ನೂರು ವರ್ಷದಲ್ಲಿ ಮತ್ತೊಂದು 'ಭೂಮಿ' ಹುಡುಕಿ, ಜೀವ ಉಳಿಸಿಕೊಳ್ಳಿ: ಹಾಕಿಂಗ್
ಭೂಮಿಯಲ್ಲಿ ಅಬ್ಬಬ್ಬಾ ಅಂದರೆ ಇನ್ನು ನೂರು ವರ್ಷ ಮನುಷ್ಯ ಜೀವಿಸಬಹುದು. ಆ ನಂತರ ಆಗಲ್ಲ. ಆದ್ದರಿಂದ ವಾಸಿಸಲು ಯೋಗ್ಯ ಎನಿಸುವ ಹೊಸ ಭೂಮಿಯೊಂದನ್ನು ಹುಡುಕಿಕೊಳ್ಳಬೇಕಿದೆ ಎಂದು ಖ್ಯಾತ ವಿಜ್ಞಾನಿ ಸ್ಟೀಫನ್ ಹಾಕಿಂಗ್ ಹೇಳಿದ್ದಾರೆ
ಲಂಡನ್, ಮೇ 5: ಇನ್ನು ನೂರು ವರ್ಷದೊಳಗೆ ಮನುಷ್ಯರು ವಾಸಿಸಬಹುದಾದ ಮತ್ತೊಂದು ಗ್ರಹವನ್ನು ಹುಡುಕಿಕೊಳ್ಳಬೇಕು ಎಂದು ಬ್ರಿಟಿಷ್ ವಿಜ್ಞಾನಿ ಸ್ಟೀಫನ್ ಹಾಕಿಂಗ್ ಹೇಳಿದ್ದಾರೆ. ಹವಾಮಾನ ಬದಲಾವಣೆ, ಆಕಾಶಕಾಯಗಳ ದಾಳಿ ಹಾಗೂ ಹೆಚ್ಚುತ್ತಿರುವ ಜನಸಂಖ್ಯೆಯ ಕಾರಣಕ್ಕೆ ಹೊಸ ಗ್ರಹ ಹುಡುಕೊಕೊಳ್ಳುವುದು ಅನಿವಾರ್ಯ ಆಗಲಿದೆ ಎಂದು ಅವರು ಅಭಿಪ್ರಾಯ ಪಟ್ಟಿದ್ದಾರೆ.
ಬಿಬಿಸಿ ಸುದ್ದಿ ವಾಹಿನಿ ಆರಂಭಿಸಿರುವ ಹೊಸ ವಿಜ್ಞಾನ ಸರಣಿ ಕಾರ್ಯಕ್ರಮದಲ್ಲಿ ಪ್ರೊ ಹಾಕಿಂಗ್ ಹಾಗೂ ಅವರ ಮಾಜಿ ವಿದ್ಯಾರ್ಥಿ ಕ್ರಿಸ್ಟೋಫ್ ಗಾಲ್ ಫರ್ಡ್ ಮಾನವರು ಬೇರೆ ಯಾವ ಗ್ರಹದಲ್ಲಿ ಬದುಕಲು ಸಾಧ್ಯತೆ ಇದೆ ಎಂಬ ಬಗ್ಗೆ ವಿಚಾರ ಮಂಡನೆ ಮಾಡಲಿದ್ದಾರೆ. ಭೂಮಿಯ ಸ್ಥಿತಿ ದಿನದಿನಕ್ಕೂ ಹದಗೆಡುತ್ತಿದೆ. ಆದ್ದರಿಂದ ಜೀವ ಉಳಿಸಿಕೊಳ್ಳುವುದಕ್ಕೆ ಇದನ್ನು ಬಿಟ್ಟುಹೋಗಬೇಕು ಎಂದಿದ್ದಾರೆ.[ಭೂತಾಪಮಾನ ಹೀಗೇ ಏರುತ್ತಿದ್ದರೆ ಜಗತ್ಪ್ರಳಯ ಗ್ಯಾರಂಟಿ!]
ಜೀವನದ ಮೇಲೆ ಪ್ರಭಾವ ಬೀರಿದ ಬ್ರಿಟನ್ ನ ಅತ್ಯುತ್ತಮ ಆವಿಷ್ಕಾರ ಯಾವುದು ಎಂಬ ಬಗ್ಗೆ ಮತ ಹಾಕಲು ಸಾರ್ವಜನಿಕರನ್ನು ಕೇಳುವುದು ಈ ಕಾರ್ಯಕ್ರಮದ ಮತ್ತೊಂದು ಉದ್ದೇಶ ಎಂದು ದ ಟೆಲಿಗ್ರಾಫ್ ವರದಿ ಮಾಡಿದೆ. ಕಳೆದ ತಿಂಗಳಷ್ಟೇ ಪ್ರೊ ಹಾಕಿಂಗ್ ಎಚ್ಚರ ಹೇಳಿದ್ದರು. ಮಾನವರ ಆಕ್ರಮಣಕಾರಿ ಧೋರಣೆ, ಬೆಳೆಯುತ್ತಿರುವ ತಂತ್ರಜ್ಞಾನ, ಅಣ್ವಸ್ತ್ರ ಅಥವಾ ಜೈವಿಕ ಅಸ್ತ್ರಗಳ ಸಂಭವನೀಯ ಯುದ್ಧಗಳು ನಮ್ಮನ್ನೆಲ್ಲ ನಾಶ ಮಾಡಬಹುದು ಎಂದಿದ್ದಾರೆ.[ಇರುವುದೊಂದೇ ಭೂಮಿ: ರಕ್ಷಣೆ ನಮ್ಮೆಲ್ಲರ ಹೊಣೆ]
ಈ ಅಪಾಯದಿಂದ ಪಾರಾಗಬೇಕು ಅಂದರೆ ಇಡೀ ಜಗತ್ತು ಒಂದಾಗಬೇಕು ಎಂದಿರುವ ಹಾಕಿಂಗ್, ತಾನು ಬದುಕಲು ಬೇಕಾದ ಕೌಶಲದ ಕೊರತೆ ಮನುಷ್ಯರಲ್ಲಿದೆ. ಅದನ್ನು ರೂಢಿಸಿಕೊಳ್ಳಬೇಕು ಎಂದು ಕೂಡ ಅವರು ಹೇಳಿದ್ದಾರೆ.