ಕಂಪನಿ ನಿಮ್ಮ ಟ್ಯಾಕ್ಸ್ ರಿಟರ್ನ್‌ಗೆ ಹೊಸ ತೆರಿಗೆ ಪದ್ಧತಿ ಆಯ್ಕೆ ಮಾಡಿದ್ಯಾ? ಗಾಬರಿ ಬೇಡ, ಹೀಗೆ ಮಾಡಿ

By Shiddalingesh S

Published: Monday, June 15, 2026, 10:55 [IST]

ಕೆಲಸ ಬದಲಾಯಿಸಿದ ಉದ್ಯೋಗಿಗಳು ಕೆಲವು ಸಲ ಈ ಆತಂಕ ಎದುರಿಸುತ್ತಾರೆ- ಐಟಿಆರ್ ಫೈಲಿಂಗ್ (ಐಟಿಆರ್ ಫೈಲಿಂಗ್ 2026) ಸಂದರ್ಭದಲ್ಲಿ. ಅವರ ಉದ್ಯೋಗದಾತರು ಅಥವಾ ಕೆಲಸ ನೀಡಿದ ಕಂಪನಿಯವರು, ಇವರ ಫೈಲಿಂಗ್‌ಗೆ ಡಿಫಾಲ್ಟ್ ಆಗಿ ಹೊಸ ತೆರಿಗೆ ಪದ್ಧತಿ ಆಯ್ಕೆ ಮಾಡಿರುತ್ತಾರೆ. ಅದರಿಂದ ಉಂಟಾಗುವ ಒಂದು ಸಮಸ್ಯೆ ಮತ್ತು ಪರಿಹಾರ ಇಲ್ಲಿದೆ.

ಅನೇಕ ಉದ್ಯೋಗಿಗಳು ಪ್ರತಿವರ್ಷ ಆದಾಯ ತೆರಿಗೆ ರಿಟರ್ನ್ (ITR) ಸಲ್ಲಿಸುವ ಸಮಯದಲ್ಲಿ ಒಂದು ಸಾಮಾನ್ಯ ಸಮಸ್ಯೆಯನ್ನು ಎದುರಿಸುತ್ತಾರೆ. ಕಂಪನಿಯು ತೆರಿಗೆ ಕಡಿತ (TDS) ಮಾಡುವಾಗ ಉದ್ಯೋಗಿಯ ತೆರಿಗೆ ಪದ್ಧತಿ ಆಯ್ಕೆಯನ್ನು ಸಮಯಕ್ಕೆ ಸರಿಯಾಗಿ ಪಡೆಯದಿದ್ದರೆ, ಡೀಫಾಲ್ಟ್ ಆಗಿ ಹೊಸ ತೆರಿಗೆ ಪದ್ಧತಿ (New Tax Regime) ಅನ್ವಯಿಸುತ್ತದೆ. ಇದರಿಂದ ಹಲವರು ತಮಗೆ ಸಿಗಬೇಕಾದ ತೆರಿಗೆ ವಿನಾಯಿತಿಗಳು ಮತ್ತು ಕಡಿತಗಳನ್ನು ಕಳೆದುಕೊಂಡಿದ್ದೇವೆ ಎಂದು ಆತಂಕಪಡುತ್ತಾರೆ. ಆದರೆ ವಾಸ್ತವದಲ್ಲಿ ಅಂಥದ್ದೇನೂ ಇಲ್ಲ.

ಉದ್ಯೋಗದಾತರು ಸಂಬಳದಿಂದ ತೆರಿಗೆ ಕಡಿತ ಮಾಡುವ ಮೊದಲು, ಉದ್ಯೋಗಿ ಯಾವ ತೆರಿಗೆ ಪದ್ಧತಿಯನ್ನು ಆಯ್ಕೆ ಮಾಡಿದ್ದಾನೆ ಎಂಬುದನ್ನು ತಿಳಿದುಕೊಳ್ಳಬೇಕು. ಉದ್ಯೋಗಿಯು ನಿಗದಿತ ಗಡುವಿನೊಳಗೆ ತನ್ನ ಆಯ್ಕೆ ತಿಳಿಸದಿದ್ದರೆ, ಕಂಪನಿಯು ಡೀಫಾಲ್ಟ್ ಹೊಸ ತೆರಿಗೆ ಪದ್ಧತಿಯನ್ನು ಅನ್ವಯಿಸುವುದು ಕಾನೂನುಬದ್ಧ.

ಹೊಸ ತೆರಿಗೆ ಪದ್ಧತಿಯಲ್ಲಿ ಹಲವು ವಿನಾಯಿತಿಗಳು ಮತ್ತು ಕಡಿತಗಳಿಗೆ ಅವಕಾಶ ಇರುವುದಿಲ್ಲ.

ಉದಾಹರಣೆಗೆ:

ಮನೆ ಬಾಡಿಗೆ ಭತ್ಯೆ (HRA) ಮೇಲಿನ ತೆರಿಗೆ ವಿನಾಯಿತಿ
ರಜೆ ಪ್ರಯಾಣ ಭತ್ಯೆ (LTA) ವಿನಾಯಿತಿ
ಸೆಕ್ಷನ್ 80C ಅಡಿಯಲ್ಲಿ ಪಿಪಿಎಫ್, ಜೀವ ವಿಮೆ, ಇಪಿಎಫ್ ಮುಂತಾದ ಹೂಡಿಕೆಗಳ ಕಡಿತ
ಆರೋಗ್ಯ ವಿಮೆ ಪ್ರೀಮಿಯಂಗೆ ಸೆಕ್ಷನ್ 80D ಅಡಿಯಲ್ಲಿ ಸಿಗುವ ಕಡಿತ ಹೀಗಾಗಿ ಉದ್ಯೋಗಿಯ ಸಂಬಳದಿಂದ ಹೆಚ್ಚು ತೆರಿಗೆ ಕಡಿತವಾಗಿರಬಹುದು.ಆದರೆ ಇಲ್ಲಿ ಒಂದು ಮುಖ್ಯ ವಿಷಯವಿದೆ. ಉದ್ಯೋಗದಾತರು ಆಯ್ಕೆ ಮಾಡಿದ ತೆರಿಗೆ ಪದ್ಧತಿ ಅಂತಿಮವಲ್ಲ. ಕಂಪನಿಯು ತೆರಿಗೆ ಕಡಿತಕ್ಕಾಗಿ ಬಳಸಿದ ಪದ್ಧತಿ ಕೇವಲ ತಾತ್ಕಾಲಿಕ. ಅಂತಿಮವಾಗಿ ಯಾವ ತೆರಿಗೆ ಪದ್ಧತಿಯನ್ನು ಅನುಸರಿಸಬೇಕು ಎಂಬ ನಿರ್ಧಾರವನ್ನು ಉದ್ಯೋಗಿಯೇ ಐಟಿಆರ್ ಸಲ್ಲಿಸುವ ಸಮಯದಲ್ಲಿ ತೆಗೆದುಕೊಳ್ಳಬಹುದು.

ವ್ಯಾಪಾರ ಅಥವಾ ವೃತ್ತಿಯಿಂದ ಆದಾಯ (Business Income) ಇಲ್ಲದ ಉದ್ಯೋಗಿಗಳು ಪ್ರತಿವರ್ಷ ಹಳೆಯ ಮತ್ತು ಹೊಸ ತೆರಿಗೆ ಪದ್ಧತಿಗಳ ನಡುವೆ ಸ್ವತಂತ್ರವಾಗಿ ಬದಲಾಯಿಸಬಹುದು. ಆದ್ದರಿಂದ, ನಿಮ್ಮ ಕಂಪನಿಯು ಹೊಸ ತೆರಿಗೆ ಪದ್ಧತಿಯ ಪ್ರಕಾರ ತೆರಿಗೆ ಕಡಿತ ಮಾಡಿದ್ದರೂ, ಐಟಿಆರ್ ಸಲ್ಲಿಸುವಾಗ ನೀವು ಹಳೆಯ ತೆರಿಗೆ ಪದ್ಧತಿ (Old Tax Regime) ಯನ್ನು ಆಯ್ಕೆ ಮಾಡಬಹುದು. ಆಗ HRA, LTA, 80C, 80D ಮುಂತಾದ ಎಲ್ಲ ಅರ್ಹ ಕಡಿತಗಳನ್ನು ಕ್ಲೈಮ್ ಮಾಡಬಹುದು.

ಈ ಲೆಕ್ಕಾಚಾರದ ನಂತರ ನೀವು ಹೆಚ್ಚುವರಿಯಾಗಿ ತೆರಿಗೆ ಪಾವತಿಸಿರುವುದು ಕಂಡುಬಂದರೆ, ಸರ್ಕಾರದಿಂದ ತೆರಿಗೆ ಮರುಪಾವತಿ (Tax Refund) ಕೂಡ ಪಡೆಯಬಹುದು.

Recommended For You

ಹಳೆ ಮತ್ತು ಹೊಸ ತೆರಿಗೆ ಪದ್ಧತಿ: 2025-26ರ ಆರ್ಥಿಕ ವರ್ಷಕ್ಕೆ ಯಾವುದು ಉತ್ತಮ?

ಆದರೆ ಇದಕ್ಕೆ ಒಂದು ಪ್ರಮುಖ ಷರತ್ತು ಇದೆ. ವ್ಯಾಪಾರ ಆದಾಯವಿಲ್ಲದವರು 2026ರ ಜುಲೈ 31ರೊಳಗೆ ತಮ್ಮ ಐಟಿಆರ್ ಸಲ್ಲಿಸಬೇಕು. ಈ ಗಡುವಿನೊಳಗೆ ರಿಟರ್ನ್ ಸಲ್ಲಿಸಿದರೆ ಮಾತ್ರ ಹಳೆಯ ತೆರಿಗೆ ಪದ್ಧತಿಯನ್ನು ಆಯ್ಕೆ ಮಾಡುವ ಅವಕಾಶ ಇರುತ್ತದೆ. ಗಡುವು ಮೀರಿದ ನಂತರ ಸಲ್ಲಿಸುವ ರಿಟರ್ನ್‌ಗಳಿಗೆ ಸಾಮಾನ್ಯವಾಗಿ ಹೊಸ ತೆರಿಗೆ ಪದ್ಧತಿಯೇ ಅನ್ವಯವಾಗುತ್ತದೆ.

ಹೀಗಾಗಿ, ನಿಮ್ಮ ಉದ್ಯೋಗದಾತರು ಹೊಸ ತೆರಿಗೆ ಪದ್ಧತಿಯ ಆಧಾರದಲ್ಲಿ ತೆರಿಗೆ ಕಡಿತ ಮಾಡಿದ್ದರೂ ಆತಂಕಪಡಬೇಕಾಗಿಲ್ಲ. ಸಮಯಕ್ಕೆ ಸರಿಯಾಗಿ ಐಟಿಆರ್ ಸಲ್ಲಿಸಿದರೆ, ಹಳೆಯ ತೆರಿಗೆ ಪದ್ಧತಿಗೆ ಮರಳಿ, ಎಲ್ಲಾ ಅರ್ಹ ವಿನಾಯಿತಿಗಳು ಮತ್ತು ಕಡಿತಗಳನ್ನು ಪಡೆದು, ಹೆಚ್ಚುವರಿ ಪಾವತಿಸಿದ ತೆರಿಗೆಯ ಮರುಪಾವತಿಯನ್ನೂ ಪಡೆಯಬಹುದು.

ಹೊಸ ತೆರಿಗೆ ಪದ್ಧತಿ (New Tax Regime)ಯಲ್ಲಿ ಬಹುತೇಕ ಹಳೆಯ ವಿನಾಯಿತಿಗಳು ಮತ್ತು ಕಡಿತಗಳನ್ನು ತೆಗೆದುಹಾಕಲಾಗಿದೆ. ಆದರೂ ಕೆಲವು ಪ್ರಮುಖ ಸೌಲಭ್ಯಗಳು ಇನ್ನೂ ಲಭ್ಯವಿವೆ.

ಹೊಸ ತೆರಿಗೆ ಪದ್ಧತಿಯಲ್ಲಿ ಕ್ಲೇಮ್ ಮಾಡಬಹುದಾದವು:

- ಸ್ಟ್ಯಾಂಡರ್ಡ್ ಡಿಡಕ್ಷನ್ (Standard Deduction) ವೇತನದಾರ ಉದ್ಯೋಗಿಗಳಿಗೆ ₹75,000 ವರೆಗೆ ಸ್ಟ್ಯಾಂಡರ್ಡ್ ಡಿಡಕ್ಷನ್ ಸಿಗುತ್ತದೆ.

- ಉದ್ಯೋಗದಾತರ NPS ಕೊಡುಗೆ ಸೆಕ್ಷನ್ 80CCD(2) ಅಡಿಯಲ್ಲಿ ಉದ್ಯೋಗದಾತರು National Pension System (NPS)ಗೆ ನೀಡುವ ಕೊಡುಗೆಯನ್ನು ಕಡಿತವಾಗಿ ಪಡೆಯಬಹುದು.

- ಅಗ್ನಿವೀರ್ ಕಾರ್ಪಸ್ ಫಂಡ್ ಕೊಡುಗೆ ಅಗ್ನಿವೀರ್ ಯೋಜನೆಯ ಫಲಾನುಭವಿಗಳಿಗೆ ವಿಶೇಷ ಕಡಿತ ಲಭ್ಯ.

- ಕುಟುಂಬ ಪಿಂಚಣಿ (Family Pension) ಮೇಲಿನ ಕಡಿತ ನಿರ್ದಿಷ್ಟ ಮಿತಿಯವರೆಗೆ ಕುಟುಂಬ ಪಿಂಚಣಿಗೆ ಕಡಿತ ಸಿಗುತ್ತದೆ.

- ಗೃಹ ಸಾಲದ ಬಡ್ಡಿ (ಬಾಡಿಗೆಗೆ ನೀಡಿರುವ ಮನೆಗೆ ಮಾತ್ರ) ಸ್ವಂತ ವಾಸದ ಮನೆಯ ಗೃಹ ಸಾಲದ ಬಡ್ಡಿಗೆ ವಿನಾಯಿತಿ ಇಲ್ಲ. ಆದರೆ ಬಾಡಿಗೆ ಆದಾಯ ತರುವ ಆಸ್ತಿಯ ಕೆಲವು ವೆಚ್ಚಗಳನ್ನು ಪರಿಗಣಿಸಬಹುದು.

ಹೊಸ ತೆರಿಗೆ ಪದ್ಧತಿಯಲ್ಲಿ ಕ್ಲೇಮ್ ಮಾಡಲು ಸಾಧ್ಯವಿಲ್ಲದ ಪ್ರಮುಖ ಅಂಶಗಳು:

- HRA (House Rent Allowance)
- LTA (Leave Travel Allowance)
- ಸೆಕ್ಷನ್ 80C ಹೂಡಿಕೆಗಳು (PPF, ELSS, LIC Premium, EPF ಹೆಚ್ಚುವರಿ ಹೂಡಿಕೆ ಇತ್ಯಾದಿ)
- ಸೆಕ್ಷನ್ 80D (Health Insurance Premium)
- ಗೃಹ ಸಾಲದ ಬಡ್ಡಿ (Self-occupied house)
- ಶಿಕ್ಷಣ ಸಾಲದ ಬಡ್ಡಿ (80E)
- ದೇಣಿಗೆಗಳ ಮೇಲಿನ ಬಹುತೇಕ ಕಡಿತಗಳು (80G)