ಹೊಸ ಅಧ್ಯಾಯ ತೆರೆಯಲಿರುವ ರಕ್ಷಣಾ ಕ್ಷೇತ್ರದ ಭಾರತ- ಅಮೆರಿಕ ಒಪ್ಪಂದ

ನವದೆಹಲಿಯಲ್ಲಿನ ಅಮೆರಿಕಾ ಧೂತಾವಾಸ ಕಚೇರಿಯ ಅಧಿಕಾರಿ ಮೇರಿಕೇ ಕಾರ್ಲ್ ಸನ್ ಅಭಿಪ್ರಾಯ; ಯಲಹಂಕದಲ್ಲಿ ಆಯೋಜನೆಗೊಂಡಿರುವ ಬೆಂಗಳೂರು ಏರ್ ಷೋ ಸಂದರ್ಭದಲ್ಲಿ ಅಮೆರಿಕ ನಿರ್ಮಿತ ಪೆವಿಲಿಯನ್ ಉದ್ಘಾಟನೆ ವೇಳೆ ವಿವರಣೆ.

Updated: Friday, February 17, 2017, 18:46 [IST]

ಅಮೆರಿಕದ ನ್ಯಾಷನಲ್ ಡಿಫೆನ್ಸ್ ಆಥರೈಸೇಷನ್ ನ ನಿಯಮಗಳಡಿ ಭಾರತವು, ಅಮೆರಿಕದ ರಕ್ಷಣಾ ಇಲಾಖೆಯ ಪ್ರಮುಖ ಸಹಭಾಗಿತ್ವ ದೇಶವಾಗಿ ಹೊರಹೊಮ್ಮಿರುವುದರಿಂದ ಮುಂದಿನ ದಿನಗಳಲ್ಲಿ ಉಭಯ ದೇಶಗಳ ನಡುವೆ ರಕ್ಷಣೆಗೆ ಸಂಬಂಧಿಸಿದ ಪರಿಕರ, ತಂತ್ರಜ್ಞಾನಗಳ ವಿನಿಯಮದ ಹೊಸ ಅಧ್ಯಾಯವನ್ನೇ ತೆರೆಯಲಿದೆ ಎಂದು ನವದೆಹಲಿಯಲ್ಲಿರುವ ಅಮೆರಿಕ ಧೂತಾವಾಸ ಕಚೇರಿಯಲ್ಲಿ ಚಾರ್ಜ್ ಡಿ ಅಫೇರ್ಸ್ ಅಧಿಕಾರಿಯಾಗಿರುವ ಮೇರಿಕೇ ಕಾರ್ಲ್ ಸನ್ ತಿಳಿಸಿದ್ದಾರೆ.

ಯಲಹಂಕದಲ್ಲಿ ಆಯೋಜನೆಗೊಂಡಿದ್ದ ಬೆಂಗಳೂರು ಏರ್ ಷೋ ಸಂದರ್ಭದಲ್ಲಿ ಅಮೆರಿಕ ನಿರ್ಮಿತ ಪೆವಿಲಿಯನ್ ಅನ್ನು ಉದ್ಘಾಟಿಸಿದ ಅವರು ಈ ಬಗ್ಗೆ ವಿವರಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಕಾರ್ಲ್ ನ್, ಭಾರತ ಹಾಗೂ ಅಮೆರಿಕದ ರಕ್ಷಣಾ ಮೈತ್ರಿಯಲ್ಲಿ ಈವರೆಗೆ ಆಗಿರುವ ಸಾಧನೆಗಳು ಹಾಗೂ ಈ ಸಾಧನೆಯ ಹಾದಿಯಲ್ಲಿನ ಪ್ರಮುಖ ಮೈಲುಗಲ್ಲುಗಳನ್ನು ವಿವರಿಸಿದರು.

ಉಭಯ ದೇಶಗಳ ನಡುವೆ ಈವರೆಗೆ ರಕ್ಷಣಾ ಪರಿಕರಗಳ ಆಮದು ಹಾಗೂ ರಫ್ತಿನಲ್ಲಿ ಭಾರತ 15 ಬಿಲಿಯನ್ ಅಮೆರಿಕನ್ ಡಾಲರ್ (ಸುಮಾರು 100,57,57,500 ರು.) ನಷ್ಟು ವ್ಯವಹಾರ ಮಾಡಿದೆ ಎಂದರು.

ಅಮೆರಿಕದ 2017 ನ್ಯಾಷನಲ್ ಡಿಫೆನ್ಸ್ ಆಥರೈಸೇಷನ್ ನಿಯಮಗಳ ಪ್ರಕಾರ, ಭಾರತವು ಅಮೆರಿಕದ ರಕ್ಷಣಾ ಇಲಾಖೆಯ ಪ್ರಮುಖ ಸಹಭಾಗಿತ್ವ ದೇಶವಾಗಿ ಹೊರಹೊಮ್ಮಿದ್ದು, ರಕ್ಷಣಾ ತಂತ್ರಜ್ಞಾನ ಸಂಶೋಧನೆ ಹಾಗೂ ಅಭಿವೃದ್ಧಿ ವಿಚಾರದಲ್ಲಿ ಉಭಯ ದೇಶಗಳ ಬಲವರ್ಧನೆಗೆ ತನ್ನದೇ ಆದ ಮಹತ್ವದ ಕಾಣಿಕೆಯನ್ನು ನೀಡಿದೆ ಎಂದು ಅವರು ವಿವರಿಸಿದರು.

ಇದೇ ವೇಳೆ, ಈ ಬಾರಿಯ ಇಂಡಿಯಾ ಏರೋ ಷೋನಲ್ಲಿ ಅಮೆರಿಕದ ರಕ್ಷಣಾ ವಲಯಕ್ಕೆ ಸಂಬಂಧಿಸಿದ 20 ಕಂಪನಿಗಳು ಭಾಗವಹಿಸುತ್ತಿರುವುದು ಹೆಮ್ಮೆ ತಂದಿದೆ ಎಂದ ಅವರು, ಉಭಯ ದೇಶಗಳ ರಕ್ಷಣೆ ವಿಚಾರದಲ್ಲಿ ಎರಡೂ ದೇಶಗಳು ಪರಸ್ಪರ ಸಹಕಾರ ಒಪ್ಪಂದಗಳ ಮೂಲಕ ಹೊಸ ಸಾಧ್ಯತೆಗಳತ್ತ ದಾಪುಗಾಲು ಇಡುತ್ತಿರುವುದು ಖುಷಿ ಕೊಟ್ಟಿದೆ ಎಂದು ಹೇಳಿದರು.