ಅದಾನಿ ಮೇಲಿನ ಕೇಸ್ ವಜಾ ಸಂಪೂರ್ಣ ಕಾನೂನುಬದ್ಧ: ಅನಾಮಧೇಯ ವರದಿಗಳಿಗೆ ಆಧಾರವಿಲ್ಲ ಎಂದ ಅಮೆರಿಕ ನ್ಯಾಯಾಂಗ ಇಲಾಖೆ
ಅಮೆರಿಕದ ನ್ಯಾಯಾಂಗ ಇಲಾಖೆಯು (DoJ) ಗೌತಮ್ ಅದಾನಿ ವಿರುದ್ಧದ ಕ್ರಿಮಿನಲ್ ಆರೋಪಗಳನ್ನು ಹಿಂಪಡೆಯುವ ತನ್ನ ನಿರ್ಧಾರದ ಸುತ್ತ ಹರಿದಾಡುತ್ತಿರುವ ಮಾಧ್ಯಮಗಳ ಊಹಾಪೋಹಗಳನ್ನು ತಳ್ಳಿಹಾಕಿದೆ. ಅಮೆರಿಕದಲ್ಲಿ ಅದಾನಿ ಗ್ರೂಪ್ಗೆ ಸಂಬಂಧಿಸಿದ ಸಂಸ್ಥೆಗಳು ಮಾಡಬಹುದಾದ ಹೂಡಿಕೆಗಳಿಗೂ ಮತ್ತು ಈ ನಿರ್ಧಾರಕ್ಕೂ ಲಿಂಕ್ ಕಲ್ಪಿಸಿ ಪ್ರಕಟವಾಗಿರುವ ವರದಿಗಳು "ಸುಳ್ಳು" ಹಾಗೂ ಅವುಗಳಿಗೆ ಯಾವುದೇ ಆಧಾರಗಳಿಲ್ಲ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.
ಫೆಡರಲ್ ನ್ಯಾಯಾಲಯಕ್ಕೆ ಸಲ್ಲಿಸಿದ ದಾಖಲೆಯಲ್ಲಿ ನ್ಯಾಯಾಂಗ ಇಲಾಖೆಯ ಹಿರಿಯ ಅಧಿಕಾರಿ ಆರ್. ಟ್ರೆಂಟ್ ಮೆಕ್ಕಾಟರ್ ಈ ವಿಷಯವನ್ನು ತಿಳಿಸಿದ್ದಾರೆ. ಸೆಕ್ಯೂರಿಟೀಸ್ (ಷೇರು ಮಾರುಕಟ್ಟೆ) ಹಗರಣಕ್ಕೆ ಸಂಬಂಧಿಸಿದ ಆರೋಪಗಳನ್ನು ವಜಾಗೊಳಿಸುವಂತೆ ಕೋರಿ ನಾವು ತೆಗೆದುಕೊಂಡ ನಿರ್ಧಾರವು ಸಂಪೂರ್ಣವಾಗಿ ಪ್ರಕರಣದ ಕಾನೂನು ಅರ್ಹತೆಗಳ (Legal Merits) ಆಧಾರದ ಮೇಲೆ ಮೂಡಿಬಂದಿದೆ. ಹೂಡಿಕೆಗಳ ಬಗ್ಗೆ ಯಾವುದೇ ಚರ್ಚೆಗಳು ಆರಂಭವಾಗುವ ಮುನ್ನವೇ ನಾವು ಈ ತೀರ್ಮಾನಕ್ಕೆ ಬಂದಿದ್ದೆವು ಎಂದು ಅವರು ಹೇಳಿದ್ದಾರೆ. ಅಮೆರಿಕದಲ್ಲಿ ಬರಲಿರುವ ಹೂಡಿಕೆಗಳಿಂದ ಪ್ರಭಾವಿತರಾಗಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂಬ ಮಾಧ್ಯಮಗಳ ವರದಿಗಳಿಗೆ ಪ್ರತಿಕ್ರಿಯಿಸಿದ ಮೆಕ್ಕಾಟರ್, "ಅದು ಸಂಪೂರ್ಣ ಸುಳ್ಳು" ಎಂದು ಸ್ಪಷ್ಟಪಡಿಸಿದ್ದಾರೆ.
ನ್ಯಾಯಾಲಯಕ್ಕೆ ಸಲ್ಲಿಸಲಾದ ದಾಖಲೆಯ ಪ್ರಕಾರ, "ಒಂದು ವೇಳೆ ಹೂಡಿಕೆಯ ಬಗ್ಗೆ ಯಾವುದೇ ಪ್ರಸ್ತಾಪ ಇಲ್ಲದೇ ಇದ್ದಿದ್ದರೂ ಸಹ, ನಾನು ಈ ಸೆಕ್ಯೂರಿಟೀಸ್ ಆರೋಪಗಳನ್ನು ವಜಾಗೊಳಿಸುವಂತೆ ಕೋರುತ್ತಿದ್ದೆ" ಎಂದು ಮೆಕ್ಕಾಟರ್ ತಿಳಿಸಿದ್ದಾರೆ. ಪ್ರಾಸಿಕ್ಯೂಟರ್ಗಳು ಮತ್ತು ಡಿಫೆನ್ಸ್ ವಕೀಲರು ಮಂಡಿಸಿದ ಪುರಾವೆಗಳು, ಕಾನೂನು ವಾದಗಳು ಹಾಗೂ ಸಲ್ಲಿಕೆಗಳನ್ನು ಕೂಲಂಕಷವಾಗಿ ಪರಿಶೀಲಿಸಿದ ನಂತರವೇ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ಅವರು ಹೇಳಿದ್ದಾರೆ.
ಅನಾಮಧೇಯ ಮೂಲಗಳ ಆಧಾರದ ಮೇಲೆ ಬಂದಿರುವ ವರದಿಗಳನ್ನು ನ್ಯಾಯಾಂಗ ಇಲಾಖೆ ತೀವ್ರವಾಗಿ ಟೀಕಿಸಿದೆ. ಈ ವರದಿಗಳ ವಿಶ್ವಾಸಾರ್ಹತೆಯನ್ನು ಪ್ರಶ್ನಿಸಿರುವ ಮೆಕ್ಕಾಟರ್, ಇಲಾಖೆಯ ಒಳಗಿನ ಆಂತರಿಕ ಚರ್ಚೆಗಳ ವಿವರಗಳನ್ನು ಸೋರಿಕೆ ಮಾಡುತ್ತಿದ್ದಾರೆ ಎಂದು ಇಲಾಖೆಯ ಸದ್ಯದ ಮತ್ತು ಮಾಜಿ ಅಧಿಕಾರಿಗಳ ಮೇಲೆ ಆರೋಪ ಮಾಡಿದ್ದಾರೆ. "ಅನಾಮಧೇಯ ಮೂಲಗಳನ್ನು ನಂಬಿ ಮಾಡುವ ಇಂತಹ ಆತುರದ ವರದಿಗಳಿಗೆ ನ್ಯಾಯಾಲಯವು ಎಂದಿಗೂ ಮಾನ್ಯತೆ ನೀಡುವುದಿಲ್ಲ ಎಂದು ನಾನು ಭಾವಿಸುತ್ತೇನೆ" ಎಂದು ತಿಳಿಸಿದ್ದಾರೆ.
ಪ್ರಾಸಿಕ್ಯೂಷನ್ ಕಡೆಯಿದ್ದ ಪ್ರಮುಖ ನ್ಯೂನತೆಗಳನ್ನು ಇಂತಹ ವರದಿಗಳು ಕಡೆಗಣಿಸಿವೆ ಎಂದು ಇಲಾಖೆ ವಾದಿಸಿದೆ. ಈ ನ್ಯೂನತೆಗಳಲ್ಲಿ ವ್ಯಾಪ್ತಿಯ ಸಮಸ್ಯೆಗಳು, ಹೂಡಿಕೆದಾರರಿಗೆ ಯಾವುದೇ ನಷ್ಟ ಉಂಟಾಗದಿರುವುದು, ಸಾಕ್ಷ್ಯಗಳ ಕೊರತೆಯ ಸವಾಲುಗಳು ಮತ್ತು ಭಾರತದ ಅಧಿಕಾರಿಗಳು ನಡೆಸಿದ ಸಮಾನಾಂತರ ತನಿಖೆಗಳು ಸೇರಿವೆ ಎಂದು ಇಲಾಖೆ ಹೇಳಿದೆ.
ಮಾಧ್ಯಮಗಳ ಮೂಲಕ ಹರಿದಾಡುತ್ತಿರುವ ಅನಾಮಧೇಯ ವಾದಗಳಿಗಿಂತ ಹೆಚ್ಚಾಗಿ, ಅಧಿಕೃತ ಕಾನೂನು ದಾಖಲೆಗಳ ಆಧಾರದ ಮೇಲೆ ಈ ಪ್ರಕರಣದ ಸಾರ್ವಜನಿಕ ಚರ್ಚೆಗಳು ನಡೆಯಬೇಕು ಎಂದು ಮೆಕ್ಕಾಟರ್ ಪ್ರತಿಪಾದಿಸಿದ್ದಾರೆ. ನ್ಯಾಯಾಲಯಕ್ಕೆ ಸಲ್ಲಿಸಲಾದ ದಾಖಲೆಯಲ್ಲಿ ಅತ್ಯಂತ ಕಠಿಣ ಮಾತುಗಳನ್ನು ಬಳಸಿರುವ ನ್ಯಾಯಾಂಗ ಇಲಾಖೆಯು, 'ಮಾಧ್ಯಮಗಳಿಗೆ ಮಾಹಿತಿ ಸೋರಿಕೆ ಮಾಡಲಾದ ಈ ತಂತ್ರವು ಅಂತಿಮವಾಗಿ ತಿರುಗುಬಾಣವಾಗಿದೆ' ಎಂದು ಹೇಳಿದೆ.
ಏಕೆಂದರೆ, ಈ ಸೋರಿಕೆಯಿಂದಾಗಿಯೇ ಪ್ರಾಸಿಕ್ಯೂಷನ್ ಕಡೆಯಿದ್ದ "ಹಲವು ಗಂಭೀರ ಲೋಪದೋಷಗಳನ್ನು" ಸಾರ್ವಜನಿಕವಾಗಿ ವಿವರಿಸುವಂತಾಯಿತು ಎಂದು ಇಲಾಖೆ ತಿಳಿಸಿದೆ. ಕೊನೆಯದಾಗಿ, ಇನ್ನು ಮುಂದೆ ಈ ತನಿಖೆಯನ್ನು ಮುಂದುವರಿಸುವುದು ಸರಿಯಲ್ಲ ಎಂಬ ಇಲಾಖೆಯ ಅಧಿಕೃತ ಕಾನೂನು ಮೌಲ್ಯಮಾಪನಕ್ಕಿಂತ, ಹೆಸರು ಬಹಿರಂಗಪಡಿಸದ ಮೂಲಗಳ ಆಧಾರದ ಮೇಲೆ ಬಂದಿರುವ ಮಾಧ್ಯಮ ವರದಿಗಳು ದೊಡ್ಡದಲ್ಲ ಎಂದು ದಾಖಲೆಯಲ್ಲಿ ಮುಕ್ತಾಯಗೊಳಿಸಲಾಗಿದೆ.
Click it and Unblock the Notifications
Sign in with Google