ಬೇಸಿಗೆಗೂ ಮುನ್ನವೇ ಬೆಲೆ ಏರಿಕೆ ಬಿಸಿ: ಗಗನಕ್ಕೇರಿದ ಅಕ್ಕಿ, ಬೇಳೆ, ಮೆಣಸಿನಕಾಯಿ ದರ

Updated: Tuesday, February 3, 2026, 11:51 [IST]

ಬೆಂಗಳೂರು: ರಾಜ್ಯದ ಜನತೆಗೆ ಮತ್ತೊಂದು ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ಈಗಾಗಲೇ ತರಕಾರಿ, ಹಣ್ಣು, ಚಿನ್ನ ಮತ್ತು ಬೆಳ್ಳಿ ದರಗಳ ಏರಿಕೆಯಿಂದ ಕಂಗೆಟ್ಟಿರುವ ಸಾಮಾನ್ಯ ಜನರಿಗೆ, ಇದೀಗ ದಿನನಿತ್ಯದ ಅನಿವಾರ್ಯ ವಸ್ತುಗಳಾದ ಅಕ್ಕಿ, ಬೇಳೆ ಮತ್ತು ಮೆಣಸಿನಕಾಯಿ ಬೆಲೆ ಗಗನಕ್ಕೇರಿರುವುದು ನುಂಗಲಾರದ ತುತ್ತಾಗಿ ಪರಿಣಮಿಸಿದೆ. ಬೇಸಿಗೆ ಕಾಲ ಅಧಿಕೃತವಾಗಿ ಆರಂಭವಾಗುವ ಮುನ್ನವೇ ಮಾರುಕಟ್ಟೆಯಲ್ಲಿ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಾಗಿರುವುದು ಮಧ್ಯಮ ವರ್ಗದವರ ಜೀವನ ನಿರ್ವಹಣೆಗೆ ದೊಡ್ಡ ಪೆಟ್ಟು ನೀಡಿದೆ.

ಬೆಲೆ ಏರಿಕೆಗೆ ಕಾರಣವೇನು?

ಪ್ರಮುಖವಾಗಿ ಅಕ್ಕಿಯ ರಫ್ತು ಪ್ರಮಾಣದಲ್ಲಿ ಹೆಚ್ಚಳವಾಗಿರುವುದು ಸ್ಥಳೀಯ ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆಗೆ ಮುಖ್ಯ ಕಾರಣವಾಗಿದೆ. ಇದರಿಂದಾಗಿ ಅಕ್ಕಿಯ ದರದಲ್ಲಿ ಪ್ರತಿ ಕೆಜಿಗೆ 5 ರಿಂದ 6 ರೂಪಾಯಿಗಳಷ್ಟು ಏರಿಕೆಯಾಗಿದೆ. ಇನ್ನು ಹವಾಮಾನ ವೈಪರೀತ್ಯ ಹಾಗೂ ನಿರೀಕ್ಷಿತ ಪ್ರಮಾಣದಲ್ಲಿ ಬೆಳೆ ಬಾರದ ಕಾರಣ (ಇಳುವರಿ ಕುಸಿತ), ಉತ್ತರ ಕರ್ನಾಟಕದ ಪ್ರಸಿದ್ಧ ಬ್ಯಾಡಗಿ ಮೆಣಸಿನಕಾಯಿ ಹಾಗೂ ಶೇಂಗಾ (ಕಡಲೆಕಾಯಿ) ಬೀಜದ ದರದಲ್ಲಿಯೂ ಭಾರಿ ಹೆಚ್ಚಳ ಕಂಡುಬಂದಿದೆ. ಕಡಲೆಬೀಜ ಮತ್ತು ಮೆಣಸಿನಕಾಯಿ ದರದಲ್ಲಿ ಸುಮಾರು 50 ರೂಪಾಯಿಯಷ್ಟು ಹೆಚ್ಚಳವಾಗಿದೆ.

ದವಸ-ಧಾನ್ಯಗಳ ದರದಲ್ಲಿನ ವ್ಯತ್ಯಾಸ (ಪ್ರತಿ ಕೆ.ಜಿಗೆ)

ಮಾರುಕಟ್ಟೆಯಲ್ಲಿನ ಪರಿಷ್ಕೃತ ದರಗಳ ಪಟ್ಟಿ ಗ್ರಾಹಕರನ್ನು ಬೆಚ್ಚಿಬೀಳಿಸುವಂತಿದೆ. ಪ್ರಮುಖ ವಸ್ತುಗಳ ಹಳೆಯ ಮತ್ತು ಹೊಸ ದರಗಳ ವಿವರ ಈ ಕೆಳಗಿನಂತಿದೆ:

ಸೋನಾ ಮಸೂರಿ ಅಕ್ಕಿ: ಹಿಂದೆ 38 ರೂ. ಇದ್ದದ್ದು, ಈಗ 44 ರೂ. ಗೆ ಏರಿಕೆಯಾಗಿದೆ.

ಆರ್‌ಎಫ್‌ಒ (RFO) ಅಕ್ಕಿ: 49 ರೂ. ನಿಂದ 54 ರೂ. ಗೆ ಹೆಚ್ಚಳವಾಗಿದೆ.

ದೋಸೆ ಅಕ್ಕಿ: 29 ರೂ. ಇದ್ದ ಬೆಲೆ ಈಗ 39 ರೂ. ಆಗಿದೆ.

ಬ್ಯಾಡಗಿ ಮೆಣಸಿನಕಾಯಿ: ಅತಿ ಹೆಚ್ಚು ಏರಿಕೆ ಕಂಡಿರುವುದು ಇದೇ ಪದಾರ್ಥ. ಕೆಜಿಗೆ 260 ರೂ. ಇದ್ದ ದರವು ಬರೋಬ್ಬರಿ 420 ರೂ. ಗೆ ತಲುಪಿದೆ.

ಗುಂಟೂರು ಮೆಣಸಿನಕಾಯಿ: 180 ರೂ. ನಿಂದ 230 ರೂ. ಗೆ ಏರಿದೆ.

ತೊಗರಿ ಬೇಳೆ: 110 ರೂ. ನಿಂದ 135 ರೂ. ಗೆ ಏರಿಕೆಯಾಗಿದೆ.

ಉದ್ದಿನ ಬೇಳೆ: 100 ರೂ. ಇದ್ದದ್ದು ಈಗ 120 ರೂ. ಆಗಿದೆ.

ಕಡಲೆಬೀಜ: 120 ರೂ. ನಿಂದ 150 ರೂ. ಗೆ ಹೆಚ್ಚಳವಾಗಿದೆ.

ಹೊಸ ಬೆಳೆ ಮಾರುಕಟ್ಟೆಗೆ ಬರುವವರೆಗೂ ಈ ಬೆಲೆ ಏರಿಕೆ ಮುಂದುವರಿಯುವ ಸಾಧ್ಯತೆಯಿದೆ ಎಂದು ಮಾರುಕಟ್ಟೆ ಮೂಲಗಳು ತಿಳಿಸಿವೆ. ಆದಾಯ ಬರುವ ಮುನ್ನವೇ ರೈತರಿಗೂ ಇಳುವರಿ ಕೊರತೆಯ ಆತಂಕ ಎದುರಾಗಿದ್ದರೆ, ಇತ್ತ ಗ್ರಾಹಕರಿಗೆ ದಿನಸಿ ಕೊಳ್ಳುವುದು ಸವಾಲಾಗಿ ಪರಿಣಮಿಸಿದೆ. ಒಟ್ಟಾರೆ ಈ ಬೆಲೆ ಏರಿಕೆಯು ಬಡ ಮತ್ತು ಮಧ್ಯಮ ವರ್ಗದ ಜನರ ತಿಂಗಳ ಬಜೆಟ್ ಅನ್ನು ಸಂಪೂರ್ಣವಾಗಿ ತಲೆಕೆಳಗಾಗಿಸಿದೆ.