ಅಧಿವೇಶನದ ಸಂದರ್ಭದಲ್ಲಿ ಶಾಸಕರಿಗೆ ಉಚಿತ ಊಟದ ಭಾಗ್ಯ!
ಬೆಂಗಳೂರು, ಅಕ್ಟೋಬರ್ 12 : ವಿಧಾನಮಂಡಲ ಅಧಿವೇಶನದ ಸಂದರ್ಭದಲ್ಲಿ ಶಾಸಕರಿಗೆ ಉಚಿತ ಊಟದ ಭಾಗ್ಯ ಸಿಗಲಿದೆ. ವಿಧಾನಸೌಧದಲ್ಲೇ ಉಚಿತವಾಗಿ ಪೌಷ್ಠಿಕಾಂಶ ಯುಕ್ತ ಮಧ್ಯಾಹ್ನದ ಊಟ ನೀಡಲು ಚಿಂತನೆ ನಡೆದಿದೆ.
ವಿಧಾನಮಂಡಲ ಅಧಿವೇಶನಗಳು ನಡೆಯುವಾಗ ಕೆಲವು ಶಾಸಕರು ಮಧ್ಯಾಹ್ನದ ಊಟಕ್ಕೆ ಹೊರಹೋಗುತ್ತಾರೆ. ನಂತರ ನಡೆಯುವ ಕಲಾಪದಲ್ಲಿ ಅವರು ಪಾಲ್ಗೊಳ್ಳುವುದಿಲ್ಲ. ಆದ್ದರಿಂದ, ಉಚಿತವಾಗಿ ವಿಧಾನಸೌಧದಲ್ಲೇ ಊಟ ನೀಡಲು ಯೋಜನೆ ರೂಪಿಸಲಾಗುತ್ತಿದೆ.
'ವಿಧಾನ ಮಂಡಲ ಅಧಿವೇಶನದ ಸಂದರ್ಭದಲ್ಲಿ ಶಾಸಕರು ಉಭಯ ಸದನಗಳ ಕಲಾಪದಲ್ಲಿ ಭಾಗವಹಿಸುವಂತೆ ಆಕರ್ಷಿಸಲು ಉಚಿತ ಊಟದ ವ್ಯವಸ್ಥೆ ಮಾಡಲು ಸರ್ಕಾರ ಚಿಂತನೆ ನಡೆಸಿದೆ' ಎಂದು ವಿಧಾನಸಭೆ ಸ್ಪೀಕರ್ ಕೆ.ಬಿ.ಕೋಳಿವಾಡ ಹೇಳಿದ್ದಾರೆ.
'ಶಾಸಕರು ರಾತ್ರಿ ಹೋಟೆಲ್, ಪಬ್ಗಳಿಗೆ ತೆರಳುತ್ತಾರೆ. ಇದನ್ನು ತಡೆಯಲು 'ಕಾನ್ಸ್ಟಿಟ್ಯೂಷನ್ ಕ್ಲಬ್' ಮಾದರಿಯಲ್ಲಿ ಕ್ಲಬ್ ನಿರ್ಮಾಣ ಮಾಡಲಾಗುತ್ತದೆ. ಮುಖ್ಯಮಂತ್ರಿಗಳ ಅನುಗ್ರಹ ನಿವಾಸದ ಬಳಿಯ 2.20 ಎಕರೆ ಜಮೀನಿನಲ್ಲಿ ಕ್ಲಬ್ ನಿರ್ಮಾಣವಾಗಲಿದ್ದು, ಡಿಸೆಂಬರ್ನಲ್ಲಿ ಕಟ್ಟಡ ಕಾಮಗಾರಿಗೆ ಮುಖ್ಯಮಂತ್ರಿಗಳು ಶಂಕುಸ್ಥಾಪನೆ ಮಾಡಲಿದ್ದಾರೆ' ಎಂದು ಕೋಳಿವಾಡ ತಿಳಿಸಿದ್ದಾರೆ.
'ಶಾಸಕರ ಖಾಸಗಿತನ ಕಾಪಾಡಲು ಕ್ಲಬ್ ನಿರ್ಮಾಣ ಮಾಡಲಾಗುತ್ತಿದ್ದು, ಜಿಮ್, ಈಜುಕೊಳ, ಬ್ಯಾಡ್ಮಿಂಟನ್ ಕೋರ್ಟ್, ಹೋಟೆಲ್, ಸಭಾಂಗಣವನ್ನು ಈ ಕ್ಲಬ್ ಒಳಗೊಂಡಿರಲಿದೆ' ಎಂದು ಕೋಳಿವಾಡ ಮಾಹಿತಿ ನೀಡಿದರು.
Click it and Unblock the Notifications
Sign in with Google