ಯುಪಿ ಎಂಎಲ್‌ಸಿ ಚುನಾವಣೆ: 3 ಸ್ಥಾನಗಳಲ್ಲಿ ಹಿಡಿತ ಕಳೆದುಕೊಂಡ ಬಿಜೆಪಿ

Published: Tuesday, April 12, 2022, 16:46 [IST]

ಲಕ್ನೋ ಏಪ್ರಿಲ್ 12: ಉತ್ತರ ಪ್ರದೇಶ ವಿಧಾನ ಪರಿಷತ್ತಿನ ಚುನಾವಣೆ ಫಲಿತಾಂಶ ಇಂದು ಬಹಿರಂಗಗೊಂಡಿದ್ದು ಬಿಜೆಪಿ ಭರ್ಜರಿ ಬಹುಮತ ಗಳಿಸುವ ಮೂಲಕ ತನ್ನ ಸ್ಥಾನವನ್ನು ಭದ್ರಪಡಿಸಿಕೊಂಡಿದೆ. ಉತ್ತರ ಪ್ರದೇಶ ವಿಧಾನ ಪರಿಷತ್ತಿನ 36 ಸ್ಥಾನಗಳಿಗೆ ನಡೆದ ಚುನಾವಣೆಯಲ್ಲಿ ಬಿಜೆಪಿ ಭರ್ಜರಿ ಜಯ ದಾಖಲಿಸಿದೆ. 36 ಸ್ಥಾನಗಳ ಪೈಕಿ 33 ಬಿಜೆಪಿ ಖಾತೆಗೆ ಬಂದಿವೆ. ವಿಧಾನ ಪರಿಷತ್ತಿನಲ್ಲಿ ಬಿಜೆಪಿ ಸಂಪೂರ್ಣ ಬಹುಮತ ಪಡೆದಿದೆ. ಈ ಚುನಾವಣೆಯಲ್ಲಿ ಎಸ್‌ಪಿ ಒಂದೇ ಒಂದು ಸ್ಥಾನವನ್ನು ಗೆದ್ದಿಲ್ಲ. ಮೂವರು ಸ್ವತಂತ್ರ ಅಭ್ಯರ್ಥಿಗಳು ಗೆದ್ದಿದ್ದಾರೆ. ಬಿಜೆಪಿ ಕಳೆದುಕೊಂಡಿರುವ ಮೂರು ಸ್ಥಾನಗಳೆಂದರೆ ಅಜಂಗಢ, ಕುಂದಾ ಮತ್ತು ವಾರಣಾಸಿ. ಈ ಪೈಕಿ ಈಗಾಗಲೇ 9 ಸದಸ್ಯರು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.

ಪತ್ನಿ ಅನ್ನಪೂರ್ಣ ಭಾರಿ ಅಂತರದ ಗೆಲುವು

ವಾರಣಾಸಿಯಲ್ಲಿ ಬ್ರಿಜೇಶ್ ಸಿಂಗ್ ಮತ್ತೊಮ್ಮೆ ಪ್ರಾಬಲ್ಯ ಮೆರೆದಿದ್ದಾರೆ. ಎಂಎಲ್‌ಸಿ ಚುನಾವಣೆಯಲ್ಲಿ ಅವರ ಪತ್ನಿ ಅನ್ನಪೂರ್ಣ ಭಾರಿ ಅಂತರದಿಂದ ಗೆಲುವು ಸಾಧಿಸಿದ್ದಾರೆ. ಇಲ್ಲಿ ಬಿಜೆಪಿ ಮೂರನೇ ಸ್ಥಾನ ಪಡೆದಿದೆ. ಕೊನೆಯ ಸುತ್ತಿನ ಮತ ಎಣಿಕೆಯಲ್ಲಿ ಎಸ್‌ಪಿಯ ಉಮೇಶ್ ಯಾದವ್ 345, ಬಿಜೆಪಿಯ ಡಾ.ಸುದಾಮ ಪಟೇಲ್ 170 ಮತಗಳನ್ನು ಪಡೆದರು. ಸ್ವತಂತ್ರ ಅನ್ನಪೂರ್ಣಾ ಸಿಂಗ್ ಅವರು 4234 ಮತಗಳನ್ನು ಪಡೆಯುವ ಮೂಲಕ ಜಯ ಸಾಧಿಸಿದ್ದಾರೆ.

ವಾರಣಾಸಿಯಲ್ಲಿ ಬ್ರಿಜೇಶ್ ಸಿಂಗ್ ಪ್ರಾಬಲ್ಯ

24 ವರ್ಷಗಳಿಂದ ಬನಾರಸ್‌ನ ಈ ಸ್ಥಾನವನ್ನು ಬ್ರಿಜೇಶ್ ಸಿಂಗ್ ಅಥವಾ ಅವರ ಕುಟುಂಬದವರು ಆಕ್ರಮಿಸಿಕೊಂಡಿದ್ದಾರೆ. ಅವರು ಕೇಂದ್ರ ಕಾರಾಗೃಹದಲ್ಲಿದ್ದಾರೆ. 1998 ರಿಂದ 2010 ರವರೆಗೆ, ಬ್ರಿಜೇಶ್ ಸಿಂಗ್ ಅವರ ಹಿರಿಯ ಸಹೋದರ ಉದಯಭಾನ್ ಸಿಂಗ್ ಈ ಸ್ಥಾನದಲ್ಲಿ MLC ಆಗಿದ್ದರು. ಇದರ ನಂತರ 2010 ರಲ್ಲಿ ಬ್ರಿಜೇಶ್ ಸಿಂಗ್ ಅವರ ಪತ್ನಿ ಅನ್ನಪೂರ್ಣ ಸಿಂಗ್ ಬಿಎಸ್ಪಿ ಟಿಕೆಟ್ನೊಂದಿಗೆ ಈ ಸ್ಥಾನಕ್ಕೆ ಎಂಎಲ್ಸಿ ಆದರು. 2016ರಲ್ಲಿ ಬ್ರಿಜೇಶ್ ಸಿಂಗ್ ಕ್ಷೇತ್ರಕ್ಕೆ ಇಳಿದಾಗ ಬಿಜೆಪಿ ಬೆಂಬಲ ನೀಡಿ ಅವರ ವಿರುದ್ಧ ಯಾವುದೇ ಅಭ್ಯರ್ಥಿಯನ್ನು ಕಣಕ್ಕಿಳಿಸಿರಲಿಲ್ಲ.

ಪಕ್ಷೇತರ ಅಭ್ಯರ್ಥಿ ವಿಕ್ರಾಂತ್ ಸಿಂಗ್‌ಗೆ ಜಯ

ಎರಡನೇ ಸ್ಥಾನದಲ್ಲಿ ಬಿಜೆಪಿ ಸೋಲನುಭವಿಸಿತ್ತು. ಅದು ಅಂದರೆ ಅಜಂಗಢದ ಸ್ಥಾನ. ಪಕ್ಷೇತರ ಅಭ್ಯರ್ಥಿ ವಿಕ್ರಾಂತ್ ಸಿಂಗ್ ರಿಶು ಅವರು ಬಿಜೆಪಿಯ ಅರುಣ್ ಕಾಂತ್ ಯಾದವ್ ಅವರನ್ನು ಸೋಲಿಸಿ ಗೆಲುವು ಸಾಧಿಸಿದ್ದಾರೆ. ಬಿಜೆಪಿ ಎಂಎಲ್ ಸಿ ಯಶವಂತ್ ಸಿಂಗ್ ಬಂಡಾಯವೆದ್ದು ತಮ್ಮ ಪುತ್ರ ವಿಕ್ರಾಂತ್ ಸಿಂಗ್ ಅವರನ್ನು ಸ್ವತಂತ್ರ ಅಭ್ಯರ್ಥಿಯಾಗಿ ಕಣಕ್ಕಿಳಿಸಿದರು. ಅಜಂಗಢ್ ಎಂಎಲ್‌ಸಿ ಕ್ಷೇತ್ರದಲ್ಲಿ ಬಿಜೆಪಿ ರಮಾಕಾಂತ್ ಯಾದವ್ ಅವರ ಪುತ್ರ ಅರುಣಕಾಂತ್ ಯಾದವ್ ಅವರನ್ನು ಕಣಕ್ಕಿಳಿಸಿದ್ದರೆ, ಎಸ್‌ಪಿ ಮತ್ತೆ ರಾಕೇಶ್ ಯಾದವ್ ಮೇಲೆ ಬೆಟ್ಟಿಂಗ್ ಆಡಿದೆ.

ಹಿಡಿತ ಕಳೆದುಕೊಂಡ ಬಿಜೆಪಿ

ಬಿಜೆಪಿ ತನ್ನ ಹಿಡಿತ ಸಾಧಿಸಲು ಸಾಧ್ಯವಾಗದ ಮೂರನೇ ಸ್ಥಾನ ಪ್ರತಾಪಗಢ. ಪ್ರತಾಪಗಢದಲ್ಲಿ ರಾಜಾ ಭಯ್ಯಾ ಅವರ ವೈಭವ ಮುಂದುವರೆದಿದೆ. ಅಕ್ಷಯ್ ಪ್ರತಾಪ್ ಸಿಂಗ್ 5ನೇ ಬಾರಿಗೆ ಎಂಎಲ್ ಸಿ ಆಗಿದ್ದಾರೆ. ರಾಜಾ ಭಯ್ಯಾ ಅವರ ಆಪ್ತ ಸಹಾಯಕ ಅಕ್ಷಯ್ ಪ್ರತಾಪ್ ಸಿಂಗ್ ಅವರು ರಾಜಾ ಭಯ್ಯಾ ಅವರ ಜನಸತ್ತಾ ಪಕ್ಷದ ಟಿಕೆಟ್‌ನಲ್ಲಿ ಚುನಾವಣಾ ಕಣಕ್ಕೆ ಇಳಿದಿದ್ದರು. ಅಕ್ಷಯ್ ಪ್ರತಾಪ್ ಸಿಂಗ್ ಅವರನ್ನು ಬಾಹುಬಲಿ ಎಂದು ಪರಿಗಣಿಸಲಾಗಿದೆ. ಅಕ್ಷಯ್ ಪ್ರತಾಪ್ ಸಿಂಗ್ 1106 ಮತಗಳಿಂದ ಗೆಲುವು ಸಾಧಿಸಿದ್ದಾರೆ. ಬಿಜೆಪಿಯ ಹರಿ ಪ್ರತಾಪ್ ಸಿಂಗ್ 614 ಮತಗಳನ್ನು ಪಡೆದರು. ಎಸ್‌ಪಿಯ ವಿಜಯ್ ಬಹದ್ದೂರ್ ಯಾದವ್ 380 ಮತಗಳನ್ನು ಪಡೆಯುವ ಮೂಲಕ ಮೂರನೇ ಸ್ಥಾನದಲ್ಲಿದ್ದಾರೆ. ಅಸಿಂಧು ಮತಗಳ ಸಂಖ್ಯೆ 62 ಆಗಿದೆ.

Published On April 12, 2022