ರಷ್ಯಾದಿಂದ ಶಸ್ತ್ರಾಸ್ತ್ರ ಖರೀದಿಸಬೇಡಿ: ಭಾರತಕ್ಕೆ ಅಮೆರಿಕ ಎಚ್ಚರಿಕೆ

ವಾಷಿಂಗ್ಟನ್, ಆಗಸ್ಟ್ 30: ರಷ್ಯಾದಿಂದ ಹೊಸ ಶಸ್ತ್ರಾಸ್ತ್ರಗಳನ್ನು ಖರೀದಿಸಿದರೆ ತನ್ನ ನಿರ್ಬಂಧಗಳಿಗೆ ಒಳಪಡಬೇಕಾಗಬಹುದು ಎಂದು ಭಾರತಕ್ಕೆ ಅಮೆರಿಕ ಎಚ್ಚರಿಕೆ ನೀಡಿದೆ.

ಜಗತ್ತಿನ ಅತಿ ದೊಡ್ಡ ರಕ್ಷಣಾ ಆಮದುದಾರ ದೇಶವಾಗಿರುವ ಭಾರತ, ಶಸ್ತ್ರಾಸ್ತ್ರಗಳಿಗಾಗಿ ಅಮೆರಿಕ ಮಿಲಿಟರಿಯೊಂದಿಗೆ ವ್ಯವಹಾರ ನಡೆಸುತ್ತಿದೆ. ಜತೆಗೆ ರಷ್ಯಾದಿಂದ ವಾಯು ಕ್ಷಿಪಣಿ ವ್ಯವಸ್ಥೆಯಂತಹ ಅನೇಕ ತಾಂತ್ರಿಕ ಸಾಧನಗಳನ್ನು ಖರೀದಿಸಿದೆ.

ರಷ್ಯಾದೊಂದಿಗೆ ಸುದೀರ್ಘಕಾಲದ ವೈಮನಸ್ಸು ಹೊಂದಿರುವ ಅಮೆರಿಕವು ರಷ್ಯಾದ ರಕ್ಷಣಾ ಅಥವಾ ಬೇಹುಗಾರಿಕಾ ವಲಯದೊಂದಿಗೆ ಯಾವುದೇ ವ್ಯವಹಾರ ನಡೆಸುವ ತೃತೀಯ ರಾಷ್ಟ್ರಗಳ ಮೇಲೆ ನಿರ್ಬಂಧಗಳನ್ನು ವಿಧಿಸುವ ಸಾಧ್ಯತೆ ಇದೆ.

ತನ್ನ ಮಿತ್ರ ದೇಶವು ರಷ್ಯಾದಿಂದ ರಕ್ಷಣಾ ವಲಯಕ್ಕೆ ಸಂಬಂಧಿಸಿದ ಸಾಧನಗಳನ್ನು ಖರೀದಿಸುವ ವ್ಯವಹಾರಗಳನ್ನು ನಡೆಸಿದಾಗಲೂ ಅವರಿಗೆ ಅದಕ್ಕೆ ಸವಲತ್ತು ಒದಗಿಸುವ ಅಧಿಕಾರವನ್ನು ಅಮೆರಿಕದ ಸಂಸತ್ತು ಅಧ್ಯಕ್ಷರು ಮತ್ತು ವಿದೇಶಾಂಗ ಕಾರ್ಯದರ್ಶಿಗೆ ನೀಡಿದೆ.

ಏಷ್ಯ ಮತ್ತು ಪೆಸಿಫಿಕ್ ವಲಯದ ಭದ್ರತಾ ವ್ಯವಹಾರಗಳ ರಕ್ಷಣಾ ವಿಭಾಗದ ಪೆಂಟಗನ್‌ನ ಸಹಾಯಕ ಕಾರ್ಯದರ್ಶಿ ರಾಂಡಾಲ್ ಸ್ಕ್ರೈವರ್, ರಷ್ಯಾದಿಂದ ಭಾರತವು ಪ್ರಮುಖ ಹೊಸ ವ್ಯವಸ್ಥೆ ಮತ್ತು ತಂತ್ರಜ್ಞಾನಗಳನ್ನು ಪಡೆದುಕೊಳ್ಳಲು ಮುಂದಾಗುತ್ತದೆಯೇ ಎಂಬ ಕಳವಳ ಇದೆ. ಭಾರತಕ್ಕೆ ಇದರಿಂದ ವಿನಾಯಿತಿ ಕೊಡಬಹುದೇ ಅಥವಾ ಅದಕ್ಕೆ ನಿಬಂಧನೆಗಳನ್ನು ವಿಧಿಸಬಹುದೇ ಎಂದು ಇಲ್ಲಿ ಹೇಳಲು ಸಾಧ್ಯವಿಲ್ಲ ಎಂದಿದ್ದಾರೆ.

ಭಾರತವು ರಷ್ಯಾದಿಂದ ಎಸ್-400 ಕ್ಷಿಪಣಿಯನ್ನು ಖರೀದಿಸುವುದು ಅನೇಕ ಕಾರಣಗಳಿಂದ ಸಮಸ್ಯಾತ್ಮಕವಾಗಲಿದೆ. ನಮ್ಮ ಪ್ರಬಲವಾದ ಆದ್ಯತೆ ಏನೆಂದರೆ ಭಾರತವು ಪರ್ಯಾಯಗಳನ್ನು ನೋಡಬೇಕು ಮತ್ತು ಅದಕ್ಕೆ ಅಗತ್ಯವಾಗಿರುವ ದಕ್ಷಣಾ ಅಗತ್ಯಗಳನ್ನು ಪೂರೈಸುವಲ್ಲಿ ನಾವು ಸಹಭಾಗಿಗಳಾಗಬಹುದೇ ಎಂಬುದನ್ನು ಪರಿಶೀಲಿಸಬೇಕು ಎಂದು ಹೇಳಿದ್ದಾರೆ.

ಏಷ್ಯಾದಲ್ಲಿ ಚೀನಾದ ಪ್ರಾಬಲ್ಯವನ್ನು ಹೆಣೆಯುವ ಉದ್ದೇಶದಿಂದ ಅಮೆರಿಕವು ಭಾರತದೊಂದಿಗೆ ಇತ್ತೀಚಿನ ವರ್ಷಗಳಲ್ಲಿ ರಾಜತಾಂತ್ರಿಕ ಮತ್ತು ಮಿಲಿಟರಿ ಒಪ್ಪಂದಗಳನ್ನು ಹೆಚ್ಚು ಮಾಡಿಕೊಳ್ಳುತ್ತಿದೆ.

ಅಮೆರಿಕ ಮತ್ತು ಫ್ರಾನ್ಸ್‌ ದೇಶಗಳಿಂದ ಭಾರತ ಹೆಚ್ಚಿನ ಶಸ್ತ್ರಾಸ್ತ್ರಗಳನ್ನು ಕೊಳ್ಳುತ್ತಿದೆ. ಆದರೆ, ತನ್ನ ಹಾಲಿ ವ್ಯವಸ್ಥೆಯನ್ನು ನಿಭಾಯಿಸಲು ಹಾರ್ಡ್‌ವೇರ್ ಮತ್ತು ಪರಿಣತರಿಗಾಗಿ ಭಾರತ ಈಗಲೂ ರಷ್ಯಾವನ್ನು ಅವಲಂಬಿಸಿದೆ.

English summary

A top Pentagon official cautioned India for buying arms from Russia.