ಆದಾಯ ತೆರಿಗೆ ರಿಟರ್ನ್ಸ್ ಫೈಲ್ ಮಾಡೋ ಮುನ್ನ ನಕಲಿ ಖಾತೆ ಬಗ್ಗೆ ಎಚ್ಚರವಿರಲಿ!
ಮುಂಬೈ, ಜುಲೈ 12: ಇದು ಆದಾಯ ತೆರಿಗೆ ರಿಟರ್ನ್ಸ್ ಫೈಲ್ ಮಾಡುವ ಸಮಯ. ಈ ಸಮಯದಲ್ಲಿ ಐಟಿ ಇಲಾಖೆಯ ರೀತಿಯಲ್ಲೇ ಹಲವು ನಕಲಿ ಖಾತೆಗಳಿಂದ ನಿಮಗೆ ಇ ಮೇಲ್ ಬರಬಹುದು.
ಇದು ಥೇಟ್ ಸರ್ಕಾರದ ಐಟಿ ಇಲಾಖೆಯಿಂದ ಬರುವ ಮೇಲ್ ನಂತೆಯೇ ಇರುತ್ತದೆ. ಅಕಸ್ಮಾತ್ ಈ ಇಮೇಲ್ ಅನ್ನು ಸರಿಯಾಗಿ ಪರಿಶೀಲಿಸದೆ, ಅಗತ್ಯ ವಿವರಗಳನ್ನು ಸಲ್ಲಿಸಿದ್ದೇ ಆದರೆ ಸಂಕಷ್ಟ ಕಟ್ಟಿಟ್ಟಬುತ್ತಿ!
ಫಾರ್ಮ್ 16 ಇಲ್ಲದೆ ಆದಾಯ ತೆರಿಗೆ ಇ ರಿಟರ್ನ್ಸ್ ಹೇಗೆ?
[email protected] ಎಂಬ ಐಡಿಯಿಂದ ನಿಮಗೆ ಇಮೇಲ್ ಬಂದಿದ್ದರೆ ಅದರ ಸ್ಪೆಲಿಂಗ್ ಗಳನ್ನು ಸರಿಯಾಗಿ ಗಮನಿಸಿ. ಆದಾಯ ಇಲಾಖೆಯ ಐಡಿಯಿಂದ ಬಂದಿದ್ದಾದರೆ, [email protected] ಎಂಬ ಐಡಿಯಿಂದ ಮೇಲ್ ಬರುತ್ತದೆ. ಈ ಎರಡೂ ಮೇಲ್ ಗಳೂ ಒಂದೇ ರೀತಿ ಅನ್ನಿಸುತ್ತವಾದರೂ, ಸರಿಯಾಗಿ ಪರಿಶೀಲಿಸಿದರೆ ವ್ಯತ್ಯಾಸ ತಿಳಿಯುತ್ತದೆ.
ನಕಲಿ ಐಡಿ([email protected])ಯಲ್ಲಿ efiling ಬದಲು ಕೇವಲ filling ಎಂದಿದೆ. ಅಷ್ಟೇ ಅಲ್ಲ, filing ಬದಲು filling ಎಂದಿದೆ. ಇವನ್ನು ಪರಿಶೀಲಿಸಿದ ನಂತರವೇ ಮುಂದುವರಿಯಿರಿ.
ಈ ಕುರಿತು ಈಗಾಗಲೇ ಐಟಿ ಇಲಾಖೆ ಎಲ್ಲಾ ತೆರಿಗೆದಾರರಿಗೂ ತನ್ನ ವೆಬ್ ಸೈಟ್ ಮೂಲಕ, ಸಾಮಾಜಿಕ ಮಾಧ್ಯಮಗಳ ಮೂಲಕ, ಮೆಸೇಜ್ ಗಳ ಮೂಲಕ ಮಾಹಿತಿ ನೀಡಿದ್ದು, ಎಚ್ಚರಿಕೆ ವಹಿಸುವಂತೆ ಕೇಳಿಕೊಂಡಿದೆ.
ಚಾರ್ಟರ್ಡ್ ಅಕೌಂಟಂಟ್ ಗಳು ಈಗಾಗಲೇ ತಮ್ಮ ಗ್ರಾಹಕರಿಗೆ ವಾಟ್ಸಾಪ್ ಮೂಲಕ ಈ ಕುರಿತು ಮಾಹಿತಿ, ಮುನ್ನೆಚ್ಚರಿಕೆ ನೀಡಿದ್ದಾರೆ. "ಒಂದು ಪ್ರಮುಖ ಪ್ರಕಟಣೆ: ಈಗಾಗಲೇ ರಿಟರ್ನ್ಸ್ ಫೈಲ್ ಮಾಡಿರುವವರಿಗೆ ರೀಫಂಡ್ ಲೆಕ್ಕಾಚಾರದಲ್ಲಿ ಸ್ವಲ್ಪ ದೋಷವಾಗಿದೆ ಎಂಬ ಇಮೇಲ್ ಬಂದರೆ ಅದು ನಕಲಿ ಇ ಮೇಲ್. ಹ್ಯಾಕರ್ ಗಳು ಕಳಿಸಿದ್ದು. ಅಕಸ್ಮಾತ್ ಈ ಇಮೇಲ್ ನಲ್ಲಿರುವ ಲಿಂಕ್ ಅನ್ನೇನಾದರೂ ಕ್ಲಿಕ್ ಮಾಡಿದರೆ ನೆಟ್ ಬ್ಯಾಂಕಿಂಗ್ ಪೇಜ್ ಓಪನ್ ಆಗುತ್ತೆ. ಇಲ್ಲಿ ನಿಮ್ಮ ನೆಟ್ ಬ್ಯಾಂಕಿಂಗ್ ಡಿಟೇಲ್ಸ್ ನೀಡಿದರೆ, ನಿಮ್ಮ ಬ್ಯಾಂಕ್ ಖಾತೆಯನ್ನೇ ಹ್ಯಾಕ್ ಮಾಡುವುದಕ್ಕೆ ಸಾಧ್ಯವಾಗುತ್ತದೆ. ಆದ್ದರಿಂದ ಇಂಥ ಈ ಮೇಲ್ ಬಗ್ಗೆ ಹುಷಾರಾಗಿರಿ. ಐಟಿ ಇಲಾಖೆಯಿಂದ ಇಂಥ ಯಾವುದೇ ಇಮೇಲ್ ಬಂದಿಲ್ಲ" ಎಂದು ಈ ಪ್ರಕಟಣೆಯಲ್ಲಿ ಹೇಳಲಾಗಿದೆ.
ಆದ್ದರಿಂದ ಐಟಿ ರಿಟರ್ನ್ಸ್ ಫೈಲ್ ಮಾಡುವವರು ಹುಷಾರಾಗಿರಿ.