Housing Price: 2026ರಲ್ಲಿ ವಸತಿ ಬೆಲೆಗಳು ಶೇ 5ಕ್ಕಿಂತ ಏರಿಕೆ: ಕ್ರೆಡೈ ಸಮೀಕ್ಷೆ

ಬೆಂಗಳೂರು ಸೇರಿದಂತೆ ದೇಶದ ಪ್ರಮುಖ ನಗರಗಳಲ್ಲಿ ಈಗಾಗಲೇ ವಸತಿ ಬೆಲೆಗಳು ಗಗನಕ್ಕೇರಿವೆ. ಇದರ ನಡುವೆ ಕ್ರೆಡೈ ಮತ್ತು ಸಿಆರ್‌ಇ ಮ್ಯಾಟ್ರಿಕ್ಸ್ ನಡೆಸಿದ ಸಮೀಕ್ಷೆಯ ಪ್ರಕಾರ 2026ರಲ್ಲಿ ವಸತಿ ಬೆಲೆಗಳು ಶೇಕಡಾ 5ಕ್ಕಿಂತ ಹೆಚ್ಚು ಏರಿಕೆಯಾಗಲಿದೆ ಎಂದು ಹೇಳಿದೆ. ಸಮೀಕ್ಷೆಯಲ್ಲಿ ಪಾಲ್ಗೊಂಡ ಶೇಕಡಾ 70ರಷ್ಟು ರಿಯಲ್ ಎಸ್ಟೇಟ್ ಡೆವಲಪರ್‌ಗಳು ಈ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ.

ರಿಯಲ್‌ ಎಸ್ಟೇಟ್‌ ಸಂಸ್ಥೆಯಾದ ಕ್ರೆಡೈ ಮತ್ತು ರಿಯಲ್ ಎಸ್ಟೇಟ್ ಡೇಟಾ ವಿಶ್ಲೇಷಣಾ ಸಂಸ್ಥೆಯಾಗಿರುವ ಸಿಆರ್‌ಇ ಮ್ಯಾಟ್ರಿಕ್ಸ್‌ನವರು ರಿಯಲ್ ಎಸ್ಟೇಟ್ ಡೆವಲಪರ್‌ಗಳನ್ನು ಒಳಗೊಂಡಂತೆ ಸಮೀಕ್ಷೆ ನಡೆಸಿವೆ. ನವೆಂಬರ್ ಮತ್ತು ಡಿಸೆಂಬರ್‌ನಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ ಸುಮಾರು 647 ಡೆವಲಪರ್‌ಗಳು ಭಾಗಿಯಾಗಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದವರಲ್ಲಿ ಶೇಕಡಾ 68ರಷ್ಟು ಮಂದಿ ಮುಂದಿನ ವರ್ಷದಲ್ಲಿ ಮನೆ ಬೆಲೆಗಳು ಶೇಕಡಾ 5ಕ್ಕಿಂತ ಹೆಚ್ಚಾಗುತ್ತವೆ ಎಂದು ಭವಿಷ್ಯ ನುಡಿದಿದ್ದಾರೆ.

ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ನಡೆದ ಕ್ರೆಡೈ ಸಮಾವೇಶದಲ್ಲಿ ಈ ಸಮೀಕ್ಷೆಯ ವರದಿಯನ್ನು ಬಿಡುಗಡೆ ಮಾಡಲಾಗಿದೆ. ಸಮೀಕ್ಷೆಯ ವರದಿ ಹೇಳುವಂತೆ ಇದರಲ್ಲಿ ಪ್ರತಿಕ್ರಿಯಿಸಿದವರಲ್ಲಿ ಶೇಕಡಾ 1ರಷ್ಟು ಮಂದಿ ಮಾತ್ರವೇರು ಬೆಲೆಗಳು ಶೇಕಡಾ 25ಕ್ಕಿಂತ ಹೆಚ್ಚಾಗಬಹುದು ಎಂದು ಅಂದಾಜಿಸಿದ್ದಾರೆ. ಆದರೆ ಶೇಕಡಾ 3ರಷ್ಟು ಜನರು ವಸತಿ ಬೆಲೆಗಳು ಮುಂದಿನ ವರ್ಷ ಶೇ 15ರಿಂದ ಶೇ 25ರ ನಡುವೆ ಏರಿಕೆಯಾಗುತ್ತವೆ ಎಂದು ನಿರೀಕ್ಷಿಸಿದ್ದಾರೆ. ಶೇ 46ರಷ್ಟು ಜನರು ದರಗಳು ಶೇ 5ರಿಂದ ಶೇ 10ರವರೆಗೆ ಏರುವ ಸಾಧ್ಯತೆ ಇದೆ ಎಂದಿದ್ದಾರೆ.

3 ಬಿಹೆಚ್‌ಕೆ ಮನೆಗಳಿಗೆ ಬೇಡಿಕೆ

ಭಾರತದಾದ್ಯಂತ ಸುಮಾರು ಮೂರನೇ ಎರಡರಷ್ಟು ಡೆವಲಪರ್‌ಗಳು ಬೇಡಿಕೆಯು ಶೇ 5ಕ್ಕಿಂತ ಹೆಚ್ಚು ಬೆಳೆಯುತ್ತದೆ ಎಂದಿದ್ದಾರೆ. 2026ರಲ್ಲಿ ವಸತಿ ಬೆಲೆಗಳು ಶೇ 10ರಷ್ಟು ಹೆಚ್ಚಾಗುತ್ತವೆ ಎಂದು ಅಭಿಪ್ರಾಯ ತಿಳಿಸಿದ್ದಾರೆ. ಡೆವಲಪರ್‌ಗಳು 2026ರಲ್ಲಿ ಬಲವಾದ ಬೇಡಿಕೆ ಮತ್ತು ಬೆಲೆ ಏರಿಕೆಯನ್ನು ನಿರೀಕ್ಷಿಸುತ್ತಾರೆ. ಅನೇಕರು ಹೊಸ ಯೋಜನೆಗಳನ್ನು ಪ್ರಾರಂಭಿಸಲು ಯೋಜಿಸುತ್ತಿದ್ದಾರೆ. ತಂತ್ರಜ್ಞಾನ ಮತ್ತು ಜಿಎಸ್‌ಟಿ ನಿಯಮಗಳಲ್ಲಿನ ಬದಲಾವಣೆಯಿಂದಾಗಿ ವೆಚ್ಚದ ಹೊರೆ ಕಡಿಮೆಯಾಗುತ್ತಿವೆ. ಅಂತಿಮವಾಗಿ ಬಳಕೆದಾರರ ಬೇಡಿಕೆಯು ವಸತಿ ಮಾರುಕಟ್ಟೆಗೆ ಪ್ರಮುಖ ಚಾಲನೆ ನೀಡಲಿದೆ. ಹೀಗಾಗಿ ಡೆವಲಪರ್‌ಗಳು ಮಧ್ಯಮದಿಂದ ದೊಡ್ಡ ಗಾತ್ರದ ಅಪಾರ್ಟ್‌ಮೆಂಟ್‌ಗಳ ಮೇಲೆ, ಅದರಲ್ಲೂ ವಿಶೇಷವಾಗಿ 3 ಬಿಹೆಚ್‌ಕೆ ಮನೆಗಳ ಮೇಲೆ ಹೆಚ್ಚು ಕೇಂದ್ರೀಕರಿಸುತ್ತಿದ್ದಾರೆ.

2026ರಲ್ಲಿ ರಿಯಲ್ ಎಸ್ಟೇಟ್ ಬೆಳವಣಿಗೆಯು ಊಹೆಗೂ ಮೀರಿದ ಬೇಡಿಕೆ ದೃಢವಾಗಿರುತ್ತದೆ ಎಂದು ಈ ಸಮೀಕ್ಷೆ ಸ್ಪಷ್ಟವಾಗಿ ಸೂಚಿಸುತ್ತದೆ ಎಂದು ಕ್ರೆಡೈ ಅಧ್ಯಕ್ಷ ಶೇಖರ್ ಜಿ ಪಟೇಲ್ ಹೇಳಿದ್ದಾರೆ. ತಂತ್ರಜ್ಞಾನ ಅಳವಡಿಕೆ ಮತ್ತು ಉತ್ಪನ್ನ ಕೊಡುಗೆಗಳ ನಡುವೆ ನಿಕಟ ಜೋಡಣೆ ಮತ್ತು ವಿಕಸನಗೊಳ್ಳುತ್ತಿರುವ ಮನೆ ಖರೀದಿದಾರರ ಆದ್ಯತೆಗಳ ಮೂಲಕ ಈ ವೆಚ್ಚ ದಕ್ಷತೆಯ ಮೇಲೆ ಬಲವಾದ ಒತ್ತು ನೀಡಲಿದೆ. ಈ ಮೂಲಕ ಹೊಸ ಪೂರೈಕೆಗೆ ಈ ವಲಯ ಕಾಯುತ್ತಿದೆ ಎಂದಿದ್ದಾರೆ.

ಡೆವಲಪರ್‌ಗಳ ಗಮನ ಹೇಗಿದೆ?

ಡೆವಲಪರ್‌ಗಳು 1-3 ಕೋಟಿ ರೂಪಾಯಿಗಳ ವಸತಿಗಳ ಮೇಲೆ ಕೇಂದ್ರೀಕರಿಸಲು ಯೋಜಿಸಿದ್ದಾರೆ. 50 ಲಕ್ಷ ರೂಪಾಯಿಯಿಂದ 1 ಕೋಟಿ ರೂಪಾಯಿವರೆಗೆ ಕೈಗೆಟುಕುವ-ಮಧ್ಯಮ ವಿಭಾಗದಲ್ಲಿ ನಾಲ್ಕನೇ ಒಂದು ಭಾಗದಷ್ಟು ಡೆವಲಪರ್‌ಗಳು ಹೊಸ ಮನೆಗಳನ್ನು ಪ್ರಾರಂಭಿಸಲಿದ್ದಾರೆ. ಅರ್ಧಕ್ಕಿಂತ ಹೆಚ್ಚಿನವರು ತಮ್ಮ ಮನೆಗಳ ಬಿಡುಗಡೆಗಾಗಿ ಪ್ರಾಥಮಿಕವಾಗಿ ಮಧ್ಯಮದಿಂದ ದೊಡ್ಡ ಗಾತ್ರದ ಅಪಾರ್ಟ್‌ಮೆಂಟ್‌ಗಳ ಮೇಲೆ ಕೇಂದ್ರೀಕರಿಸಲು ಯೋಜಿಸಿದ್ದಾರೆ. ಇದರಲ್ಲಿ ಮೂರು-ಬಿಎಚ್‌ಕೆ ಮನೆಗಳು ಬೇಡಿಕೆಯಲ್ಲಿವೆ.

English summary

As per a CREDAI and CRE Matrix survey, housing prices across major Indian cities including Bengaluru are expected to rise by over 5% in 2026 due to strong demand and new project launches.