ಯುವಜನರಿಗಾಗಿ ಕೇಂದ್ರ ಸರ್ಕಾರದ ಹೊಸ ಎಐ ಲರ್ನಿಂಗ್ ಆ್ಯಪ್; 'ಯುವ ಎಐʼ ಆ್ಯಪ್‌ನ ವಿಶೇಷತೆ ಏನು? ಇಲ್ಲಿದೆ ಮಾಹಿತಿ

ನವದೆಹಲಿ: ಕೃತಕ ಬುದ್ಧಿಮತ್ತೆ ಅಥವಾ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಇಂದು ಜಗತ್ತನ್ನೇ ಆಳುತ್ತಿದೆ. ಈ ತಂತ್ರಜ್ಞಾನದ ಅರಿವಿಲ್ಲದೆ ಮುಂದಿನ ದಿನಗಳಲ್ಲಿ ಉದ್ಯೋಗ ಪಡೆಯುವುದು ಕಷ್ಟ ಎಂಬ ಪರಿಸ್ಥಿತಿ ನಿರ್ಮಾಣವಾಗುತ್ತಿದೆ. ಈ ನಿಟ್ಟಿನಲ್ಲಿ ಭಾರತದ ಯುವಜನತೆಯನ್ನು ಭವಿಷ್ಯದ ಸವಾಲುಗಳಿಗೆ ಸಜ್ಜುಗೊಳಿಸಲು ಕೇಂದ್ರ ಸರ್ಕಾರ ಬುಧವಾರ (ಫೆಬ್ರವರಿ 11, 2026) ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ಪ್ರತಿಯೊಬ್ಬರಿಗೂ ಎಐ ಶಿಕ್ಷಣವನ್ನು ತಲುಪಿಸುವ ಉದ್ದೇಶದಿಂದ 'ಯುವ.ಎಐ' (Yuva.ai) ಎಂಬ ಮೊಬೈಲ್ ಆಧಾರಿತ ಪ್ಲಾಟ್‌ಫಾರ್ಮ್ ಮತ್ತು 'ಕೌಶಲ್ ರಥ' (Kaushal Rath) ಯೋಜನೆಗೆ ಚಾಲನೆ ನೀಡಲಾಗಿದೆ.

ಏನಿದು ಯುವ.ಎಐ?

ಇದು ಕೇವಲ ಎಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ಅಥವಾ ಟೆಕ್ಕಿಗಳಿಗೆ ಮಾತ್ರ ಸೀಮಿತವಾದ ತಂತ್ರಜ್ಞಾನವಲ್ಲ. ಸಾಮಾನ್ಯ ವಿದ್ಯಾರ್ಥಿಗಳು ಮತ್ತು ಗ್ರಾಮೀಣ ಭಾಗದ ಯುವಕರೂ ಸಹ ಎಐ ಬಗ್ಗೆ ತಿಳಿದುಕೊಳ್ಳಬೇಕು ಎಂಬುದು ಸರ್ಕಾರದ ಉದ್ದೇಶವಾಗಿದೆ. ಇದಕ್ಕಾಗಿ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು (MeitY) 'ಎಐ ಆಂಡ್ ಬಿಯಾಂಡ್' (AI & Beyond) ಸಂಸ್ಥೆಯ ಸಹಯೋಗದೊಂದಿಗೆ ಈ ಪ್ಲಾಟ್‌ಫಾರ್ಮ್ ಅನ್ನು ಅಭಿವೃದ್ಧಿಪಡಿಸಿದೆ.

ಇದರ ವಿಶೇಷವೇನೆಂದರೆ, ಇದು ಮೊಬೈಲ್-ಫಸ್ಟ್ (Mobile-first) ಪ್ಲಾಟ್‌ಫಾರ್ಮ್ ಆಗಿದೆ. ಅಂದರೆ, ದುಬಾರಿ ಕಂಪ್ಯೂಟರ್‌ಗಳ ಅಗತ್ಯವಿಲ್ಲದೆ, ಕೇವಲ ಸ್ಮಾರ್ಟ್‌ಫೋನ್ ಮೂಲಕವೇ ಯುವಕರು ಎಐ ಪಾಠಗಳನ್ನು ಕಲಿಯಬಹುದು. ಇಲ್ಲಿ ಕೋಡಿಂಗ್ ಅಥವಾ ಸಂಕೀರ್ಣ ತಂತ್ರಜ್ಞಾನದ ಬದಲಿಗೆ, ಎಐ ಹೇಗೆ ಕೆಲಸ ಮಾಡುತ್ತದೆ? ಅದನ್ನು ದೈನಂದಿನ ಜೀವನದಲ್ಲಿ ಹೇಗೆ ಬಳಸಬಹುದು? ಮತ್ತು ಮುಖ್ಯವಾಗಿ ಅದನ್ನು ಜವಾಬ್ದಾರಿಯುತವಾಗಿ ಬಳಸುವುದು ಹೇಗೆ? ಎಂಬ ವಿಷಯಗಳ ಮೇಲೆ ಹೆಚ್ಚು ಒತ್ತು ನೀಡಲಾಗಿದೆ.

ಕೌಶಲ್ ರಥ: ಹಳ್ಳಿ ಹಳ್ಳಿಗೆ ಎಐ ಜ್ಞಾನ

ಈ ಯೋಜನೆಗೆ ಚಾಲನೆ ನೀಡಿ ಮಾತನಾಡಿದ ಕೇಂದ್ರ ರಾಜ್ಯ ಸಚಿವ ಜಿತಿನ್ ಪ್ರಸಾದ್‌ ಅವರು, "ಕೌಶಲ್ ರಥ ಮತ್ತು ಯುವ.ಎಐ ಮೂಲಕ ನಾವು ತಂತ್ರಜ್ಞಾನದ ಅರಿವನ್ನು ನೇರವಾಗಿ ಜನರ ಮನೆಬಾಗಿಲಿಗೆ ಕೊಂಡೊಯ್ಯುತ್ತಿದ್ದೇವೆ. ಪ್ರಧಾನಿ ನರೇಂದ್ರ ಮೋದಿಯವರ ಆಶಯದಂತೆ, ಅವಕಾಶಗಳು ಕೇವಲ ನಗರ ಪ್ರದೇಶಗಳಿಗೆ ಸೀಮಿತವಾಗಬಾರದು. ಭೌಗೋಳಿಕ ಗಡಿಗಳನ್ನು ಮೀರಿ ಪ್ರತಿಯೊಬ್ಬರಿಗೂ ಜ್ಞಾನ ಸಿಗಬೇಕು. ಈ ಕೌಶಲ್ ರಥ (ಬಸ್) ದೇಶದ ವಿವಿಧ ಪ್ರದೇಶಗಳಿಗೆ ಸಂಚರಿಸಿ, ವಿದ್ಯಾರ್ಥಿಗಳಿಗೆ ಎಐನ ಉಪಯೋಗಗಳ ಬಗ್ಗೆ ಪ್ರಾಯೋಗಿಕವಾಗಿ ತಿಳಿಸಿಕೊಡಲಿದೆ," ಎಂದು ಹೇಳಿದರು.

ಮುಂದಿನ ವಾರ ನವದೆಹಲಿಯಲ್ಲಿ ನಡೆಯಲಿರುವ ಪ್ರತಿಷ್ಠಿತ 'ಭಾರತ ಎಐ ಇಂಪ್ಯಾಕ್ಟ್ ಶೃಂಗಸಭೆ 2026'ಕ್ಕೆ (India AI Impact Summit 2026)ಇದು ಪೂರ್ವಭಾವಿ ತಯಾರಿಯಾಗಿದೆ ಎಂದೂ ಸಚಿವರು ತಿಳಿಸಿದರು. ವಿಶೇಷವೆಂದರೆ, ಇಂತಹ ಜಾಗತಿಕ ಮಟ್ಟದ ಶೃಂಗಸಭೆಯನ್ನು ಗ್ಲೋಬಲ್ ಸೌತ್ (Global South) ರಾಷ್ಟ್ರಗಳಲ್ಲಿ ಭಾರತವೇ ಮೊದಲ ಬಾರಿಗೆ ಆಯೋಜಿಸುತ್ತಿರುವುದು ಹೆಮ್ಮೆಯ ವಿಷಯವಾಗಿದೆ.

ಸಾಮಾನ್ಯವಾಗಿ ಎಐ ಎಂದರೆ ಕ್ಲಿಷ್ಟಕರವಾದ ವಿಷಯ ಎಂದು ಭಾವಿಸಲಾಗುತ್ತದೆ. ಆದರೆ ಯುವ.ಎಐನಲ್ಲಿ ಇದನ್ನು ಅತ್ಯಂತ ಸರಳವಾಗಿ ವಿವರಿಸಲಾಗಿದೆ. ಎಐ & ಬಿಯಾಂಡ್ ಸಂಸ್ಥೆಯ ಸಂಸ್ಥಾಪಕರಾದ ಜಸ್ಪ್ರೀತ್ ಬಿಂದ್ರಾ ಮತ್ತು ಅನುಜ್ ಮ್ಯಾಗಜೀನ್ ಅವರು ಈ ಪಠ್ಯಕ್ರಮವನ್ನು ರೂಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

"ನಮ್ಮ ಗುರಿ ಎಐ ಅನ್ನು ಕೇವಲ ತಂತ್ರಜ್ಞರಿಗೆ ಸೀಮಿತವಾಗಿರಿಸುವುದಲ್ಲ. ಸಂಕೀರ್ಣವಾದ ವಿಷಯಗಳನ್ನು ಸರಳೀಕರಿಸಿ, ಲಕ್ಷಾಂತರ ಜನರಿಗೆ ಅರ್ಥವಾಗುವಂತೆ ಮಾಡುವುದು ನಮ್ಮ ಜವಾಬ್ದಾರಿಯಾಗಿತ್ತು. ಈ ಪ್ಲಾಟ್‌ಫಾರ್ಮ್‌ನಲ್ಲಿರುವ ಚಿಕ್ಕ ವಿಡಿಯೋ ತುಣುಕುಗಳು (Short Modules) ಕಲಿಯುವವರಿಗೆ ಸುಲಭವಾಗಿ ಅರ್ಥವಾಗುವಂತಿವೆ," ಎಂದು ಜಸ್ಪ್ರೀತ್ ಬಿಂದ್ರಾ ತಿಳಿಸಿದ್ದಾರೆ.

https://x.com/PIB_India/status/2021448541366083825?s=20

ಬಹುಭಾಷೆಯಲ್ಲಿ ಲಭ್ಯ

ಭಾರತದ ವೈವಿಧ್ಯತೆಯನ್ನು ಗಮನದಲ್ಲಿಟ್ಟುಕೊಂಡು, ಈ ಪ್ಲಾಟ್‌ಫಾರ್ಮ್ ಅನ್ನು ಬಹುಭಾಷೆಗಳಲ್ಲಿ ಲಭ್ಯವಾಗುವಂತೆ ವಿನ್ಯಾಸಗೊಳಿಸಲಾಗಿದೆ. ಇಂಗ್ಲಿಷ್ ಬಾರದಿದ್ದರೂ ಪರವಾಗಿಲ್ಲ, ತಮ್ಮ ಪ್ರಾದೇಶಿಕ ಭಾಷೆಯಲ್ಲೇ ಎಐ ಕಲಿಯುವ ಅವಕಾಶವನ್ನು ಇದು ಒದಗಿಸುತ್ತದೆ. ಇದು ಗ್ರಾಮೀಣ ಮತ್ತು ನಗರ ಪ್ರದೇಶದ ನಡುವಿನ ಡಿಜಿಟಲ್ ಕಂದಕವನ್ನು (Digital Divide) ಕಡಿಮೆ ಮಾಡಲು ಸಹಕಾರಿಯಾಗಲಿದೆ.

ಮುಂದಿನ ದಿನಗಳಲ್ಲಿ ಆರೋಗ್ಯ, ಕೃಷಿ, ಶಿಕ್ಷಣ, ಹಣಕಾಸು ಸೇರಿದಂತೆ ಪ್ರತಿಯೊಂದು ಕ್ಷೇತ್ರದಲ್ಲೂ ಎಐ ಬಳಕೆ ಅನಿವಾರ್ಯವಾಗಲಿದೆ. ಹೀಗಾಗಿ, ಇಂದಿನ ಯುವಕರಿಗೆ ಕೇವಲ ಪದವಿ ಇದ್ದರೆ ಸಾಲದು, ಡಿಜಿಟಲ್ ಕೌಶಲ್ಯವೂ ಬೇಕಾಗುತ್ತದೆ. ನೀತಿ ಆಯೋಗ ಮತ್ತು ತಜ್ಞರ ಪ್ರಕಾರ, ಭಾರತದ ಉದ್ಯೋಗ ಮಾರುಕಟ್ಟೆಯಲ್ಲಿ ಎಐ ಸಾಕ್ಷರತೆ ಇರುವವರಿಗೆ ಹೆಚ್ಚಿನ ಬೇಡಿಕೆ ಸೃಷ್ಟಿಯಾಗಲಿದೆ.

English summary

The Government of India has launched Yuva.ai, a mobile-first platform under the Kaushal Rath initiative, to democratize AI literacy and prepare youth for the future economy.