ಬಂಟ್ವಾಳ: ಆಟೋಗೆ ಕೆಎಸ್ಆರ್ಟಿಸಿ ಬಸ್ ಡಿಕ್ಕಿ, 4 ಸಾವು

ಬಂಟ್ವಾಳ, ಫೆ.4: ಅತಿ ವೇಗವಾಗಿ ಬಂದ ಕೆಎಸ್ಆರ್ ಟಿಸಿ ಬಸ್ಸು ಆಟೋ ರಿಕ್ಷಾಗೆ ಡಿಕ್ಕಿ ಹೊಡೆದು, ಆಟೋ ಸಂಪೂರ್ಣವಾಗಿ ನಜ್ಜುಗುಜ್ಜಾಗಿ, ಅದರಲ್ಲಿದ್ದ ಒಂದೇ ಕುಟುಂಬದ ನಾಲ್ಕು ಮಂದಿ ಸಾವಿಗೀಡಾಗಿದ್ದಾರೆ. ನಿನ್ನೆ ಸೋಮವಾರ ತಡ ರಾತ್ರಿ ಪಣೆಮಂಗಳೂರು ಬಳಿ ಈ ದುರ್ಘಟನೆ ನಡೆದಿದೆ.

ರಾಷ್ಟ್ರೀಯ ಹೆದ್ದಾರಿ 75ರಲ್ಲಿ ಪಣೆಮಂಗಳೂರು ಸೇತುವೆ ಬಳಿ ನಡುರಾತ್ರಿ ವೇಗವಾಗಿ ಚಲಿಸುತ್ತಿದ್ದ KSRTC ಬಸ್, ಆಟೋಗೆ ಡಿಕ್ಕಿ ಹೊಡೆದಿದೆ. ಬರಿಮಾರ್ ಮುಳಿಬೈಲಿನ ನಿವಾಸಿಗಳಾದ ಭಾಸ್ಕರ್, ಅವರ ಪತ್ನಿ ಪ್ರೇಮಾ, ಜಗದೀಶ್, ಅವರ ಪತ್ನಿ ಸುಪ್ರೀತಾ ಮೃತಪಟ್ಟವರು.

ಭಾಸ್ಕರ್-ಪ್ರೇಮಾ ಅವರ ಮಕ್ಕಳಾದ ಹೃತಿಜ್ಞಾ, ಅಭಿಜ್ಞಾ ಹಾಗೂ ಜಗದೀಶ್ -ಸುಪ್ರೀತಾ ದಂಪತಿಯ ಪುತ್ರ ನಿಶಾನ್ ಗಂಭೀರವಾಗಿ ಗಾಯಗೊಂಡಿದ್ದಾರೆ. ನಿಶಾನ್ ಪರಿಸ್ಥಿತಿ ತುಂಬಾ ಗಂಭೀರವಾಗಿದೆ ಎನ್ನಲಾಗಿದೆ. ( ಬೆಂಗಳೂರು ಬಸ್ ಅಪಘಾತ: 10 ಮಂದಿ ಸಾವು )

ಭಾಸ್ಕರ್ ಹಾಗೂ ಜಗದೀಶ್ ಅವರು ಬರಿಮಾರಿನ ಲಕ್ಷ್ಮಣ ಪೂಜಾರಿ ಅವರ ಪುತ್ರರು. ಬಿಸಿ ರೋಡ್ ನಲ್ಲಿ ಸಂಬಂಧಿಕರ ಮದುವೆಗೆಂದು ಇವರಿಬ್ಬರೂ ತಮ್ಮ ಪತ್ನಿ-ಮಕ್ಕಳೊಂದಿಗೆ ಹೋಗಿದ್ದರು. ಮದುವೆ ಮುಗಿಸಿಕೊಂಡು ರಾತ್ರಿಯೇ (11.30ರಲ್ಲಿ) ಆಟೋದಲ್ಲಿ ಹೊಟರುಬರುವಾಗ ಈ ದುರಂತ ಸಂಭವಿಸಿದೆ. ಸ್ವತಃ ಭಾಸ್ಕರ್ ಆಟೋ ಓಡಿಸುತ್ತಿದ್ದರು. ಬಸ್ಸು ಅತಿ ವೇಗದಲ್ಲಿದ್ದುದೇ ಅಪಘಾತಕ್ಕೆ ಕಾರಣವೆನ್ನಲಾಗಿದೆ. ಆಟೋ ಸಂಪೂರ್ಣವಾಗಿ ನಜ್ಜುಗುಜ್ಜಾಗಿದೆ.

ಬಂಟ್ವಾಳ ಇನ್ಸ್ ಪೆಕ್ಟರ್ ರಾಜಶೇಖರ್ ಮಿಸ್ತ್ರಿ ಮತ್ತಿತರ ಹಿರಿಯ ಅಧಿಕಾರಿಗಳು ಸ್ಥಳಕ್ಕೆ ಧಾವಿಸಿ, ರಕ್ಷಣಾ ಕಾರ್ಯಾಚರಣೆ ನಡೆಸಿದರು.

English summary

KSRTC-Auto accident at Panemangalore Bantwal - Four of family killed. The accident took place when a KSRTC bus rammed into an auto rickshaw near Panemangalore bridge on NH-75. The deceased have been identified as Bhaskar, his wife Prema, Jagadish and his wife Suprita. They were residents of Mulibail, Barimar.