Breaking News: ಭಾಷಣ ಓದದೇ ಹೊರನಡೆದ ರಾಜ್ಯಪಾಲರ ನಡೆಗೆ ಕಾಂಗ್ರೆಸ್‌ ಕೆಂಡಾಮಂಡಲ, ಹೈಡ್ರಾಮಾ

Updated: Thursday, January 22, 2026, 14:14 [IST]

ಬೆಂಗಳೂರು: ರಾಜ್ಯದಲ್ಲಿ 2026 ವರ್ಷದ ಮೊದಲ ಜಂಟಿ ಅಧಿವೇಶನ ಆರಂಭವಾಗಿದೆ. 'ಜಿ ರಾಮ್‌ ಜಿ' ಯೋಜನೆ ಹೆಸರು ಬದಲಾವಣೆಗೆ ಆಕ್ರೋಶ ವ್ಯಕ್ತಪಡಿಸಿದ್ದ ರಾಜ್ಯ ಸರ್ಕಾರ ಅದನ್ನು ಅಧಿವೇಶನದ ಮೊದಲ ದಿನದ ರಾಜ್ಯಪಾಲರ ಭಾಷಣದಲ್ಲಿ ಸೇರಿಸಲಾಗಿತ್ತು. ಆದರೆ ಭಾಷಣ ಓದದೇ ರಾಜ್ಯಪಾಲರು ಅಧಿವೇಶನದಿಂದ ಹೊರ ನಡೆದರು. ಅವರ ಈ ನಡೆಯನ್ನು ಖಂಡಿಸಿದ ಕಾಂಗ್ರೆಸ್ ನಾಯಕರ ಪೈಕಿ ಮಾಜಿ ಸಚಿವ ಬಿ.ಕೆ ಹರಿಪ್ರಸಾದ್ ರಾಜ್ಯಾಪಾಲರನ್ನು ಅಡ್ಡಿಗಟ್ಟಿ ತಡೆಯಲು ಮುಂದಾದ ಬೆಳವಣಿಗೆ ಗುರುವಾರ ಸದನದಲ್ಲಿ ನಡೆಯಿತು.

ಸದನದಿಂದ ರಾಜ್ಯಪಾಲರು ಹೊರ ನಡೆಯುತ್ತಿದ್ದಾಗ, ಅವರನ್ನು ತಡೆಯಲು ಶಾಸಕ ಬಿ.ಕೆ.ಹರಿಪ್ರಸಾದ್ ಮುಂದಾಗಿದ್ದಾರೆ. ರಾಜ್ಯಪಾಲರನ್ನು ಅಡ್ಡಗಟ್ಟಿ ನಿಲ್ಲಿಸಲು ಮುಂದಾಗಿದ್ದಾರೆ. ಆದರೆ ಭದ್ರತಾ ಸಿಬ್ಬಂದಿ ಜೊತೆಗೆ ಅವರು ಹೊರ ನಡೆದಿದ್ದಾರೆ. ಈ ವೇಳೆ ಹರಿಪ್ರಸಾದ್ ಅವರ ಶರ್ಟ್ ಹರಿದಿದೆ. ರಾಜ್ಯಪಾಲರ ನಡೆ ಖಂಡಿಸಿ ಕಾಂಗ್ರೆಸ್ ನಾಯಕರು, ಸಂವಿಧಾನ ನಿಯಮ ಉಲ್ಲಂಘಿಸಿದ್ದಾರೆ ಎಂದು ಘೋಷಣೆ ಕೂಗಿದರು.

Karnataka Session Governor Walks Out Without Reading of Govt prepared speech Congress Fumes

ರಾಜ್ಯಪಾಲರು ಹೊರ ನಡೆಯುವಾಗ ಬಿಕೆ ಹರಿಪ್ರಸಾದ್ ಅವರು ಮಾತ್ರವಲ್ಲದೇ ಇತರ ನಾಯಕರು ಅಡ್ಡಗಟ್ಟಲು ಪ್ರಯತ್ನಿಸಿದರು. ಒಟ್ಟಾರೆ ಇಂದಿನ ಜಂಟಿ ಅಧಿವೇಶನದ ಮೊದಲ ದಿನ ರಾಜ್ಯಪಾಲರ ಚುಟುಕು ಭಾಷಣ ಬಳಿಕ ಹೈಡ್ರಾಮಾವೇ ನಡೆಯಿತು.

'ಎಂನರೇಗಾ' ಯೋಜನೆ ಹೆಸರನ್ನು 'ಜಿ ರಾಮ್ ಜಿ' ಎಂದು ಬದಲಾವಣೆ ಮಾಡಿದ್ದನ್ನು ಕಾಂಗ್ರೆಸ್ ಆಕ್ಷೇಪಿಸಿತ್ತು. ಅದರ ಬಗೆಗಿನ ಅಂಶಗಳನ್ನು ರಾಜ್ಯಪಾಲರ ಭಾಷಣದಲ್ಲಿ ಸರ್ಕಾರ ಸೇರಿಸಿತ್ತು. ರಾಜ್ಯಪಾಲರು ಭಾಷಣದ ಮೊದಲ ಹದಿಮೂರು ಸಾಲು ಓದಿ, ನನ್ನ ಸರ್ಕಾರಕ್ಕೆ ಶುಭಾಷಯವೆಂದು ಒಂದೆರಡು ನಿಮಿಷ ಮಾತನಾಡಿ ಭಾಷಣ ಅಂತ್ಯಗೊಳಿಸಿ ಹೊರ ನಡೆದರು. ಇದರಿಂದ ಸಂವಿಧಾನದ ನಿಯಮ ಉಲ್ಲಂಘಿಸಲಾಗಿದೆ ಎಂದು ಕಾಂಗ್ರೆಸ್ ನಾಯಕರು ಆರೋಪಿಸಿದರು. ರಾಜ್ಯಪಾಲರು ಕೇಂದ್ರ ಬಿಜೆಪಿ ಪರ ನಿಲುವು ತಾಳಿದ್ದಾರೆ. ಕೇಂದ್ರ ಸರ್ಕಾರದ ಕೈಗೊಂಬೆಯಾಗಿದ್ದಾರೆ ಎಂದೆಲ್ಲ ಕೈ ನಾಯಕರು ದೂರಿದರು.

ಇದೆಲ್ಲ ಹೈಡ್ರಾಮಾ ನಡೆದ ಬೆನ್ನಲ್ಲೆ ಬಿಜೆಪಿ ನಾಯಕರು ಕಾಂಗ್ರೆಸ್ ಸರ್ಕಾರ, ಸದನದಲ್ಲಿ ನಾಯಕರು ನಡೆದುಕೊಂಡ ರೀತಿಗೆ ಬೇಸರ ಹೊರ ಹಾಕಿದರು. ಸದನದಲ್ಲಿ ಕಾಂಗ್ರೆಸ್ ನಾಯಕರು ಗೂಂಡಾಗಿರಿ ನಡೆಸುತ್ತಿದ್ದಾರೆ. ರಾಜ್ಯಪಾಲರನ್ನು ಅಡ್ಡಗಟ್ಟುವುದು, ಒತ್ತಾಯಿಸುವು ನಡೆ ಸರಿಯಲ್ಲ. ಜನ ಬೆಂಬಲ ಇದೆ ಎಂದು ಸರ್ಕಾರದ ಏನೆ ಮಾಡಿದರು ಜನ ಸಹಿಸಲ್ಲ. ಸರ್ಕಾರದ ನಡೆಯನ್ನು ಜನ ನೋಡುತ್ತಿದ್ದಾರೆ, ಬುದ್ಧಿ ಕಲಿಸುತ್ತಾರೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ ಅವರು ಎಚ್ಚರಿಸಿದ್ದಾರೆ. ವಿಪಕ್ಷ ನಾಯಕ ಆರ್.ಅಶೋಕ್ ಅವರು ಸಹ ಕಾಂಗ್ರೆಸ್ ನಾಯಕರ ನಡೆಗೆ ಅಸಮಾಧಾನ ಹೊರ ಹಾಕಿದರು.