Beautiful Airports: ದೇಶದ ಎರಡು ಅತ್ಯಂತ ಸುಂದರವಾದ ಏರ್ಪೋರ್ಟ್ ಪಟ್ಟಿಯಲ್ಲಿ ಬೆಂಗಳೂರಿಗಿದ್ಯಾ ಸ್ಥಾನ?
ವಿಶ್ವದರ್ಜೆಯ ವಿಮಾನಯಾನ ಮೂಲಸೌಕರ್ಯ ರಂಗದಲ್ಲಿ ಭಾರತದ ಹೆಜ್ಜೆಯು ಮತ್ತಷ್ಟು ಗಟ್ಟಿಯಾಗುತ್ತಿದೆ. ಇದಕ್ಕೆ ಸಾಕ್ಷಿ ಎಂಬಂತೆ, ಅದಾನಿ ಏರ್ಪೋರ್ಟ್ ಹೋಲ್ಡಿಂಗ್ಸ್ ಲಿಮಿಟೆಡ್ (AAHL) ಸಂಸ್ಥೆಯ ನಿರ್ವಹಣೆಯಲ್ಲಿರುವ ಎರಡು ವಿಮಾನ ನಿಲ್ದಾಣಗಳು ಜಾಗತಿಕ ಮಟ್ಟದ ಪ್ರತಿಷ್ಠಿತ 'ಪ್ರಿ ವೆರ್ಸೈಲ್ಸ್ 2026' (Prix Versailles 2026) ವಿಶ್ವದ ಅತ್ಯಂತ ಸುಂದರ ವಿಮಾನ ನಿಲ್ದಾಣಗಳ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿದ್ದು, ದೊಡ್ಡ ಸಾಧನೆ ಮಾಡಿದೆ.
ಅದಾನಿ ಸಂಸ್ಥೆಯ ಉಸ್ತುವಾರಿಯಲ್ಲಿರುವ ನವಿ ಮುಂಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ (NMIA) ಮತ್ತು ಗುವಾಹಟಿಯ ಲೋಕಪ್ರಿಯ ಗೋಪಿನಾಥ್ ಬೊರ್ಡೊಲೊಯ್ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ (LGBIA) ಟರ್ಮಿನಲ್ 2 ಈ ಗೌರವಕ್ಕೆ ಪಾತ್ರವಾಗಿವೆ. ನಾವೀನ್ಯತೆ, ಸುಸ್ಥಿರತೆ, ಪ್ರಾದೇಶಿಕ ಸಂಸ್ಕೃತಿ ಹಾಗೂ ಪ್ರಯಾಣಿಕರಿಗೆ ನೀಡುವ ಅತ್ಯುತ್ತಮ ಸೌಲಭ್ಯಗಳನ್ನು ಪರಿಗಣಿಸಿ, ವಾಸ್ತುಶಿಲ್ಪ ಮತ್ತು ವಿನ್ಯಾಸದ ಶ್ರೇಷ್ಠತೆಗಾಗಿ ಪ್ರತಿ ವರ್ಷ ಈ 'ಪ್ರಿ ವೆರ್ಸೈಲ್ಸ್' ಪ್ರಶಸ್ತಿಯನ್ನು ನೀಡಲಾಗುತ್ತದೆ. ಸೋಮವಾರ ಈ ಕುರಿತು ಮಾಹಿತಿ ಹಂಚಿಕೊಂಡಿರುವ ಅದಾನಿ ಸಂಸ್ಥೆಯು, ಪ್ರಾದೇಶಿಕ ಅಭಿವೃದ್ಧಿ, ಪ್ರವಾಸೋದ್ಯಮ ಮತ್ತು ಆರ್ಥಿಕ ಪ್ರಗತಿಗೆ ಪೂರಕವಾಗುವಂತೆ ಅತ್ಯಾಧುನಿಕ ವಿಮಾನ ನಿಲ್ದಾಣಗಳನ್ನು ನಿರ್ಮಿಸುವ ತಮ್ಮ ಬದ್ಧತೆಗೆ ಸಂದ ಜಯ ಇದಾಗಿದೆ ಎಂದು ತಿಳಿಸಿದೆ.
ಪ್ಯಾರಿಸ್ನಲ್ಲಿರುವ ಯುನೆಸ್ಕೋ (UNESCO) ಪ್ರಧಾನ ಕಚೇರಿಯಲ್ಲಿ 2015ರಿಂದ ಪ್ರತಿ ವರ್ಷ ಈ 'ಪ್ರಿ ವೆರ್ಸೈಲ್ಸ್' ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಗುತ್ತಿದ್ದು, ಇದು ಜಗತ್ತಿನಾದ್ಯಂತದ ಅತ್ಯುತ್ತಮ ಆಧುನಿಕ ವಾಸ್ತುಶಿಲ್ಪ ಸಾಧನೆಗಳನ್ನು ಗುರುತಿಸಿ ಗೌರವಿಸುತ್ತದೆ. ವಿಮಾನಯಾನ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ, ಕೇವಲ ಕಾರ್ಯಕ್ಷಮತೆಯಷ್ಟೇ ಅಲ್ಲದೆ ಸೌಂದರ್ಯ ಮತ್ತು ಪರಿಸರ ಸ್ನೇಹಿ ಸುಸ್ಥಿರತೆಯನ್ನು ಯಶಸ್ವಿಯಾಗಿ ಅಳವಡಿಸಿಕೊಂಡಿರುವ ಹೊಸ ವಿಮಾನ ನಿಲ್ದಾಣಗಳು ಹಾಗೂ ಟರ್ಮಿನಲ್ಗಳಿಗೆ ಈ ಪ್ರಶಸ್ತಿ ನೀಡಲಾಗುತ್ತದೆ. ಪ್ರಶಸ್ತಿ ಸಮಿತಿಯ ಪ್ರಕಾರ, ಆಯ್ಕೆಯಾಗಿರುವ ಈ ನಿಲ್ದಾಣಗಳು ಇಂದಿನ ಆಧುನಿಕ ವಿಮಾನಯಾನ ಕೇಂದ್ರಗಳು ಕೇವಲ ಪ್ರಯಾಣದ ತಾಣಗಳಾಗಿ ಉಳಿಯದೆ, ಪ್ರಯಾಣಿಕರಿಗೆ ಒಂದು ಅಪೂರ್ವ ಹಾಗೂ ಮರೆಯಲಾಗದ ಅನುಭವ ನೀಡುವ ಸಾಂಸ್ಕೃತಿಕ ಹೆಗ್ಗುರುತುಗಳಾಗಿ ಹೇಗೆ ಬದಲಾಗುತ್ತಿವೆ ಎಂಬುದನ್ನು ಸಾಬೀತುಪಡಿಸಿವೆ.
ಕಮಲದ ವಿನ್ಯಾಸಕ್ಕೆ ಒಲಿದ ಮೆಚ್ಚುಗೆ
ನವಿ ಮುಂಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 1ರ ವಿಶಿಷ್ಟವಾದ ಕಮಲದ ಹೂವಿನ ಆಕೃತಿಯ ವಾಸ್ತುಶಿಲ್ಪ, ಭವಿಷ್ಯದ ದೃಷ್ಟಿಕೋನದ ವಿನ್ಯಾಸ ಮತ್ತು ತಂತ್ರಜ್ಞಾನ, ಕಲೆ ಹಾಗೂ ಕಾರ್ಯಕ್ಷಮತೆಯ ಅದ್ಭುತ ಸಮ್ಮಿಶ್ರಣವು ಜಾಗತಿಕ ಗಮನ ಸೆಳೆದಿದೆ. ಜಾಗತಿಕ ಆರ್ಥಿಕತೆಯಲ್ಲಿ ಮುಂಚೂಣಿಯಲ್ಲಿರುವ ಭಾರತದ ಹೆಮ್ಮೆಯ ಸಂಕೇತವಾಗಿ ಮತ್ತು ಪ್ರಯಾಣಿಕರಿಗೆ ವಿಶ್ವದರ್ಜೆಯ ಅನುಭವ ನೀಡುವ ಅತ್ಯಾಧುನಿಕ ಹೆಬ್ಬಾಗಿಲಾಗಿ ಇದನ್ನು ರೂಪಿಸಲಾಗಿದೆ.
ಈಶಾನ್ಯ ಭಾರತದ ಜೀವವೈವಿಧ್ಯದ ಅನಾವರಣ
ಗುವಾಹಟಿಯ ಲೋಕಪ್ರಿಯ ಗೋಪಿನಾಥ್ ಬೊರ್ಡೊಲೊಯ್ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 2, ಆ ಭಾಗದ ಶ್ರೀಮಂತ ಜೀವವೈವಿಧ್ಯದ ಸಂಕೇತವಾದ "ಬ್ಯಾಂಬೂ ಆರ್ಕಿಡ್" (Bamboo Orchid) ಹೂವಿನಿಂದ ಪ್ರೇರಿತವಾದ ವಿನ್ಯಾಸದಿಂದಾಗಿ ಈ ಮನ್ನಣೆ ಪಡೆದಿದೆ. ಈ ಟರ್ಮಿನಲ್ನ ವಿನ್ಯಾಸವು ಸುಸ್ಥಿರತೆ ಮತ್ತು ಬಳಕೆಗೆ ಪೂರಕವಾಗಿದ್ದು, ಪ್ರಕೃತಿಯ ಅಂಶಗಳ ಮೂಲಕ ಪ್ರಯಾಣಿಕರನ್ನು ಈಶಾನ್ಯ ಭಾರತದ ನೈಸರ್ಗಿಕ ಮತ್ತು ಸಾಂಸ್ಕೃತಿಕ ಪರಂಪರೆಯೊಂದಿಗೆ ಬೆಸೆಯುವಂತೆ ಮಾಡುತ್ತದೆ.
ಪಟ್ಟಿಯಲ್ಲಿರುವ ಇತರ ಜಾಗತಿಕ ವಿಮಾನ ನಿಲ್ದಾಣಗಳು
2026ರ 'ಪ್ರಿ ವೆರ್ಸೈಲ್ಸ್' ಪಟ್ಟಿಯಲ್ಲಿ ಭಾರತದ ನಿಲ್ದಾಣಗಳ ಜೊತೆಗೆ ವಿಶ್ವದ ಇತರ ಪ್ರಮುಖ ನಗರಗಳ ವಿಮಾನ ನಿಲ್ದಾಣಗಳೂ ಸ್ಥಾನ ಪಡೆದಿವೆ.
ಗುವಾಂಗ್ಝೌ (ಚೀನಾ)
ಫ್ರಾಂಕ್ಫರ್ಟ್ ಆಮ್ ಮೇನ್ (ಜರ್ಮನಿ)
ಕಾಂಡಾಲ್ ಸ್ಟುಯೆಂಗ್ (ಕಾಂಬೋಡಿಯಾ)
ಪಿಟ್ಸ್ಬರ್ಗ್ (ಅಮೆರಿಕ)
ಸ್ಯಾನ್ ಡಿಯಾಗೋ (ಅಮೆರಿಕ)
ಈ ಪ್ರಶಸ್ತಿಯು ಮುಖ್ಯವಾಗಿ "ಬುದ್ಧಿವಂತ ಸುಸ್ಥಿರತೆ" (Intelligent Sustainability) ಎಂಬ ಪರಿಕಲ್ಪನೆಯನ್ನು ಪ್ರೋತ್ಸಾಹಿಸುತ್ತದೆ. ಅಂದರೆ, ಪರಿಸರ ಕಾಳಜಿಯ ಜೊತೆಗೆ ಪ್ರಾದೇಶಿಕ ಸಂಸ್ಕೃತಿಯ ಅಭಿವ್ಯಕ್ತಿಯನ್ನೂ ಸಮತೋಲನದಲ್ಲಿ ಕಾಯ್ದುಕೊಳ್ಳುವ ವಾಸ್ತುಶಿಲ್ಪಕ್ಕೆ ಇಲ್ಲಿ ಆದ್ಯತೆ ನೀಡಲಾಗುತ್ತದೆ. ಈ ವರ್ಷದ ಕೊನೆಯಲ್ಲಿ, ಶಾರ್ಟ್ಲಿಸ್ಟ್ ಆಗಿರುವ ಇವುಗಳಲ್ಲಿ ಅತ್ಯುತ್ತಮ ಮೂರು ವಿಮಾನ ನಿಲ್ದಾಣಗಳಿಗೆ 'ಪ್ರಿ ವೆರ್ಸೈಲ್ಸ್', 'ಅತ್ಯುತ್ತಮ ಒಳಾಂಗಣ' ಮತ್ತು 'ಅತ್ಯುತ್ತಮ ಹೊರಾಂಗಣ' ವಿಭಾಗಗಳಲ್ಲಿ ಅತ್ಯುನ್ನತ ಜಾಗತಿಕ ಪ್ರಶಸ್ತಿಗಳನ್ನು ನೀಡಿ ಗೌರವಿಸಲಾಗುವುದು. ಈ ಹೆಮ್ಮೆಯ ಮನ್ನಣೆಯು ಜಾಗತಿಕ ವಿಮಾನ ನಿಲ್ದಾಣಗಳ ವಿನ್ಯಾಸ ರಂಗದಲ್ಲಿ 'ಅದಾನಿ ಸಂಸ್ಥೆ'ಯನ್ನು (AAHL) ಮುಂಚೂಣಿಗೆ ತಂದು ನಿಲ್ಲಿಸಿದೆ. ಅಷ್ಟೇ ಅಲ್ಲದೆ, ಭವಿಷ್ಯದ ವಿಮಾನಯಾನ ಮೂಲಸೌಕರ್ಯವನ್ನು ರೂಪಿಸುವಲ್ಲಿ ಭಾರತದ ಪ್ರಭಾವ ಹೆಚ್ಚುತ್ತಿರುವುದನ್ನು ಇದು ಜಗತ್ತಿಗೆ ಸಾರಿದೆ.
Click it and Unblock the Notifications
Sign in with Google