ಇನ್ನೂ ಬುದ್ದಿ ಕಲಿಯದ ಚೀನಾ:ವಿವಾದಾತ್ಮಕ ಡಾಗ್ ಮೀಟ್ ಫೆಸ್ಟಿವಲ್‌ಗೆ ಚಾಲನೆ

Updated: Tuesday, June 23, 2020, 14:05 [IST]

ಬೀಜಿಂಗ್, ಜೂನ್ 23: ಚೀನಿಯರು ಮಾಡಿರುವ ತಪ್ಪಿಗೆ ಸದ್ಯಕ್ಕೆ ಬುದ್ದಿ ಕಲಿಯುವ ಹಾಗೆ ಕಾಣುತ್ತಿಲ್ಲ. ಇದಕ್ಕೆ ದೊಡ್ಡ ಉದಾಹರಣೆ, ಕೋವಿಡ್-19 ಸಂದರ್ಭದಲ್ಲೂ ಸಾವಿರಾರು ನಾಯಿಗಳನ್ನು ಹೊಡೆದು ಸಾಯಿಸುವ ವಿವಾದಾತ್ಮಕ ಯುಲಿನ್ ಡಾಗ್ ಮೀಟ್ ಫೆಸ್ಟಿವಲ್ಗೆ (ನಾಯಿ ಮಾಂಸದ ಹಬ್ಬ) ಚಾಲನೆ ನೀಡಲಾಗಿದೆ. ಚೀನಾದಲ್ಲಿ ಪ್ರಾಣಿ ಹಕ್ಕುಗಳ ಕಾರ್ಯಕರ್ತರ ಪ್ರತಿಭಟನೆಯ ಹೊರತಾಗಿಯೂ ಪ್ರಾರಂಭವಾಗಿದೆ.

10 ದಿನಗಳ ಕಾಲ ನಡೆಯುವ ಡಾಗ್ ಮೀಟ್ ಫೆಸ್ಟಿವಲ್

ರಾಯಿಟರ್ಸ್ ವರದಿಯ ಪ್ರಕಾರ, ನೈರುತ್ಯ ನಗರ ಯುಲಿನ್‌ನಲ್ಲಿ ನಡೆಯುವ ವಾರ್ಷಿಕ 10 ದಿನಗಳ ಉತ್ಸವವು ಸಾವಿರಾರು ಪ್ರವಾಸಿಗರನ್ನು ಆಕರ್ಷಿಸುತ್ತದೆ, ಅವರಲ್ಲಿ ಹಲವರು ಇಕ್ಕಟ್ಟಾದ ಪಂಜರಗಳಿಂದ ನಾಯಿಗಳನ್ನು ಖರೀದಿಸುತ್ತಾರೆ ಮತ್ತು ಅದರ ಮಾಂಸದಿಂದ ತಯಾರಿಸಿದ ಭಕ್ಷ್ಯಗಳನ್ನು ತಿನ್ನುತ್ತಾರೆ.

ಆದಾಗ್ಯೂ, ಈ ವರ್ಷ, ಗ್ರಾಹಕರ ಸಂಖ್ಯೆ ಕಡಿಮೆಯಾಗಿದೆ ಮತ್ತು ಕಾರ್ಯಕರ್ತರು ಇನ್ನಷ್ಟು ಕಡಿಮೆಯಾಗಬಹುದು ಎಂದು ಆಶಿಸಿದ್ದಾರೆ.

ಕೊರೊನಾ ನಡುವೆಯು ನಿರ್ಧಾರ ಬದಲಿಸದ ಚೀನಾ ಸರ್ಕಾರ

ಹೌದು, ಚೀನಾ ಸರ್ಕಾರವು ವಿಶ್ವದಾದ್ಯಂತ ಕೋವಿಡ್-19 ಸಾಂಕ್ರಾಮಿಕ ರೋಗದ ನಡುವೆಯು ಈ ಕೆಟ್ಟ ನಿರ್ಧಾರವನ್ನು ತೆಗೆದುಕೊಂಡಿದೆ.

''ಯುಲಿನ್ ಪ್ರಾಣಿಗಳ ಸಲುವಾಗಿ ಮಾತ್ರವಲ್ಲದೆ ಅದರ ಜನರ ಆರೋಗ್ಯ ಮತ್ತು ಸುರಕ್ಷತೆಗೂ ಬದಲಾಗುತ್ತದೆ ಎಂದು ನಾನು ಭಾವಿಸುತ್ತೇನೆ. ಹಬ್ಬದ ಹೆಸರಿನಲ್ಲಿ ಜನಸಂದಣಿಯ ಮಾರುಕಟ್ಟೆಗಳಲ್ಲಿ ಮತ್ತು ರೆಸ್ಟೋರೆಂಟ್‌ಗಳಲ್ಲಿ ವ್ಯಾಪಾರ ಮಾಡಲು ಮತ್ತು ನಾಯಿ ಮಾಂಸವನ್ನು ಸೇವಿಸಲು ಸಾಮೂಹಿಕ ಕೂಟಗಳಿಗೆ ಅವಕಾಶ ನೀಡುವುದು ಸಾರ್ವಜನಿಕ ಆರೋಗ್ಯಕ್ಕೆ ಗಮನಾರ್ಹ ಅಪಾಯವನ್ನುಂಟುಮಾಡುತ್ತದೆ "ಎಂದು ಪ್ರಾಣಿ ಹಕ್ಕುಗಳ ಗುಂಪಿನ ಹ್ಯೂಮ್ಯಾನ್ ಸೊಸೈಟಿ ಇಂಟರ್‌ನ್ಯಾಷನಲ್‌ನ ಚೀನಾ ನೀತಿ ತಜ್ಞ ಪೀಟರ್ ಲಿ ಉಲ್ಲೇಖಿಸಿದ್ದಾರೆ.

ವರ್ಷಕ್ಕೆ 10 ಮಿಲಿಯನ್ ನಾಯಿಗಳ ಬಲಿ

ಹ್ಯೂಮ್ಯಾನ್ ಸೊಸೈಟಿ ಇಂಟರ್‌ನ್ಯಾಷನಲ್ ಪ್ರಕಾರ, ಚೀನಾದಲ್ಲಿ ವಾರ್ಷಿಕವಾಗಿ ಸುಮಾರು 10 ಮಿಲಿಯನ್ ನಾಯಿಗಳನ್ನು ಕೊಲ್ಲಲಾಗುತ್ತದೆ. ಅನೇಕರು ಯುಲಿನ್ ಹಬ್ಬಕ್ಕಾಗಿ ಬೀದಿಯಲ್ಲಿರುವ ಮತ್ತು ಅಕ್ಕ-ಪಕ್ಕದ ಮನೆಗಳಿಂದ ನಾಯಿಗಳನ್ನು ಅಪಹರಿಸುತ್ತಾರೆ.

ಚೀನಾ ನಿರ್ಧಾರಕ್ಕೆ ಸ್ಥಳೀಯ ಸಂಘಟನೆಗಳ ವಿರೋಧ

ಡಾಗ್ ಮೀಟ್ ಫೆಸ್ಟಿವಲ್‌ಗೆ ಅವಕಾಶ ನೀಡಿರುವ ಚೀನಾ ಸರ್ಕಾರದ ನಿರ್ಧಾರಕ್ಕೆ ಸ್ಥಳೀಯ ಜನರು ಮತ್ತು ಸಂಘಟನೆಗಳ ವಿರೋಧವಿದೆ. ಸಾಮಾಜಿಕ ಜಾಲತಾಣ ಮತ್ತು ಟ್ವಿಟರ್‌ಗಳ ಮೂಲಕ ಫೋಟೊಗಳನ್ನು ಅಪ್‌ಲೋಡ್ ಮಾಡಿ ಸ್ಥಳೀಯರು ನಾಯಿ ಹತ್ಯೆಗೆ ಮತ್ತು ಮೇಳಕ್ಕೆ ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ.