ಟಿಕ್ ಟಾಕ್ ನಿಂದ ಪಿಎಂ ಕೇರ್ಸ್ ಫಂಡ್ ಗೆ 30 ಕೋಟಿ: ಮೊದಲು ಅದನ್ನು ವಾಪಸ್ ಕೊಡಿ

ಮಂಗಳೂರು, ಜುಲೈ 3: "ಚೀನಾದ ಆ್ಯಪ್ ನಿಷೇಧಿಸಿರುವುದರಿಂದ ಆ ದೇಶಕ್ಕೂ ನಷ್ಟವಿಲ್ಲ, ನಮ್ಮ ದೇಶಕ್ಕೂ ಏನೂ ಲಾಭವಿಲ್ಲ"ಎಂದು ಮಾಜಿ ಸಚಿವ, ಮಂಗಳೂರು (ಉಳ್ಳಾಲ) ಶಾಸಕ ಯು.ಟಿ.ಖಾದರ್ ಅಭಿಪ್ರಾಯ ವ್ಯಕ್ತ ಪಡಿಸಿದರು.

ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ಖಾದರ್, "ಚೀನಾದ 59 ಆ್ಯಪ್ ಗಳನ್ನು ನಿಷೇಧಿಸಲಾಗಿದೆ. ಅದರಲ್ಲಿ ಟಿಕ್ ಟಾಕ್ ಕೂಡಾ ಒಂದು. ಆ ಸಂಸ್ಥೆಯಿಂದ, ಭಾರೀ ಮೊತ್ತದ ಹಣ, ಪ್ರಧಾನಮಂತ್ರಿ ಕೇರ್ಸ್ ಫಂಡ್ ಗೆ ಬಂದಿಲ್ಲವೇ"ಎಂದು ಪ್ರಶ್ನಿಸಿದರು.

"ಟಿಕ್ ಟಾಕ್ ನಿಂದ ಬಂದಿರುವ ಮೂವತ್ತು ಕೋಟಿ ರೂಪಾಯಿಯನ್ನು ಮೊದಲು ಹಿಂದಿರುಗಿಸಲಿ. ಆ ಹಣವನ್ನು ಇಟ್ಟುಕೊಳ್ಳುವುದಕ್ಕೆ ನಾಚಿಕೆಯಾಗಬೇಕು"ಎಂದು ಯು.ಟಿ.ಖಾದರ್ ಅಭಿಪ್ರಾಯ ವ್ಯಕ್ತ ಪಡಿಸಿದರು.

"ನಿಷೇಧಿಸಿರುವ ಚೀನಾ ಆ್ಯಪ್ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿರುವ ಭಾರತೀಯರ ಪರಿಸ್ಥಿತಿ ಏನಾಗಬೇಕು. ಅವರ ಕೆಲಸದ ಜವಾಬ್ದಾರಿಯನ್ನು ಕೇಂದ್ರ ಸರಕಾರ ವಹಿಸಿಕೊಳ್ಳುತ್ತದೆಯೇ"ಎನ್ನುವ ಪ್ರಶ್ನೆಯನ್ನು ಖಾದರ್ ಈ ಸಂದರ್ಭದಲ್ಲಿ ಎತ್ತಿದರು.

"ಭಾರತದ ಈ ನಿರ್ಧಾರದಿಂದ ಚೀನಾ ಮುಸಿಮುಸಿ ನಗುತ್ತಿದೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ದೇಶದ ಮಾನ ಮರ್ಯಾದೆಯನ್ನು ಪಿಎಂ ಮೋದಿ ಹರಾಜು ಹಾಕಿದ್ದಾರೆ"ಎಂದು ಖಾದರ್ ಹೇಳಿದರು.

English summary

Union Government Should Returns The Money Received From TikTok To PM Cares Fund.