ಅಜ್ಞಾತ ಮೂಲಗಳಿಂದ ರಾಜಕೀಯ ಪಕ್ಷಗಳಿಗೆ 11 ಸಾವಿರ ಕೋಟಿ ಹಣ!
ಪ್ರಾದೇಶಿಕ ಪಕ್ಷಗಳಲ್ಲಿ ಅತಿ ಹೆಚ್ಚು ದೇಣಿಗೆ ಪಡೆದ ಪಕ್ಷ ಉತ್ತರ ಪ್ರದೇಶದ ಸಮಾಜವಾದಿ ಪಕ್ಷವಾಗಿದ್ದರೆ, ತಮಿಳುನಾಡಿನ ಡಿಎಂಕೆ ಹಾಗೂ ಎಐಡಿಎಂಕೆ ಕ್ರಮವಾಗಿ ದ್ವಿತೀಯ, ತೃತೀಯ ಸ್ಥಾನಗಳಲ್ಲಿವೆ.
ನವದೆಹಲಿ, ಜನವರಿ 25: ರಾಜಕೀಯ ಪಕ್ಷಗಳಿಗೆ ಅನಾಮಧೇಯ ಅಥವಾ ಅಜ್ಞಾತ ಮೂಲಗಳಿಂದ ಹಣ ಹರಿದು ಬರುತ್ತದೆ ಎಂಬ ವಿಚಾರ ಗುಟ್ಟಾಗೇನೂ ಉಳಿದಿಲ್ಲ. ಇದಕ್ಕೆ ಕಡಿವಾಣ ಹಾಕುವ ಬಗ್ಗೆಯೂ ಆಗಾಗ ಚರ್ಚೆಗಳು ನಡೆಯುತ್ತವೆ.
ಈ ನಿಟ್ಟಿನಲ್ಲಿ ದೆಹಲಿ ಮೂಲದ ಚಿಂತಕರ ಚಾವಡಿ ಅಸೋಸಿಯೇಷನ್ಸ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ಎಡಿಆರ್) ಎಂಬ ಸಂಸ್ಥೆಯು 2004ರಿಂದ 2015ರವರೆಗೆ ರಾಷ್ಟ್ರೀಯ, ಪ್ರಾದೇಶಿಕ ಪಕ್ಷಗಳಿಗೆ ದೇಣಿಗೆ ರೂಪದಲ್ಲಿ ಹರಿದು ಬಂದಿರುವ ಹಣದ ಬಗ್ಗೆ ದೀರ್ಘವಾದ ಸಂಶೋಧನೆ ನಡೆಸಿದ್ದು, ಅದರ ವಿವರಗಳನ್ನು ಬಿಡುಗಡೆ ಮಾಡಿದೆ.
ಈ ಅವಧಿಯಲ್ಲಿ ರಾಷ್ಟ್ರೀಯ ಹಾಗೂ ವಿವಿಧ ರಾಜಕೀಯ ಪಕ್ಷಗಳು ಸಾವಿರಾರು ಕೋಟಿ ರು.ಗಳನ್ನು ದೇಣಿಗೆ ರೂಪದಲ್ಲಿ ಪಡೆದಿದ್ದರೂ, ಇದರಲ್ಲಿ ಬಹುಪಾಲು ಮೊತ್ತ ಪತ್ತೆಯಾಗದ ಮೂಲಗಳಿಂದ ಬಂದಿರುವುದು ಸ್ಪಷ್ಟವಾಗಿದೆ. ಅದರಂತೆ, ಈ ಅವಧಿಯಲ್ಲಿ ಕಾಂಗ್ರೆಸ್ ಪಕ್ಷಕ್ಕೆ 3,329 ಕೋಟಿ ರು. ದುಡ್ಡು ಹರಿದು ಬಂದಿದ್ದು, ಇದರ ಶೇ. 85 ಭಾಗ, ಅನಾಮಧೇಯ ಮೂಲಗಳದ್ದು.
ಇನ್ನು, ದೇಶದ ಮತ್ತೊಂದು ಪ್ರಮುಖ ರಾಷ್ಟ್ರೀಯ ಪಕ್ಷ ಬಿಜೆಪಿ ಇದೇ ಅವಧಿಯಲ್ಲಿ 2,125 ಕೋಟಿ ರು.ಗಳನ್ನು ಸ್ವೀಕರಿಸಿದ್ದು, ಇದರಲ್ಲಿ ಶೇ. 65ರಷ್ಟು ಹಣ ಅಜ್ಞಾತ ಮೂಲಗಳಿಂದ ಹರಿದು ಬಂದದ್ದು ಎಂದು ಎಡಿಆರ್ ವಿವರಿಸಿದೆ.
ಇನ್ನು, ಮೇಲೆ ತಿಳಿಸಿದ 10 ವರ್ಷಗಳ ಅವಧಿಯಲ್ಲಿ ಅತಿ ಹೆಚ್ಚು ದೇಣಿಗೆ ಪಡೆದ ಪ್ರಾದೇಶಿಕ ಪಕ್ಷವಾಗಿ ಉತ್ತರ ಪ್ರದೇಶದ ಸಮಾಜವಾದಿ ಪಕ್ಷ ಹೊರಹೊಮ್ಮಿದೆ. ಆ ಅವಧಿಯಲ್ಲಿ ಆ ಪಕ್ಷ 819.1 ಕೋಟಿ ರು. ಗಳಿಸಿದೆ. ಸಮಾಜವಾದಿ ಪಕ್ಷದ ಆನಂತರದ ಸ್ಥಾನ ತಮಿಳುನಾಡಿನ ಡಿಎಂಕೆ ಪಕ್ಷ (819.1 ಕೋಟಿ ರು.) ಹಾಗೂ ತೃತೀಯ ಸ್ಥಾನ ಎಐಡಿಎಂಕೆ (165.01 ಕೋಟಿ ರು.) ಪಕ್ಷದ್ದಾಗಿದೆ.
Click it and Unblock the Notifications
Sign in with Google