ಬೆಂಗೇರಿ ರಾಷ್ಟ್ರಧ್ವಜಕ್ಕೆ ಕರ್ನಾಟಕದಿಂದಲೇ ಅತೀ ಹೆಚ್ಚು ಬೇಡಿಕೆ
ಹುಬ್ಬಳ್ಳಿ, ಆಗಸ್ಟ್ 9: ಹುಬ್ಬಳ್ಳಿಯ ಬೆಂಗೇರಿಯ ಕರ್ನಾಟಕ ಖಾದಿ ಗ್ರಾಮೋದ್ಯೋಗ ಎಂದೊಡನೆ ನೆನಪಾಗುವುದು ಭಾರತದ ಹೆಮ್ಮೆಯ ತ್ರಿವರ್ಣ ಧ್ವಜ. ಇಡೀ ದೇಶಕ್ಕೂ ಹೆಚ್ಚಿನ ಸಂಖ್ಯೆಯಲ್ಲಿ ಧ್ವಜವನ್ನು ಪೂರೈಸುವ ಬೆಂಗೇರಿಯ ಖಾದಿ ಗ್ರಾಮೋದ್ಯೋಗ ಸಂಘಕ್ಕೆ ಈ ಬಾರಿ ಕರ್ನಾಟಕದಿಂದಲೇ ಧ್ವಜಕ್ಕಾಗಿ ಹೆಚ್ಚಿನ ಬೇಡಿಕೆ ಬಂದಿರುವುದು ವಿಶೇಷ.
ಪ್ರತಿವರ್ಷವೂ ಉತ್ತರ ಪ್ರದೇಶದಿಂದ ಹೆಚ್ಚಿನ ಬೇಡಿಕೆ ಬರುತ್ತಿತ್ತು. ಆದರೆ ಈ ಬಾರಿ ಕರ್ನಾಟಕದಿಂದಲೇ ಹೆಚ್ಚಿನ ಬೇಡಿಕೆ ಬಂದಿದ್ದು, ಉತ್ತರ ಪ್ರದೇಶ ಧ್ವಜ ಬೇಡಿಕೆಯಲ್ಲಿ ಎರಡು ಮತ್ತು ಮಹಾರಾಷ್ಟ್ರ ಮೂರನೇ ಸ್ಥಾನದಲ್ಲಿವೆ.
ಈ ಬಾರಿ ಸುಮಾರು 2.5 ಕೋಟಿ ರೂ. ವಹಿವಾಟು ನಡೆಸುವ ಗುರಿಯನ್ನು ಗ್ರಾಮೋದ್ಯೋಗ ಸಂಘ ಹೊಂದಿದೆ.
ಇಲ್ಲಿ ತಯಾರಾಗುವ ಧ್ವಜಗಳನ್ನು ಭಾರತೀಯ ಮಾನಕ ಸಂಸ್ಥೆ (ಬಿಐಎಸ್) ಪರೀಕ್ಷಿಸುತ್ತದೆ. ಅದು ಅನುಮೋದನೆ ನೀಡಿದ ಬಳಿಕವೇ ದರ ನಿಗದಿ ಪಡಿಸುವುದು ಮತ್ತು ಪೂರೈಸುವುದು. ದೊಡ್ಡ ಧ್ವಜ (21 X 14 ಅಡಿ)ವಾದರೆ ಅಂದಾಜು 18,000 ರೂ. ಮತ್ತು ಚಿಕ್ಕ ದ್ವಜ, (6"x4") ವಾದರೆ 220 ರೂ.ವರೆಗೂ ದರ ನಿಗದಿಪಡಿಸಲಾಗುತ್ತದೆ.
ಆಗಸ್ಟ್ 15, ಸ್ವಾತಂತ್ರ್ಯ ದಿನಕ್ಕೆ ಇನ್ನು ಕೆಲವೇ ದಿನ ಬಾಕಿ ಇರುವುದರಿಂದ ಧ್ವಜ ಪೂರೈಕೆ ಭರದಿಂದ ಸಾಗಿದೆ.
Click it and Unblock the Notifications
Sign in with Google