ವರ್ಕ್ ಫ್ರಂ ಹೋಂ: ಲ್ಯಾಪ್ ಟಾಪ್ ಮಾರಾಟಗಾರರಿಗೆ ಸಿಕ್ಕಿದ್ದೇ ಸೀರುಂಡೆ

ಕೊರೊನಾ ವೈರಸ್ ಹಾವಳಿಯಿಂದ ವಿಶ್ವವೆಲ್ಲಾ ತಲ್ಲಣವಾಗಿ ಕೂತಿದ್ದು ಒಂದು ಕಡೆಯಾದರೆ, ದಿನದಿಂದ ದಿನಕ್ಕೆ ಆರ್ಥಿಕತೆಯೂ ಕುಸಿಯುತ್ತಿರುವುದು ಇನ್ನೊಂದೆಡೆ. ಎಲ್ಲಾ ಉದ್ಯಮಗಳು ತೀವ್ರ ನಷ್ಟದಲ್ಲಿದ್ದರೆ, ಒಂದು ಉದ್ಯಮ ಮಾತ್ರ, ಭರ್ಜರಿ ವಹಿವಾಟು ನಡೆಸುತ್ತಿದೆ.

ರಾಜ್ಯದಲ್ಲಿ ಬೆಂಗಳೂರು ಸೇರಿದಂತೆ ಹಲವು ಪ್ರಮುಖ ನಗರಗಳಲ್ಲಿನ ಕಂಪೆನಿಗಳು ತಮ್ಮ ಉದ್ಯೋಗಿಗಳಿಗೆ ವರ್ಕ್ ಫ್ರಂ ಹೋಂ ಮಾಡಲು ಹೇಳಿದೆ. ಆ ಮೂಲಕ, ಕೊರೊನಾ ವೈರಸ್ ಪಸರಿಸದಂತೆ, ಸಾಮಾಜಿಕ ಜವಾಬ್ದಾರಿಯ ನಿರ್ಧಾರವನ್ನು ತೆಗೆದುಕೊಂಡಿದೆ.

WFH ನೀಡಿರುವ ಹಲವು ಸಂಸ್ಥೆಗಳಲ್ಲಿ ಡೆಸ್ಕ್ ಟಾಪ್ ಮತ್ತು ಲ್ಯಾಪ್ ಟಾಪ್ ಮೂಲಕ ಉದ್ಯೋಗಿಗಳು ಕೆಲಸ ನಿರ್ವಹಿಸುತ್ತಿವೆ. ವರ್ಕ್ ಫ್ರಂ ಹೋಂ ನೀಡುವಾಗ, ಡೆಸ್ಕ್ ಟಾಪ್ ನಲ್ಲಿ ಕೆಲಸ ಮಾಡುವ ನೌಕರರಿಗೆ ಲ್ಯಾಪ್ ಟಾಪ್ ನೀಡುವ ಅನಿವಾರ್ತೆಯಲ್ಲಿ ಸಂಸ್ಥೆಗಳಿವೆ.

ಇದು ತಾತ್ಕಾಲಿಕ ಕೆಲಸ ಪದ್ದತಿ ಆಗಿರುವುದರಿಂದ, ಬಹುತೇಕ ಸಂಸ್ಥೆಗಳು ನೌಕರಿಗೆ ಲ್ಯಾಪ್ ಟಾಪ್ ಅನ್ನು ಮಾಸಿಕ ಬಾಡಿಗೆಯ ಆಧಾರದ ಮೇಲೆ ತೆಗೆದುಕೊಳ್ಲುತ್ತಿವೆ. ಹೆಚ್ಚಿನ ಕಂಪೆನಿಗಳು WFH ಮೊರೆ ಹೋಗಿರುವುದರಿಂದ, ಲ್ಯಾಪ್ ಟಾಪ್ ಮಾರಾಟದ ಉದ್ಯಮ ಸದ್ಯ ಸಿಕ್ಕಾಪಟ್ಟೆ ಬಿರುಸಾಗಿ ಸಾಗುತ್ತಿವೆ.

ಊಹಿಸಲೂ ಅಸಾಧ್ಯವಾದ ರೀತಿಯಲ್ಲಿ ಬೇಡಿಕೆ ಬಂದಿರುವುದರಿಂದ, ಲ್ಯಾಪ್ ಟಾಪ್ ಬಾಡಿಗೆಗೆ ನೀಡುವ ಸಂಸ್ಥೆಗಳು, ಅಲ್ಲಲ್ಲಿ ಪರಿಸ್ಥಿತಿಗೆ ತಕ್ಕಂತೆ ಬೆಲೆಯನ್ನು ಏರಿಸಿವೆ. ಯಾರೂ ಕೇಳದ, ಮೂಲೆಯಲ್ಲಿ ಬಿದ್ದಿರುವ ಕಾನ್ಫಿಗರೇಶನ್ ಮಾಡೆಲ್ ಲ್ಯಾಪ್ ಗಳಿಗೂ ಎಲ್ಲಿಲ್ಲದ ಡಿಮಾಂಡ್.

ಇದೊಂದು, ತಾತ್ಕಾಲಿಕ ಪದ್ದತಿಯಾಗಿರುವುದರಿಂದ, ಕೆಲಸ ನಿರ್ವಹಿಸಲು ಸಾಕಾಗುವಷ್ಟು ಮಾಡೆಲಿನ ಲ್ಯಾಪ್ ಟಾಪ್ ಗಳನ್ನು ಸಂಸ್ಥೆಗಳು ತಮ್ಮ ನೌಕರರಿಗೆ ನೀಡುತ್ತಿವೆ. ಹಾಗಾಗಿ, ಧೂಳು ಹಿಡಿದು ಕೂತಿದ್ದ ಲ್ಯಾಪ್ ಟಾಪ್ ಗಳಿಗೆ ಅವಧಿಗಿಂತ ಮುಂಚೆನೇ ಆಯುಧಪೂಜೆ ಭಾಗ್ಯ.

ಉದಾಹರಣೆಗೆ, ಡಿಮಾಂಡ್ ಇಲ್ಲದ ಕೋರ್ ಐ3, 4th ಜನರೇಶನ್ ಲ್ಯಾಪ್ ಟಾಪ್ ಗಳನ್ನೂ ಸಂಸ್ಥೆಗಳು ಬಾಡಿಗೆಗೆ ತೆಗೆದುಕೊಳ್ಳುತ್ತಿವೆ. ಅಂದಾಜು, ತಿಂಗಳಿಗೆ 1,800 - 2,500 ರೂಪಾಯಿಗಳಿವೆ ಬಾಡಿಗೆ ಆಧಾರದಲ್ಲಿ ತೆಗೆದುಕೊಳ್ಳುತ್ತಿವೆ.

ಒಟ್ಟಿನಲ್ಲಿ, ಕೊರೊನಾ ಹಾವಳಿ ಊರೆಲ್ಲಾ ಹಬ್ಬಿದ್ದರೂ, ಈ ಉದ್ಯಮ ಮಾತ್ರ ಭರ್ಜರಿ ವಹಿವಾಟು ನಡೆಸುತ್ತಿವೆ. ಬೆಲೆ ಏನೇ ಆಗಿರಲಿ, ಸಂಸ್ಥೆಗಳ ಪಾಲಿಗೆ ತುರ್ತು ಪರಿಸ್ಥಿತಿಯಂತಾಗಿರುವ ಈ ಸಮಯದಲ್ಲಿ ಲ್ಯಾಪ್ ಟಾಪ್ ಮಾರಾಟ / ಬಾಡಿಗೆ ನೀಡುವ ಸಂಸ್ಥೆಗಳು, ಕಸ್ಟಮರ್ ಸಪೋರ್ಟ್ ಚೆನ್ನಾಗಿ ಮಾಡುತ್ತಿವೆ ಎನ್ನುವುದು ಒಪ್ಪಿಕೊಳ್ಳಬೇಕಾದ ವಿಚಾರ.

English summary

Most Of The Company Given Work From Home Option: Laptop Business In Full Demand.