ಧಾರಾವಿಯನ್ನು ಸ್ಮಾರ್ಟ್ ಸಿಟಿಯನ್ನಾಗಿ ಪರಿವರ್ತಿಸುವ ಯೋಜನೆ: ಅದಾನಿ ಮೇಲೆ ಅನುಮಾನ!

ಗೌತಮ್ ಅದಾನಿ ಏಷ್ಯಾದ ಅತಿದೊಡ್ಡ ಕೊಳೆಗೇರಿಗಳಲ್ಲಿ ಒಂದಾದ ಧಾರಾವಿಯಿಂದ ಒಂದು ಮಿಲಿಯನ್ ನಿವಾಸಿಗಳನ್ನು ಸ್ಥಳಾಂತರಿಸುವ ಯೋಜನೆಯನ್ನು ಪ್ರಸ್ತಾಪಿಸಿದ್ದಾರೆ. ಆದರೆ ಇದು ಕೊಳೆಗೇರಿ ನಿವಾಸಿಗಳಲ್ಲಿ ಕಳವಳ ಮೂಡಿಸಿದೆ.

ಮುಂಬೈನ ಕೊಳೆಗೇರಿ ಪ್ರದೇಶವಾದ ಧಾರಾವಿಯನ್ನು ಸ್ಮಾರ್ಟ್ ಸಿಟಿಯನ್ನಾಗಿ ಪರಿವರ್ತಿಸುವ ಕಾರ್ಯವನ್ನು ಭಾರತೀಯ ಬಿಲಿಯನೇರ್ ಗೌತಮ್ ಅದಾನಿ ಕೈಗೆತ್ತಿಕೊಂಡಿದ್ದಾರೆ. ಆದರೆ ಇದಕ್ಕಾಗಿ ಇಲ್ಲಿನ 1 ಮಿಲಿಯನ್ ಜನರಿಗೆ ಪುನರ್ವಸತಿ ಕಲ್ಪಿಸಬೇಕು. ಇದೊಂದು ಸವಾಲಿನ ಕೆಲಸ.

ಇದಕ್ಕೂ ಮೊದಲು ಮುಂಬೈನ ಈ ಕೊಳಚೆ ಪ್ರದೇಶವನ್ನು ಅಭಿವೃದ್ಧಿಪಡಿಸಲು ಹಲವು ಪ್ರಯತ್ನಗಳನ್ನು ಮಾಡಲಾಗಿತ್ತು. ಆದರೆ 94 ಎಕರೆ (240 ಹೆಕ್ಟೇರ್) ಕೊಳಚೆ ಪ್ರದೇಶದ ಅಭಿವೃದ್ಧಿಗೆ ಎಷ್ಟೇ ಪ್ರಯತ್ನ ಮಾಡಿದರೂ ಯಾವುದೇ ಬದಲಾವಣೆಗಳಾಗಿಲ್ಲ.

ರಾಯಿಟರ್ಸ್ ವರದಿ ಮಾಡಿದಂತೆ, ಧಾರಾವಿ ಪುನರಾಭಿವೃದ್ಧಿ ಯೋಜನೆಯಲ್ಲಿ ಮುಂದಾಳತ್ವ ವಹಿಸಿ, ಗೌತಮ್ ಅದಾನಿ ಅವರು ಹಲವು ವರ್ಷಗಳ ವಿಫಲ ಪ್ರಯತ್ನಗಳ ನಂತರ ಜುಲೈನಲ್ಲಿ ಮಹಾರಾಷ್ಟ್ರ ರಾಜ್ಯ ಸರ್ಕಾರದಿಂದ $614 ಮಿಲಿಯನ್ ಒಪ್ಪಂದವನ್ನು ಪಡೆದುಕೊಂಡರು. ಇದನ್ನು ಇದೇ ಸೆಪ್ಟೆಂಬರ್‌ನಲ್ಲಿ ಪ್ರಾರಂಭವಾಗಲು ಯೋಜಿಸಲಾಗಿದೆ.

ಇದು ಸದ್ಯ ಸ್ಥಳೀಯರ ನಿದ್ದೆಗೆಡಿಸಿದೆ. ಅಷ್ಟಕ್ಕೂ ಏನಿದು ಒಪ್ಪಂದ? ಏನಿದು ಧಾರಾವಿ? ಇದನ್ನು ಯಾಕೆ ಪುನರಾಭಿವೃದ್ಧಿ ಮಾಡಲಾಗುತ್ತಿದೆ? ಗೌತಮ್ ಅದಾನಿ ಪುನರಾಭಿವೃದ್ಧಿ ಒಪ್ಪಂದ ಮಾಡಿಕೊಂಡಿದ್ದು ಯಾಕೆ? ಪುನರಾಭಿವೃದ್ಧಿ ಯೋಜನೆಯಿಂದ ನಿವಾಸಿಗಳಲ್ಲಿ ಆತಂಕ ಮನೆ ಮಾಡಿರುವುದು ಯಾಕೆ? ಎಂಬಿತ್ಯಾದಿ ಪ್ರಶ್ನೆಗಳಿಗೆ ಉತ್ತರ ಇಲ್ಲಿದೆ.

ಏನಿದು ಧಾರಾವಿ?

ಧಾರಾವಿಯ ಉದಯವು 1800 ರ ದಶಕದ ಉತ್ತರಾರ್ಧದಲ್ಲಿ ಆಗಿದೆ. ಆಗ ಕುಂಬಾರರು, ಚರ್ಮದ ಕುಶಲಕರ್ಮಿಗಳು, ಕಾರ್ಮಿಕರು ಈ ಪ್ರದೇಶದಲ್ಲಿ ಸಣ್ಣ ವ್ಯಾಪಾರವನ್ನು ಪ್ರಾರಂಭಿಸಿದರು. ಸ್ಲಂ ನಿವಾಸಿಗಳು ಈ ಜಮೀನುಗಳನ್ನು ಒತ್ತುವರಿ ಮಾಡಿ ಗುಡಿಸಲುಗಳನ್ನು ನಿರ್ಮಿಸಿಕೊಂಡಿದ್ದಾರೆ. ಕ್ರಮೇಣ ಪ್ರದೇಶವು ಹೆಚ್ಚಾಗುತ್ತಾ ಬಂದಿದೆ.

ಈಗ ಏಷ್ಯಾದ ಅತಿದೊಡ್ಡ ಕೊಳೆಗೇರಿಗಳಲ್ಲಿ ಧಾರಾವಿ ಒಂದಾಗಿದೆ. ಈ ಪ್ರದೇಶ ಚರ್ಮದ ಸರಕುಗಳ ಉತ್ಪಾದನೆಗೆ ಹೆಸರುವಾಸಿಯಾಗಿದೆ. ತೆರೆದ ಚರಂಡಿಗಳು, ಸಾಮುದಾಯಿಕ ಶೌಚಾಲಯಗಳು ಸೇರಿದಂತೆ ಕಳಪೆ ಜೀವನ ಶೈಲಿಯನ್ನು ಹೊಂದಿದ ಪ್ರದೇಶವಾಗಿದೆ. ಮುಂಬೈನ ವಿಮಾನ ನಿಲ್ದಾಣ ಮತ್ತು ಉನ್ನತ ಮಟ್ಟದ ಕಾರ್ಪೊರೇಟ್ ಕಟ್ಟಡಗಳ ಬಳಿ ನೆಲೆಗೊಂಡಿರುವ ಈ ಕೊಳೆಗೇರಿಯ ಪರಿಸ್ಥಿತಿಗಳು ಭಾರತದ ಒಟ್ಟಾರೆ ಅಭಿವೃದ್ಧಿ ಪ್ರಗತಿಗೆ ವ್ಯತಿರಿಕ್ತವಾಗಿದೆ.

ಹೀಗಾಗಿ ಇದನ್ನು ಅಭಿವೃದ್ಧಿ ಮಾಡಲು ಸರ್ಕಾರ ಮುಂದಾಗಿದೆ. ಇದಕ್ಕಾಗಿ ಕರೆದ ಬಿಡ್‌ನಲ್ಲಿ ಮಹಾರಾಷ್ಟ್ರ ರಾಜ್ಯ ಸರ್ಕಾರದಿಂದ $614 ಮಿಲಿಯನ್ ಒಪ್ಪಂದವನ್ನು ಅದಾನಿ ಗ್ರೂಪ್ ಮಾಡಿಕೊಂಡಿದೆ. ಅದಾನಿಯವರ ಯೋಜನೆಯು ಕೊಳೆಗೇರಿಯನ್ನು 'ಅನೈರ್ಮಲ್ಯ, ಶೋಚನೀಯ' ಸ್ಥಳವೆಂದು ಹೇಳುತ್ತದೆ. ಇದರ ಉದ್ದೇಶ ಪ್ರಸ್ತುತ ನಿವಾಸಿಗಳಿಗೆ ಹೊಸ ವಸತಿ ಮತ್ತು ವ್ಯಾಪಾರ ಸ್ಥಳಗಳನ್ನು ಒದಗಿಸುವುದಾಗಿದೆ.

ಅದಾನಿ ಹೂಡಿಕೆ ಎಷ್ಟು?

ಸಲಹಾ ಸಂಸ್ಥೆ ಲಿಯಾಸೆಸ್ ಫೋರಸ್‌ನ ಅಂದಾಜಿನ ಪ್ರಕಾರ, ಧಾರಾವಿಯನ್ನು ನವೀಕರಿಸುವಲ್ಲಿ ಅದಾನಿ ಹೂಡಿಕೆಯು $12 ಶತಕೋಟಿಯಷ್ಟಿರಬಹುದು. ಈ ಉಪಕ್ರಮಕ್ಕೆ ಬದಲಾಗಿ ಅದಾನಿ ಸಮೂಹವು ಸುಮಾರು $24 ಶತಕೋಟಿ ಆದಾಯವನ್ನು ಗಳಿಸುವ ಸಾಮರ್ಥ್ಯವನ್ನು ಹೊಂದಿರುವ ಅಭಿವೃದ್ಧಿ ಹಕ್ಕುಗಳನ್ನು ಪಡೆಯುತ್ತದೆ.

2000ನೇ ಇಸವಿಯ ಮೊದಲು ಧಾರಾವಿಯಲ್ಲಿ ವಾಸಿಸುತ್ತಿದ್ದ ವ್ಯಕ್ತಿಗಳು ಮುಖ್ಯವಾಗಿ ನೆಲ ಅಂತಸ್ತಿನಲ್ಲಿ ವಾಸಿಸುವವರುಪುನರಾಭಿವೃದ್ಧಿ ಯೋಜನೆಯ ಭಾಗವಾಗಿ ಪೂರಕ ವಸತಿಗಳನ್ನು ಪಡೆಯುತ್ತಾರೆ. ಆದಾಗ್ಯೂ ಹೆಚ್ಚಿನ ಮಹಡಿಗಳಲ್ಲಿ ವಾಸಿಸುವ ಸರಿಸುಮಾರು 700,000 ಜನರು ಸರ್ಕಾರದಿಂದ ಅನರ್ಹರು ಎಂದು ವರ್ಗೀಕರಿಸಲಾಗಿದೆ. 10 ಕಿಲೋಮೀಟರ್ ದೂರದಲ್ಲಿರುವ ಘಟಕಗಳಿಗೆ ಸ್ಥಳಾಂತರಿಸುವ ಆಯ್ಕೆಯನ್ನು ಅವರಿಗೆ ನೀಡಲಾಗುತ್ತದೆ. ಇದು ಈ ನಿವಾಸಿಗಳಿಗೆ ಮನೆಯ ಮುಂಗಡ ವೆಚ್ಚಗಳು ಅಥವಾ ಹೆಚ್ಚಿದ ಬಾಡಿಗೆ ಶುಲ್ಕವನ್ನು ಉಂಟುಮಾಡಬಹುದು. ಹೀಗಾಗಿ ಸ್ಥಳೀಯರು ಆತಂಕವನ್ನು ಹೊಂದಿದ್ದಾರೆ.

ಈ ಯೋಜನೆ ಯಾವಾಗ ಆರಂಭ?

ಇದನ್ನು ಸೆಪ್ಟೆಂಬರ್‌ನಲ್ಲಿ ಪ್ರಾರಂಭವಾಗಲು ಯೋಜಿಸಲಾಗಿದೆ. ಈ ನವೀಕರಣವು ಅದಾನಿಗೆ ಸವಾಲಿನ ಕೆಲಸವಾಗಿದೆ. ಯಾಕೆಂದರೆ US ಕಿರು-ಮಾರಾಟಗಾರ ಹಿಂಡೆನ್‌ಬರ್ಗ್ ಪ್ರತಿಪಾದಿಸಿದಂತೆ, ಪ್ರಶ್ನಾರ್ಹ ಚಟುವಟಿಕೆಗಳ ಆರೋಪಗಳಿಂದಾಗಿ ಅದಾನಿ ಅವರ ಸಂಘಟಿತ ಕಂಪನಿಯ ಮಾರುಕಟ್ಟೆ ಮೌಲ್ಯವು $150 ಶತಕೋಟಿ ನಷ್ಟವನ್ನು ಅನುಭವಿಸಿದೆ.

ಹೀಗಾಗಿ ರಾಯಿಟರ್ಸ್ ಜೊತೆಗಿನ ಸಂಭಾಷಣೆಯಲ್ಲಿ, ಧಾರಾವಿಯ ಕೆಲವು ನಿವಾಸಿಗಳು ಬಿಲಿಯನೇರ್‌ ಅದಾನಿಯ ಆರ್ಥಿಕ ತೊಂದರೆಗಳು ತಮ್ಮ ಆತಂಕವನ್ನು ಹೆಚ್ಚಿಸಿವೆ ಎಂದು ಉಲ್ಲೇಖಿಸಿದ್ದಾರೆ. ಮಾತ್ರವಲ್ಲದೆ ಅದಾನಿಯ ಪುನರಾಭಿವೃದ್ಧಿ ಯೋಜನೆಗಳು ಪ್ರತಿಸ್ಪರ್ಧಿ ಸೆಕ್‌ಲಿಂಕ್ ಟೆಕ್ನಾಲಜೀಸ್ ಕಾರ್ಪೊರೇಷನ್ ಪ್ರಸ್ತುತಪಡಿಸಿದ ಕಾನೂನು ವಿವಾದದ ರೂಪದಲ್ಲಿ ಹೊಸ ಸವಾಲನ್ನು ಎದುರಿಸುತ್ತಿವೆ. ಏನಿದು ಸೆಕ್‌ಲಿಂಕ್ ಟೆಕ್ನಾಲಜೀಸ್ ಕಾರ್ಪೊರೇಷನ್?

ಮುಂಬೈನ ಕೊಳೆಗೇರಿ ನಿವಾಸಿಗಳ ಸ್ಥಿತಿ ಸುಧಾರಣೆಗೆ ಅನುಮತಿ:-

*1971-76ರ ಅವಧಿಯಲ್ಲಿ ಮಹಾರಾಷ್ಟ್ರ ರಾಜ್ಯ ಸರ್ಕಾರವು ಮುಂಬೈನ ಕೊಳೆಗೇರಿ ನಿವಾಸಿಗಳ ಸ್ಥಿತಿಯನ್ನು ಸುಧಾರಿಸಲು ಕಾನೂನನ್ನು ಅಂಗೀಕರಿಸಿತು. ಇದರ ಅಡಿಯಲ್ಲಿ ವಸತಿ, ವಿದ್ಯುತ್, ಶೌಚಾಲಯದ ವ್ಯವಸ್ಥೆ ಮಾಡಲಾಗಿತ್ತು.

*2004-05 ರ ಅವಧಿಯಲ್ಲಿ ಮಹಾರಾಷ್ಟ್ರ ಸರ್ಕಾರ ಧಾರಾವಿಯ ಪುನರಾಭಿವೃದ್ಧಿಗೆ ಅನುಮೋದನೆ ನೀಡಿತು ಮತ್ತು ಯೋಜನೆಯನ್ನು ಸ್ಲಂ ಪುನರ್ವಸತಿ ಪ್ರಾಧಿಕಾರಕ್ಕೆ ನೇಮಿಸಿತು.

*2007-08 ರಲ್ಲಿ, ಮಹಾರಾಷ್ಟ್ರ ಸರ್ಕಾರ ಸಮೀಕ್ಷೆಯನ್ನು ನಡೆಸಿತು, ಅದರ ಅಡಿಯಲ್ಲಿ 47 ಸಾವಿರ ಕಾನೂನು ನಿವಾಸಿಗಳು ಮತ್ತು 13 ಸಾವಿರ ವಾಣಿಜ್ಯ ರಚನೆಗಳು ಇಲ್ಲಿ ಕಂಡುಬಂದಿವೆ. ಆದರೆ ಮೇಲಿನ ಮಹಡಿಯಲ್ಲಿ ವಾಸಿಸುವ ಜನರನ್ನು ಇದರ ಅಡಿಯಲ್ಲಿ ಸೇರಿಸಲಾಗಿಲ್ಲ.

*2016 ರ ಹೊತ್ತಿಗೆ, ಮಹಾರಾಷ್ಟ್ರವು ಧಾರಾವಿ ಪುನ: ಅಭಿವೃದ್ಧಿಗೆ ಡೆವಲಪರ್‌ಗಳನ್ನು ಆಕರ್ಷಿಸಲು ಪ್ರಯತ್ನಿಸುತ್ತದೆ, ಆದರೆ ಈ ಯೋಜನೆಯು ಸಹ ಕಾರ್ಯನಿರ್ವಹಿಸುವುದಿಲ್ಲ.

*2018 ರಲ್ಲಿ, ಇದನ್ನು ಅಭಿವೃದ್ಧಿಪಡಿಸಲು 20 ಪ್ರತಿಶತ ಸರ್ಕಾರಿ ಮತ್ತು 80 ಪ್ರತಿಶತ ಖಾಸಗಿ ಟೆಂಡರ್ ಅನ್ನು ನೀಡಲಾಗುತ್ತದೆ, ಅದರ ಅಡಿಯಲ್ಲಿ ದುಬೈನ ಸೆಕ್ಲಿಂಕ್ ಕನ್ಸೋರ್ಟಿಯಂ ಮತ್ತು ಭಾರತದ ಅದಾನಿ ಗ್ರೂಪ್ ಸೇರಿಕೊಂಡವು.

*ಸೆಕ್ಲಿಂಕ್ ಕನ್ಸೋರ್ಟಿಯಂನ $871 ಮಿಲಿಯನ್ ಬಿಡ್ 2019 ರಲ್ಲಿ ಒಪ್ಪಿಕೊಂಡಿತು. ಅದಾನಿ 548 ಮಿಲಿಯನ್ ಡಾಲರ್ ಬಿಡ್ ಮಾಡುವ ಮೂಲಕ ಎರಡನೇ ಸ್ಥಾನ ಪಡೆದರು. 2020 ರ ಅಡಿಯಲ್ಲಿ, ಸೆಕ್ಲಿಂಕ್ ಮಹಾರಾಷ್ಟ್ರ ಸರ್ಕಾರವು ತಪ್ಪಾಗಿ ಟೆಂಡರ್‌ಗಳನ್ನು ನೀಡುತ್ತಿದೆ ಎಂದು ಆರೋಪಿಸಿ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿತು. ಆದರೆ ರಾಜ್ಯ ಸರ್ಕಾರ ಇದನ್ನು ನಿರಾಕರಿಸಿತು.

*2022 ರಲ್ಲಿ ಮತ್ತೆ ಟೆಂಡರ್ ಕರೆಯಲಾಯಿತು. ಈ ಬಾರಿ ಸೆಕ್ಲಿಂಕ್ ಅನ್ನು ಸೇರಿಸಲಾಗಲಿಲ್ಲ. DLF ಮತ್ತು ಅದಾನಿ ಗ್ರೂಪ್ ಈ ಬಾರಿ $614 ಮಿಲಿಯನ್ ಬಿಡ್ ಗೆ ಒಪ್ಪಿಕೊಂಡಿದೆ.

*2023 ರಲ್ಲಿ, ಅದಾನಿ ಗ್ರೂಪ್‌ಗೆ ರಾಜ್ಯ ಸರ್ಕಾರವು ಅದನ್ನು ಮರುಅಭಿವೃದ್ಧಿ ಮಾಡುವ ಕಾರ್ಯವನ್ನು ನೀಡಿತು. ಆದರೆ ಸೆಕ್ಲಿಂಕ್ ರಾಜ್ಯ ಸರ್ಕಾರವು ಈ ಬಗ್ಗೆ ತಪ್ಪು ರೀತಿಯಲ್ಲಿ ವರ್ತಿಸುತ್ತಿದೆ ಎಂದು ಆರೋಪಿಸಿದೆ.

* ಮಹಾರಾಷ್ಟ್ರದ ಬದಲಾದ ಬಿಡ್ಡಿಂಗ್ ವಿಧಾನವನ್ನು ರಾಜಕೀಯ ಉದ್ದೇಶಗಳಿಂದ ನಡೆಸುತ್ತಿದೆ. ನಿರ್ದಿಷ್ಟವಾಗಿ ಅದಾನಿ ಗ್ರೂಪ್‌ನ ಹಿತಾಸಕ್ತಿಗಳಿಗೆ ಅನುಗುಣವಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಸೆಕ್ಲಿಂಕ್ ಪ್ರತಿಪಾದಿಸಿದೆ.

*ಎದುರಾಳಿ ಕಾಂಗ್ರೆಸ್ ಪಕ್ಷ ಧಾರಾವಿ ಸಂಘರ್ಷವನ್ನು 2024 ರ ರಾಷ್ಟ್ರೀಯ ಚುನಾವಣೆಗೆ ಮೋದಿ ಮತ್ತು ಬಿಜೆಪಿ ಮೇಲೆ ಒತ್ತಡ ಹೇರುವ ಸಾಧನವಾಗಿ ಬಳಸಿಕೊಂಡಿದೆ. ಮಹಾರಾಷ್ಟ್ರ ಸರ್ಕಾರ ಅದಾನಿಗೆ ಅನುಕೂಲ ಕಲ್ಪಿಸಿದೆ ಎಂದು ಕಾಂಗ್ರೆಸ್ ಆರೋಪಿಸಿದೆ.

ರಾಜಕೀಯ ಉದ್ದೇಶದಿಂದ ಬಿಡ್

ಕಳೆದ ತಿಂಗಳು ಮಾಡಿದ 809 ಪುಟಗಳ ಸಮಗ್ರ ಸಲ್ಲಿಕೆಯಲ್ಲಿ, ಎಂಟು ಸದಸ್ಯರನ್ನು ಒಳಗೊಂಡ ಒಕ್ಕೂಟವು ಮಹಾರಾಷ್ಟ್ರದ ಬದಲಾದ ಬಿಡ್ಡಿಂಗ್ ವಿಧಾನವನ್ನು ರಾಜಕೀಯ ಉದ್ದೇಶಗಳಿಂದ ನಡೆಸುತ್ತಿದೆ ಮತ್ತು ನಿರ್ದಿಷ್ಟವಾಗಿ ಅದಾನಿ ಗ್ರೂಪ್‌ನ ಹಿತಾಸಕ್ತಿಗಳಿಗೆ ಅನುಗುಣವಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಸೆಕ್‌ಲಿಂಕ್ ಟೆಕ್ನಾಲಜೀಸ್ ಕಾರ್ಪೊರೇಷನ್ ಪ್ರತಿಪಾದಿಸಿದೆ.

ಮಹಾರಾಷ್ಟ್ರ ಸರ್ಕಾರ ಸೆಕ್‌ಲಿಂಕ್‌ನ ಆರೋಪಗಳನ್ನು ನಿರಾಖರಿಸಿದೆ ಮತ್ತು ಹಿಂದಿನ ಟೆಂಡರ್ ಅನ್ನು ರದ್ದುಗೊಳಿಸುವಲ್ಲಿ ಅಧಿಕಾರಿಗಳು ಸರಿಯಾದ ಕಾರ್ಯವಿಧಾನವನ್ನು ಅನುಸರಿಸಿದ್ದಾರೆ ಎಂದು ಹೇಳುವ ಮೂಲಕ ಪ್ರತಿವಾದಿಸಿತ್ತು. ಆದರೆ ಅದಾನಿ ಗ್ರೂಪ್, ಸೆಕ್‌ಲಿಂಕ್, ಮಹಾರಾಷ್ಟ್ರದ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ಮತ್ತು ಪ್ರಧಾನಿ ಮೋದಿಯವರ ಕಚೇರಿ ಈ ವರದಿಗೆ ಸಂಬಂಧಿಸಿದಂತೆ ರಾಯಿಟರ್ಸ್‌ನ ವಿಚಾರಣೆಗಳಿಗೆ ಪ್ರತಿಕ್ರಿಯೆಗಳನ್ನು ನೀಡಿಲ್ಲ.

ಧಾರಾವಿಯಲ್ಲಿ ವಾಸಿಸುವವರಿಗೆ ಆತಂಕ

ಧಾರಾವಿ ಪುನರಾಭಿವೃದ್ಧಿ ಪ್ರಾಧಿಕಾರದ ಮುಖಂಡ ಎಸ್‌ವಿಆರ್‌ ಶ್ರೀನಿವಾಸ್‌ ಈ ಬಗ್ಗೆ ಮಾತನಾಡಿ, ನಿವಾಸಿಗಳು ಪರಿಸ್ಥಿತಿಯ ಬಗ್ಗೆ ಆತಂಕವನ್ನು ಅನುಭವಿಸುತ್ತಿದ್ದಾರೆ ಎಂದು ಹೇಳಿದರು.

ಧಾರಾವಿಯಲ್ಲಿ ಮೊಹಮ್ಮದ್ ಹಸ್ಮತ್ ಉಲ್ಲಾ ಅವರು 1995 ರಿಂದ ಧಾರಾವಿಯ ನಿವಾಸಿಯಾಗಿದ್ದಾರೆ. ಅವರು ಮಹಡಿ ಮೇಲೆ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದಾರೆ. ಕಸೂತಿ ವ್ಯಾಪಾರವನ್ನು ಮಾಡುತ್ತಾರೆ. ಇದು ಅವರ ವಾಸಸ್ಥಾನವೂ ಹೌದು, ಕೆಲಸದ ಸ್ಥಳವೂ ಹೌದು. ಇದರ ಹೊರತಾಗಿ ಇವರಿಗೆ ಯಾವುದೇ ಸ್ಥಳವಿಲ್ಲ. ಇವರ ಮಾಸಿಕ ಆದಾಯ 12000 ರೂ. ಈ ಹಣದಲ್ಲಿ ಇವರು ಏಳು ಮಕ್ಕಳನ್ನು ನೋಡಿಕೊಂಡು ಜೀವನ ನಡೆಸಬೇಕು. ಆದರೆ ಈ ಸ್ಥಳದಿಂದ ಅದಾನಿ ಹೊರ ಹಾಕುತ್ತಾರೆ ಎನ್ನುವ ಆತಂಕ ಶುರುವಾಗಿದೆ ಎನ್ನುತ್ತಾರೆ ಇವರು.

"ಅದಾನಿ ನಮ್ಮನ್ನು ಇಲ್ಲಿಂದ ಹೊರಹಾಕುತ್ತಾರೆ ಎಂದು ನಾವು ಚಿಂತಿಸುತ್ತಿದ್ದೇವೆ. ಅದಾನಿ ನಮಗೆ ಕೆಲಸ ಮಾಡಲು ಮತ್ತು ಉಳಿಯಲು ಸ್ಥಳವನ್ನು ನೀಡಿದರೆ ಅದು ಒಳ್ಳೆಯದು, ಇಲ್ಲದಿದ್ದರೆ ನಮಗೆ ನೆಲೆ ಇಲ್ಲ. " ಎಂದು ಕಡಿದಾದ ಮೆಟ್ಟಿಲುಗಳ ಮೂಲಕ ಪ್ರವೇಶ ಹೊಂದಿದ ತನ್ನ ಕೆಲಸದ ಸ್ಥಳದಲ್ಲಿ ಕುಳಿತಿದ್ದ 44 ವರ್ಷದ ಉಲ್ಲಾ ಆತಂಕವನ್ನು ವ್ಯಕ್ತಪಡಿಸಿದ್ದಾರೆ.

English summary

Gautam Adani's plan to transform Mumbai's Dharavi is reportedly raising doubts and allegations.