ಕೊರೊನಾವೈರಸ್‌ ಮೂಲದ ಬಗ್ಗೆ ಮತ್ತೆ WHO ತನಿಖೆಯನ್ನು ತಿರಸ್ಕರಿಸಿದ ಚೀನಾ

Updated: Friday, August 13, 2021, 14:23 [IST]

ಬೀಜಿಂಗ್, ಆ. 13: ಕೊರೊನಾ ವೈರಸ್‌ ಸೋಂಕಿನ ಮೂಲಗಳ ಬಗ್ಗೆ ಹೊಸದಾಗಿ ತನಿಖೆ ನಡೆಸಬೇಕೆಂಬ ವಿಶ್ವ ಆರೋಗ್ಯ ಸಂಸ್ಥೆಯ ಕರೆಗಳನ್ನು ಚೀನಾ ಶುಕ್ರವಾರ ತಿರಸ್ಕರಿಸಿದ್ದು, ಕೊರೊನಾ ವೈರಸ್‌ ಸೋಂಕು ಹೇಗೆ ಆರಂಭವಾಯಿತು ಎಂಬುದನ್ನು ಕಂಡುಹಿಡಿಯಲು "ರಾಜಕೀಯ" ಪ್ರಯತ್ನಗಳನ್ನು ಬೆಂಬಲಿಸುತ್ತದೆ ಎಂದು ಹೇಳಿದೆ.

ಕೊರೊನಾ ವೈರಸ್‌ ಸೋಂಕು ವಿಶ್ವದಲ್ಲಿ ಮೊದಲ ಬಾರಿಗೆ ಚೀನಾದ ವುಹಾನ್‌ನಲ್ಲಿ ಪತ್ತೆಯಾಗಿದ್ದು ವಿಶ್ವದಾದ್ಯಂತ ನಾಲ್ಕು ದಶಲಕ್ಷಕ್ಕೂ ಹೆಚ್ಚು ಜನರನ್ನು ಬಲಿ ಪಡೆದುಕೊಂಡಿದೆ. ಈ ನಡುವೆ ಕೊರೊನಾ ವೈರಸ್‌ ಸೋಂಕಿನ ಉಗಮದ ಬಗ್ಗೆ ತನಿಖೆ ನಡೆಸಬೇಕು ಎಂಬ ಒತ್ತಾಯಗಳು ಹೆಚ್ಚುತ್ತಿದೆ. ಈ ಹಿಂದೆ ಅಮೆರಿಕದ ಅಧ್ಯಕ್ಷರಾಗಿದ್ದ ಡೊನಾಲ್ಡ್‌ ಟ್ರಂಪ್‌ ಚೀನಾದ ವುಹಾನ್‌ ಲ್ಯಾಬ್‌ನಿಂದಲ್ಲೇ ಈ ಕೊರೊನಾ ವೈರಸ್‌ ಸೋಂಕು ಹೊರಹೊಮ್ಮಿದೆ ಎಂದು ಆರೋಪ ಮಾಡಿದ ಬೆನ್ನಲ್ಲೇ ಈ ಬಗ್ಗೆ ಅಧ್ಯಯನಗಳು ಅಧಿಕವಾಗಿದೆ.

ಈಗ ಮತ್ತೆ ಕೊರೊನಾ ವೈರಸ್‌ ಸೋಂಕಿನ ಮೂಲಗಳ ಬಗ್ಗೆ ಹೊಸದಾಗಿ ತನಿಖೆ ನಡೆಸಬೇಕೆಂದು ವಿಶ್ವ ಆರೋಗ್ಯ ಸಂಸ್ಥೆಯು ಹೇಳಿದ್ದು, ಇದು ಬೀಜಿಂಗ್‌ ಮೇಲೆ ಮತ್ತೆ ಒತ್ತಡವನ್ನು ಹೇರಿದೆ. ಆದರೆ ಚೀನಾ ಈ ಪ್ರಸ್ತಾಪವನ್ನು ತಿರಸ್ಕರಿಸಿದ್ದು, ಕೊರೊನಾ ವೈರಸ್‌ ಆರಂಭದ ಬಗ್ಗೆ ತನಿಖೆ ನಡೆಸಿದರೆ ರಾಜಕೀಯ ತಿರುವುಗಳನ್ನು ವಿನಾ ಕಾರಣ ಪಡೆದುಕೊಳ್ಳುತ್ತದೆ ಎಂದು ಸ್ಪಷ್ಟವಾಗಿ ವಿಶ್ವ ಆರೋಗ್ಯ ಸಂಸ್ಥೆಯ ಕರೆಯನ್ನು ತಳ್ಳಿಹಾಕಿದೆ.

ವೈರಸ್‌ ಮೂಲ ಪತ್ತೆಯಲ್ಲಿ ವಿಫಲವಾದ ಡಬ್ಲ್ಯುಎಚ್‌ಒ

ಡಬ್ಲ್ಯುಎಚ್‌ಒ ಅಂತಾರಾಷ್ಟ್ರೀಯ ತಜ್ಞರ ತಂಡದಿಂದ ವಿಳಂಬವಾದ ಮತ್ತು ಹೆಚ್ಚು ರಾಜಕೀಯಗೊಳಿಸಿದ ವಿಸ್ಟ್ ಜನವರಿ 2021 ರಲ್ಲಿ ವುಹಾನ್‌ಗೆ ಹೋಗಿ ಮೊದಲ ಹಂತದ ವರದಿಯನ್ನು ತಯಾರಿಸಿತು. ಇದನ್ನು ವಿಶ್ವ ಆರೋಗ್ಯ ಸಂಸ್ಥೆಯ ತಜ್ಞರ ತಂಡವು ಚೀನೀ ಸಹವರ್ತಿಗಳ ಜೊತೆಯಲ್ಲಿ ಸಿದ್ದ ಪಡಿಸಿದ್ದರು. ಆದರೆ ಈ ತಂಡವು ಕೊರೊನಾ ವೈರಸ್‌ ಸೋಂಕು ಮೊದಲು ಎಲ್ಲಿ ಹುಟ್ಟಿಕೊಂಡಿದೆ ಎಂಬುವುದನ್ನು ಪತ್ತೆ ಹಚ್ಚುವಲ್ಲಿ ವಿಫಲವಾಗಿದೆ. ಆದರೆ ಕೊರೊನಾ ವೈರಸ್‌ ರೋಗದ ಮೂಲದ ಬಗ್ಗೆ ತನ್ನ ತನಿಖೆಯನ್ನು ಪುನಶ್ಚೇತನಗೊಳಿಸಲು ಗುರುವಾರದಂದು ಡಬ್ಲ್ಯುಎಚ್‌ಒ ಚೀನಾವನ್ನು ಕೋವಿಡ್ -19 ಪ್ರಕರಣಗಳಿಂದ ಕಚ್ಚಾ ಡೇಟಾವನ್ನು ಹಂಚಿಕೊಳ್ಳುವಂತೆ ಕೋರಿದೆ.

ಮತ್ತೆ ತನಿಖೆ ಬೇಡ ಎಂದ ಚೀನಾ

ವಿಶ್ವ ಆರೋಗ್ಯ ಸಂಸ್ಥೆ ಮತ್ತೆ ಕೊರೊನಾ ವೈರಸ್‌ ಉಗಮದ ಬಗ್ಗೆ ತನಿಖೆ ನಡೆಸಲು ಮುಂದಾದ ಹಿನ್ನೆಲೆ ಆರಂಭದ ತನಿಖೆ ಸಾಕು ಮತ್ತು ವೈಜ್ಞಾನಿಕ ವಿಚಾರಣೆಯ ಬದಲು ಹೆಚ್ಚಿನ ದತ್ತಾಂಶಗಳ ಕರೆಗಳು ರಾಜಕೀಯದಿಂದ ಪ್ರೇರಿತವಾಗಿವೆ ಎಂದು ಚೀನಾ ತನ್ನ ನಿಲುವನ್ನು ಪುನರಾವರ್ತಿಸಿತು. ಜನವರಿಯಲ್ಲಿ ಡಬ್ಲ್ಯುಎಚ್‌ಒ ತಜ್ಞರ ತಂಡದ ವುಹಾನ್ ಭೇಟಿಯ ನಂತರ ಉಪ ವಿದೇಶಾಂಗ ಸಚಿವ ಮಾ ಝೋಜು ಸುದ್ದಿಗಾರರೊಂದಿಗೆ ಮಾತನಾಡಿ, "ನಾವು ರಾಜಕೀಯ ಪತ್ತೆಹಚ್ಚುವಿಕೆಯನ್ನು ವಿರೋಧಿಸುತ್ತೇವೆ. ಆದರೆ ನಾವು ವೈಜ್ಞಾನಿಕ ಪತ್ತೆಹಚ್ಚುವಿಕೆಯನ್ನು ಬೆಂಬಲಿಸುತ್ತೇವೆ," ಎಂದು ಹೇಳಿದ್ದರು.

ಬಾವಲಿಯಿಂದ ಹರಡುವ ಸೋಂಕು?

ಆ ವರದಿಯು ವೈರಸ್‌ನಿಂದ ಬಾವಲಿಗಳಿಂದ ಮನುಷ್ಯರಿಗೆ ಮಧ್ಯಂತರ ಪ್ರಾಣಿಯ ಮೂಲಕ ಜಿಗಿಯುವುದು ಅತ್ಯಂತ ಸಂಭವನೀಯ ಸನ್ನಿವೇಶವಾಗಿದ್ದು, ವುಹಾನ್‌ನ ವೈರಾಲಜಿ ಲ್ಯಾಬ್‌ಗಳಿಂದ ಸೋರಿಕೆಯು "ಅತ್ಯಂತ ಅಸಂಭವವಾಗಿದೆ" ಎಂದು ಹೇಳಿದೆ. ತನಿಖೆಯ ಹೊಸ ಮಾರ್ಗಗಳ ಸಲಹೆಗಳನ್ನು ಮಾ ಝೋಜು ತಿರಸ್ಕರಿಸಿದ್ದಾರೆ. "ಡಬ್ಲ್ಯುಎಚ್‌ಒ ಮತ್ತು ಚೀನಾ ಜಂಟಿ ವರದಿಯ ತೀರ್ಮಾನಗಳು ಮತ್ತು ಶಿಫಾರಸುಗಳನ್ನು ಅಂತರರಾಷ್ಟ್ರೀಯ ಸಮುದಾಯ ಮತ್ತು ವೈಜ್ಞಾನಿಕ ಸಮುದಾಯವು ಗುರುತಿಸಿದೆ," ಎಂದು ಮಾ ಝೋಜು ತಿಳಿಸಿದ್ದಾರೆ. "ಭವಿಷ್ಯದ ಜಾಗತಿಕ ಪತ್ತೆಹಚ್ಚುವಿಕೆಯ ಕೆಲಸವು ಹೊಸದನ್ನು ಪ್ರಾರಂಭಿಸುವ ಬದಲು ಈ ವರದಿಯ ಆಧಾರದ ಮೇಲೆ ಮಾತ್ರ ಕೈಗೊಳ್ಳಬಹುದು."

ಏನಿದು ಪ್ರಯೋಗಾಲಯ ಸೋರಿಕೆ ಸಿದ್ಧಾಂತ?

ಹೊರಗಿನ ತನಿಖಾಧಿಕಾರಿಗಳಿಗೆ ತೆರೆದುಕೊಳ್ಳಲು ಚೀನಾ ಹಿಂಜರಿಯುತ್ತಿರುವ ಹಿನ್ನೆಲೆಯಲ್ಲಿ, ಕೊರೊನಾ ವೈರಸ್‌ ಚೀನಾದ ಪ್ರಯೋಗಾಲಯದಿಂದ ಸೋರಿಕೆಯಾಗಿರಬಹುದೆಂಬ ಸಿದ್ಧಾಂತವನ್ನು ಪರಿಗಣಿಸಲು ತಜ್ಞರು ಹೆಚ್ಚು ಮುಕ್ತರಾಗಿದ್ದಾರೆ. ಆದರೆ ಚೀನಾ ಮಾತ್ರ ಇದನ್ನು ''ಯುಎಸ್ ಬಲಪಂಥೀಯರು ಪ್ರಚಾರ ಮಾಡಿದ ಪಿತೂರಿ," ಎಂದು ತಿರಸ್ಕರಿಸಿದರು. ಡಬ್ಲ್ಯುಎಚ್‌ಒ ಮುಖ್ಯಸ್ಥ ಟೆಡ್ರೊಸ್ ಅಧಾನೋಮ್ ಘೆಬ್ರೆಯೆಸಸ್ ಕೂಡ ವುಹಾನ್‌ನ ವೈರಾಲಜಿ ಪ್ರಯೋಗಾಲಯಗಳ ಆರಂಭಿಕ ತನಿಖೆಯು ಸಾಕಷ್ಟು ದೂರ ಹೋಗಿಲ್ಲ ಎಂದು ಹೇಳಿದ್ದಾರೆ. ಆದರೆ ಅಧ್ಯಕ್ಷ ಜೋ ಬೈಡೆನ್ ಮೇ ತಿಂಗಳಲ್ಲಿ ಯುಎಸ್ ಗುಪ್ತಚರ ಸಮುದಾಯದಿಂದ ಕೊರೊನಾ ವೈರಸ್ ಮೂಲದ ಬಗ್ಗೆ ಪ್ರತ್ಯೇಕ ತನಿಖೆಗೆ ಆದೇಶಿಸಿದರು.

ವುಹಾನ್ ಪ್ರಯೋಗಾಲಯಗಳ ಲೆಕ್ಕಪರಿಶೋಧನೆಯನ್ನು ಒಳಗೊಂಡ ತನಿಖೆಯ ಎರಡನೇ ಹಂತಕ್ಕಾಗಿ ಕಳೆದ ತಿಂಗಳು ಡಬ್ಲ್ಯುಎಚ್‌ಒ ಕರೆ ಬೀಜಿಂಗ್ ಅನ್ನು ಕೆರಳಿಸಿತು. ಉಪ ಆರೋಗ್ಯ ಸಚಿವ ಜೆಂಗ್ ಯಿಕ್ಸಿನ್ ಈ ಯೋಜನೆಯು "ಸಾಮಾನ್ಯ ಜ್ಞಾನಕ್ಕೆ ಅಗೌರವ ಮತ್ತು ವಿಜ್ಞಾನದ ಬಗ್ಗೆ ಅಹಂಕಾರವನ್ನು ತೋರಿಸಿದೆ," ಎಂದು ಹೇಳಿದರು. ಏತನ್ಮಧ್ಯೆ, ವುಹಾನ್‌ಗೆ ಅಂತಾರಾಷ್ಟ್ರೀಯ ಕಾರ್ಯಾಚರಣೆಯನ್ನು ಮುನ್ನಡೆಸಿದ ಡ್ಯಾನಿಶ್ ವಿಜ್ಞಾನಿ ಪೀಟರ್ ಬೆನ್ ಎಂಬಾರೆಕ್, ಪ್ರಯೋಗಾಲಯದ ಉದ್ಯೋಗಿಯೊಬ್ಬರು ಕ್ಷೇತ್ರದಲ್ಲಿ ಮಾದರಿಗಳನ್ನು ತೆಗೆದುಕೊಳ್ಳುವಾಗ ಸೋಂಕು ಬಾವಲಿಗಳಿಂದ ಮನುಷ್ಯರಿಗೆ ಹೇಗೆ ಹರಡುತ್ತದೆ ಎಂಬ ಊಹೆಯ ಅಡಿಯಲ್ಲಿ ಬರುತ್ತದೆ ಎಂದು ಹೇಳಿದರು. ಡ್ಯಾನಿಶ್ ಪಬ್ಲಿಕ್ ಚಾನೆಲ್ ಟಿವಿ 2 ಗೆ ಪ್ರತಿಕ್ರಿಯಿಸಿದ ಅವರು, ಶಂಕಿತ ಬಾವಲಿಗಳು ವುಹಾನ್ ಪ್ರದೇಶದಲ್ಲ ಮತ್ತು ಅದನ್ನು ಸಂಪರ್ಕಿಸಿದ ಏಕೈಕ ಜನರು ವುಹಾನ್ ಲ್ಯಾಬ್‌ಗಳ ಕೆಲಸಗಾರರು ಎಂದಿದ್ದಾರೆ.