ಐಐಟಿ ಕನಸು: ಅನಾರೋಗ್ಯದಿಂದ 3 ತಿಂಗಳು ಹಾಸಿಗೆಯಲ್ಲೇ ಕಳೆದು, ಶೇ70 ದೃಷ್ಟಿದೋಷದ ನಡುವೆಯೂ ಸಾಧನೆ, ತಾಯಿಯೇ ಪ್ರೇರಣೆ
Inspiring Journey: ಐಐಟಿ ಪ್ರವೇಶಕ್ಕಾಗಿ ನಡೆಯುವ ಜೆಇಇ ಅಡ್ವಾನ್ಸ್ಡ್ ಪರೀಕ್ಷೆಗೆ ಕೆಲವೇ ತಿಂಗಳುಗಳು ಬಾಕಿ ಇರುವಾಗ ಬಿಹಾರದ ವಿದ್ಯಾರ್ಥಿ ಗುಂಜನ್ ಕುಮಾರ್ ಅವರ ಜೀವನದಲ್ಲಿ ದೊಡ್ಡ ಸವಾಲು ಎದುರಾಯಿತು. ಶ್ವಾಸಕೋಶದ ಗಂಭೀರ ಸಮಸ್ಯೆಯಿಂದ ಅವರು ಸುಮಾರು ಮೂರು ತಿಂಗಳು ಹಾಸಿಗೆ ಹಿಡಿಯಬೇಕಾಯಿತು. ಇದರಿಂದ ಅವರ ಐಐಟಿ ಕನಸು ಕೈತಪ್ಪುವ ಹಂತಕ್ಕೆ ತಲುಪಿತ್ತು. ಆದರೆ ತಾಯಿಯ ಅಚಲ ಬೆಂಬಲ ಮತ್ತು ಗುಂಜನ್ ಅವರ ದೃಢ ಸಂಕಲ್ಪ ಸೋಲಲಿಲ್ಲ.
ಮಗನ ಓದು ನಿಲ್ಲದಂತೆ ತಾಯಿ ಪ್ರತಿದಿನ ಆನ್ಲೈನ್ ತರಗತಿಗಳನ್ನು ವೀಕ್ಷಿಸಿ, ಕೈಬರಹದ ಟಿಪ್ಪಣಿಗಳನ್ನು ಸಿದ್ಧಪಡಿಸಿ ಓದಿಗೆ ನೆರವಾದರು. ಅನಾರೋಗ್ಯದ ನಡುವೆಯೂ ನಿರಂತರ ಅಭ್ಯಾಸ ಮುಂದುವರಿಸಿದ ಗುಂಜನ್ ಕೊನೆಗೆ ಜೆಇಇ ಅಡ್ವಾನ್ಸ್ಡ್ ಪರೀಕ್ಷೆಯಲ್ಲಿ ಯಶಸ್ಸು ಸಾಧಿಸಿ, ದೇಶದ ಪ್ರತಿಷ್ಠಿತ ಐಐಟಿ ದೆಹಲಿಯ ಕಂಪ್ಯೂಟರ್ ಸೈನ್ಸ್ ವಿಭಾಗಕ್ಕೆ ಪ್ರವೇಶ ಪಡೆದಿದ್ದಾರೆ. ಅವರ ಸಾಧನೆಯ ಹಿಂದೆ ಕೇವಲ ಕಠಿಣ ಪರಿಶ್ರಮ ಮಾತ್ರವಲ್ಲ, ತಾಯಿಯ ತ್ಯಾಗ, ಪ್ರೋತ್ಸಾಹ ಮತ್ತು ಕುಟುಂಬದ ಬೆಂಬಲವೂ ಪ್ರಮುಖ ಪಾತ್ರ ವಹಿಸಿದೆ. ಈ ಕಥೆ ದೃಢ ಸಂಕಲ್ಪ, ಪರಿಶ್ರಮ ಮತ್ತು ಕುಟುಂಬದ ಸಹಕಾರ ಇದ್ದರೆ ಎಂತಹ ಕಷ್ಟಗಳನ್ನೂ ಗೆದ್ದು ಯಶಸ್ಸು ಸಾಧಿಸಬಹುದು ಎಂಬುದಕ್ಕೆ ಸ್ಪೂರ್ತಿದಾಯಕ ಉದಾಹರಣೆಯಾಗಿದೆ.
ಬಿಹಾರದ ಸೀತಾಮರ್ಹಿಯ ನಿವಾಸಿ ಗುಂಜನ್ ಕುಮಾರ್, ಜೆಇಇ 2021 ರ ಟಾಪರ್ ಮೃದುಲ್ ಅಗರ್ವಾಲ್ ಅವರ ಯಶಸ್ಸಿನಿಂದ ಪ್ರೇರಿತರಾಗಿ ಜೆಇಇ ಪರೀಕ್ಷೆಗೆ ತಯಾರಿ ನಡೆಸಲು 2023 ರಲ್ಲಿ ಕೋಟಾಗೆ ತೆರಳಿದ್ದರು. ಆದಾಗ್ಯೂ, ಅವರ ಪ್ರಯಾಣವು ಅಕ್ಟೋಬರ್ 2025 ರಲ್ಲಿ ಅನಿರೀಕ್ಷಿತ ತಿರುವು ಪಡೆದುಕೊಂಡಿತು. ಅವರಿಗೆ ಶ್ವಾಸಕೋಶದ ಮೇಲೆ ಪರಿಣಾಮ ಬೀರುವ ಗಂಭೀರ ಆರೋಗ್ಯ ಸಮಸ್ಯೆಯಾದ ನ್ಯೂಮೋಥೊರಾಕ್ಸ್ ಇರುವುದು ಪತ್ತೆಯಾಯಿತು. ಅನಾರೋಗ್ಯವು ಅವರನ್ನು ಸುಮಾರು ಮೂರು ತಿಂಗಳ ಕಾಲ ಸಂಪೂರ್ಣ ಬೆಡ್ ರೆಸ್ಟ್ಗೆ ತಳ್ಳಿತು. ಇದು ಅವರ ವಿದ್ಯಾಭ್ಯಾಸ ಹಾಗೂ ಮುಂದಿನ ಜೀವನದ ಮೇಲೆ ಗಂಭೀರ ಪರಿಣಾಮ ಬೀರುವುದಕ್ಕೆ ಕಾರಣವಾಯಿತು. ಪ್ರಮುಖ ಹಾಗೂ ನಿರ್ಣಾಯಕ ಹಂತದಲ್ಲಿಯೇ ಅವರು ಕೋಚಿಂಗ್ ತರಗತಿಗಳಿಗೆ ಹಾಜರಾಗದಂತಹ ಪರಿಸ್ಥಿತಿ ನಿರ್ಮಾಣವಾಯಿತು.
ಆ ನಿರ್ಣಾಯಕ ಸಮಯದಲ್ಲಿ, ಅವರ ತಾಯಿ ಗುಂಜಾ ತಮ್ಮ ಮಗನ ಕನಸಿಗೆ ಅಡ್ಡಿಯಾಗಬಾರದು ಎಂದು ನಿರ್ಧರಿಸಿದರು. ಗುಂಜಾ ಬಿ.ಎಡ್. ಪದವಿ ಮಾಡಿದ್ದು, ಗೃಹಿಣಿಯಾಗಿದ್ದಾರೆ. ಮಗ ವಿದ್ಯಾಭ್ಯಾಸಕ್ಕೆ ಅಡ್ಡಿಯಾಗಬಾರದು ಎನ್ನುವ ಉದ್ದೇಶದಿಂದ ಅವರು ವಿದ್ಯಾರ್ಥಿ ಗುಂಜನ್ ಕುಮಾರ್ ಅವರು ಆನ್ಲೈನ್ ತರಗತಿಗಳಿಗೆ ಹಾಜರಾಗಲು ಪ್ರಾರಂಭಿಸಿದರು. ಗುಂಜನ್ ಅವರ ವೈದ್ಯಕೀಯ ಸ್ಥಿತಿಯ ಹೊರತಾಗಿಯೂ ಕಲಿಕೆಯನ್ನು ಮುಂದುವರಿಸಲು ಅವರು ಪ್ರತಿ ಆನ್ಲೈನ್ ಕ್ಲಾಸ್ನ ವಿಷಯಗಳನ್ನು ಟಿಪ್ಪಣಿ ಮಾಡಿಕೊಂಡು, ಎಚ್ಚರಿಕೆ ವಹಿಸಿದರು. ಮುಖ್ಯ ವಿಷಯಗಳನ್ನು ನೋಟ್ ಮಾಡಿಕೊಂಡರು.
ಗುಂಜನ್ ಅವರ ಜೀವನದಲ್ಲಿ ಅನಾರೋಗ್ಯ ಮಾತ್ರವಲ್ಲ, ದೃಷ್ಟಿ ಸಮಸ್ಯೆಯೂ ದೊಡ್ಡ ಸವಾಲಾಗಿತ್ತು. ಅವರಿಗೆ 70% ಕ್ಕಿಂತ ಹೆಚ್ಚು ದೃಷ್ಟಿ ದುರ್ಬಲವಾಗಿದ್ದು, 9.5 ಪವರ್ನ ಕನ್ನಡಕವನ್ನು ಧರಿಸುತ್ತಾರೆ. ಆದರೆ ಈ ಎಲ್ಲ ಸವಾಲುಗಳು ಅವರ ಕನಸಿಗೆ ಅಡ್ಡಿಯಾಗಲಿಲ್ಲ. ಜೆಇಇ ಮೇನ್ಸ್ ಪರೀಕ್ಷೆಯಲ್ಲಿ ಅವರು 91.8 ಪರ್ಸೆಂಟೈಲ್ ಗಳಿಸಿದರು. ಬಳಿಕ ಜೆಇಇ ಅಡ್ವಾನ್ಸ್ಡ್ನಲ್ಲಿ ಪಿಡಬ್ಲ್ಯೂಡಿ-ಒಬಿಸಿ ವಿಭಾಗದಲ್ಲಿ 50ನೇ ರ್ಯಾಂಕ್ ಹಾಗೂ ಸಾಮಾನ್ಯ ಪಿಡಬ್ಲ್ಯೂಡಿ ವಿಭಾಗದಲ್ಲಿ 120ನೇ ರ್ಯಾಂಕ್ ಪಡೆದಿದ್ದಾರೆ. ಇದರೊಂದಿಗೆ ಅವರು ಐಐಟಿ ದೆಹಲಿಯ ಕಂಪ್ಯೂಟರ್ ಸೈನ್ಸ್ ವಿಭಾಗಕ್ಕೆ ಪ್ರವೇಶ ಪಡೆಯುವಲ್ಲಿ ಯಶಸ್ವಿಯಾದರು.
ತಮ್ಮ ಸಾಧನೆಯ ಬಗ್ಗೆ ಮಾತನಾಡಿದ ಗುಂಜನ್, "ಜೀವನ ಯಾವಾಗಲೂ ನಮಗೆ ಬೇಕಾದಂತೆ ಇರಲ್ಲ. ಆದರೆ ಧೈರ್ಯ ಮತ್ತು ಸಕಾರಾತ್ಮಕ ಮನೋಭಾವ ಇದ್ದರೆ ಯಾವುದೇ ಸವಾಲನ್ನು ಎದುರಿಸಿ ಮುಂದೆ ಸಾಗಬಹುದು" ಎಂದು ಹೇಳಿದರು. ತಮ್ಮ ಯಶಸ್ಸಿಗೆ ಮಾರ್ಗದರ್ಶನ ನೀಡಿದ ಶಿಕ್ಷಕರಿಗೂ ಅವರು ಕೃತಜ್ಞತೆ ಸಲ್ಲಿಸಿದರು.
ತನ್ನ ಮಗನ ಕನಸು ತನ್ನದಾಗಿಸಿಕೊಂಡ ಗುಂಜಾ ಅವರು, ಅನಾರೋಗ್ಯದಿಂದ ಅವನ ಅಧ್ಯಯನಕ್ಕೆ ಅಡ್ಡಿಯಾದಾಗ, ಅವನೊಂದಿಗೆ ಅಧ್ಯಯನ ಮಾಡಲು ನಿರ್ಧರಿಸಿದೆ ಎಂದಿದ್ದಾರೆ.
Click it and Unblock the Notifications
Sign in with Google