ಲೈಂಗಿಕ ಅಲ್ಪಸಂಖ್ಯಾತರಿಗೆ ತೆರೆದ ವೈಟ್ ಹೌಸ್ ಬಾಗಿಲು
ವಾಷಿಂಗ್ ಟನ್, ಆಗಸ್ಟ್, 19: ಅಮೆರಿಕದ ಅಧ್ಯಕ್ಷ ಬರಾಕ್ ಒಬಾಮಾ ತಮ್ಮ ವೈಟ್ ಹೌಸ್ ಗೆ ಲೈಂಗಿಕ ಅಲ್ಪಸಂಖ್ಯಾತರೊಬ್ಬರನ್ನು ಖಾಯಂ ಉದ್ಯೋಗಿಯಾಗಿ ಕೆಲಸಕ್ಕೆ ತೆಗೆದುಕೊಂಡಿದ್ದಾರೆ. ಲಿಂಗ ಸಮಾನತೆಯ ದೃಷ್ಟಿಯಲ್ಲಿ ಇದೊಂದು ಮಹತ್ವದ ಹೆಜ್ಜೆ ಆಗಿದ್ದು ವೈಟ್ ಹೌಸ್ ನ ಸಿಬ್ಬಂದಿ ನೇಮಕ ಪ್ರಕ್ರಿಯೆಯನ್ನು ದೃಢಪಡಿಸಿದ್ದಾರೆ.
ಲೈಂಗಿಕ ಅಲ್ಪಸಂಖ್ಯಾತರ ಪರ ಹೋರಾಟ ನಡೆಸುತ್ತಿದ್ದ ರಫಿ ಫ್ರೀಡ್ ಮೆನ್-ಗರ್ಸ್ ಪನ್ ಅವರನ್ನು ವೈಟ್ ಹೌಸ್ ನ ನಿರ್ದೇಶಕರನ್ನಾಗಿ ನೇಮಕ ಮಾಡಿಕೊಳ್ಳಲಾಗಿದೆ. ಎಲ್ಲ ಸಮುದಾಯದ ಮುಖಂಡರು ಈ ನೇಮಕವನ್ನು ಸ್ವಾಗತ ಮಾಡಿದ್ದಾರೆ. ಲೈಂಗಿಕ ಅಲ್ಪಸಂಖ್ಯಾತ ಸಮುದಾಯಕ್ಕೆ ಫ್ರೀಡ್ ಮೆನ್-ಗರ್ಸ್ ಆದರ್ಶರಾಗಿ ನಿಲ್ಲಲಿದ್ದಾರೆ ಎಂದು ಹೇಳಿದ್ದಾರೆ.[ಸಲಿಂಗಿಗಳ ಮದುವೆಗೆ ಅಸ್ತು ಎಂದ ಸುಪ್ರೀಂಕೋರ್ಟ್]
ರಫಿ ಅವರ ಸಾಮಾಜಿಕ ಕೆಲಸದ ಬಗ್ಗೆ ಮೊದಲಿನಿಂದಲೂ ಗೊತ್ತಿತ್ತು. ಸ್ನೇಹಿತರೊಬ್ಬರು ಅವರ ಸಾಧನೆ ಮತ್ತು ಸವಾಲು ಎದುರಿಸಿದ ರೀತಿಯನ್ನು ತಿಳಿಸಿಕೊಟ್ಟ ಮೇಲೆ ವೈಟ್ ಹೌಸ್ ನಲ್ಲಿಯೇ ಉತ್ತಮ ಹುದ್ದೆಯೊಂದನ್ನು ನೀಡಿದ್ದೇವೆ ಎಂದು ಎನ್ ಸಿಟಿಇ ಕಾರ್ಯಕಾರಿ ನಿರ್ದೇಶಕಿ ಮಾರಾ ಕೆಯ್ಸಿಂಗ್ ತಿಳಿಸಿದ್ದಾರೆ.[ಸಲಿಂಗಕಾಮ ರೋಗ ಲಕ್ಷಣವಲ್ಲ: ಮನೋರೋಗ ವೈದ್ಯರು]
ಎಲ್ ಜಿಬಿಟಿ ಸಮುದಾಯಕ್ಕೆ ಸಮಾನತೆ ಕಲ್ಪಿಸಿಕೊಡುವ ಬಗ್ಗೆ ಬರಾಕ್ ಒಬಾಮಾ ಹಿಂದೆಯೇ ಮಾತನಾಡಿದ್ದರು. ಈಗ ಮಂಗಳಮುಖಿಯೊಬ್ಬರನ್ನು ಅಧಿಕೃತ ಸಿಬ್ಬಂದಿಯನ್ನಾಗಿ ನೇಮಕ ಮಾಡಿಕೊಂಡಿರುವುದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಚರ್ಚೆಗೆ ಕಾರಣವಾಗಿದೆ.