ಮಕ್ಕಳನ್ನು ಹೆರುವುದು ನೀವು, ಖರ್ಚನ್ನೇಕೆ ಸರ್ಕಾರ ಭರಿಸಬೇಕು?; ಬಿಜೆಪಿ ಶಾಸಕನ ವಿವಾದಾತ್ಮಕ ಹೇಳಿಕೆ
ಲಕ್ನೊ, ಮಾರ್ಚ್ 01: "ಮಕ್ಕಳನ್ನು ಹೆರುವುದು ನೀವು. ಆದರೆ ಸರ್ಕಾರ ಏಕೆ ಅವರ ಖರ್ಚನ್ನು ಭರಿಸಬೇಕು?" ಎಂಬ ಹೇಳಿಕೆ ನೀಡಿ ಉತ್ತರ ಪ್ರದೇಶದ ಬಿಜೆಪಿ ಶಾಸಕ ರಮೇಶ್ ದಿವಾಕರ್ ವಿವಾದ ಹುಟ್ಟುಹಾಕಿದ್ದಾರೆ.
ಭಾನುವಾರ ಇಲ್ಲಿನ ಔರಿಯಾದಲ್ಲಿ "ಜನಸುನ್ವಾಯ್" ಸಾರ್ವಜನಿಕ ಸಂವಾದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ರಮೇಶ್ ದಿವಾಕರ್, ಈ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. ತಮ್ಮ ಮಕ್ಕಳು ಖಾಸಗಿ ಶಾಲೆಯಲ್ಲಿ ಓದುತ್ತಿದ್ದು, ಅವರ ಶಿಕ್ಷಣ ವೆಚ್ಚವನ್ನು ಸರ್ಕಾರ ಭರಿಸಬೇಕು ಎಂದು ಮಹಿಳಾ ಗುಂಪೊಂದು ಕಾರ್ಯಕ್ರಮದಲ್ಲಿ ಮನವಿ ಮಾಡಿದ್ದು, ಆ ಸಂದರ್ಭ ಶಾಸಕರು ಮಹಿಳೆಯರಿಗೆ ಹೀಗೆ ಉತ್ತರಿಸಿದ್ದಾರೆ.
"ಮಕ್ಕಳನ್ನು ಹೆರುವುದು ನೀವು. ಆದರೆ ಸರ್ಕಾರ ಅವರ ಖರ್ಚನ್ನು ಭರಿಸಬೇಕೆ?" ಎಂದು ಪ್ರಶ್ನಿಸಿರುವ ಅವರು, "ಸರ್ಕಾರಿ ಶಾಲೆಗಳಲ್ಲಿ ಶುಲ್ಕವಿಲ್ಲವಲ್ಲ. ಅಲ್ಲಿಗೇ ಮಕ್ಕಳನ್ನು ಸೇರಿಸಿ" ಎಂದು ಸಲಹೆ ನೀಡಿದ್ದಾರೆ.
ಈ ಹೇಳಿಕೆ ನೀಡಿದ ಸಂದರ್ಭವನ್ನು ವಿಡಿಯೋ ಮಾಡಿಕೊಂಡಿದ್ದು, ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಶಾಸಕರ ಈ ಹೇಳಿಕೆಗೆ ಸಮಾಜವಾದಿ ಪಕ್ಷದ ಹಿರಿಯ ಮುಖಂಡ ವಿರೋಧ ವ್ಯಕ್ತಪಡಿಸಿದ್ದು, "ಈ ಹೇಳಿಕೆ ಬಿಜೆಪಿಯ ಮಹಿಳಾ ವಿರೋಧಿ ಮನಸ್ಥಿತಿಯನ್ನು ತೋರುತ್ತಿದೆ. ಮಹಿಳೆಯರ ಮೇಲೆ ಬಿಜೆಪಿಗೆ ಗೌರವವಿಲ್ಲ" ಎಂದಿದ್ದಾರೆ.
Click it and Unblock the Notifications
Sign in with Google