾಯಿಸುವುದಕ್ಕೆ ಅಡಚಣೆಯಾಗುತ್ತದೆ. ಹಾಗಾಗಿ ದಿನ ಬದಲಿಸುವಂತೆ ಆಯೋಗಕ್ಕೆ ಮನವಿ ಮಾಡಲಾಗಿತ್ತು. ಮನವಿಗೆ ಸ್ಪಂದಿಸಿರುವ ಆಯೋಗವು ಇಲ್ಲೂ ಮತದಾನ ದಿನಾಂಕವನ್ನು ಏಪ್ರಿಲ್ 17 (ಗುರುವಾರ) ಕ್ಕೆ ಮುಂದೂಡಿದೆ.