Bengaluru: ಶಾಲೆಗಳಿಗೂ BWSSB ನೀರಿನ ಬಿಲ್ ಶಾಕ್; ಡಿಸಿಎಂ ಡಿ.ಕೆ. ಶಿವಕುಮಾರ್ ಮೊರೆ ಹೋದ ಖಾಸಗಿ ಶಿಕ್ಷಣ ಸಂಸ್ಥೆಗಳು

ಬೆಂಗಳೂರು: ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿಯು (BWSSB) ಖಾಸಗಿ ಶಿಕ್ಷಣ ಸಂಸ್ಥೆಗಳನ್ನು ಲಾಭದಾಯಕ ಉದ್ದಿಮೆಗಳಂತೆ 'ವಾಣಿಜ್ಯ' ವರ್ಗದಡಿ ಸೇರಿಸಿ, ದುಬಾರಿ ನೀರಿನ ಬಿಲ್ ಮತ್ತು ಇತರ ಶುಲ್ಕಗಳನ್ನು ವಿಧಿಸುತ್ತಿರುವುದರ ವಿರುದ್ಧ ಕರ್ನಾಟಕದ ಖಾಸಗಿ ಶಾಲೆಗಳು ತೀವ್ರ ಅಸಮಾಧಾನ ವ್ಯಕ್ತಪಡಿಸಿವೆ. ಈ ಅವೈಜ್ಞಾನಿಕ ಶುಲ್ಕ ಪದ್ಧತಿಯನ್ನು ವಿರೋಧಿಸಿ 'ಕರ್ನಾಟಕ ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳ ಆಡಳಿತ ಮಂಡಳಿಗಳ ಒಕ್ಕೂಟ' (KAMS - ಕ್ಯಾಮ್ಸ್) ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ಅಧಿಕೃತವಾಗಿ ಮನವಿ ಪತ್ರ ಸಲ್ಲಿಸಿದ್ದು, ತಕ್ಷಣವೇ ಮಧ್ಯಪ್ರವೇಶಿಸುವಂತೆ ಆಗ್ರಹಿಸಿದೆ.

ವಾಣಿಜ್ಯ ವರ್ಗೀಕರಣದ ತಾರತಮ್ಯ

ಶಾಲೆಗಳನ್ನು ವಾಣಿಜ್ಯ ಸಂಸ್ಥೆಗಳಂತೆ ಪರಿಗಣಿಸಿ ಜಲಮಂಡಳಿಯು ತಾರತಮ್ಯ ಮಾಡುತ್ತಿದೆ ಎಂಬುದು ಒಕ್ಕೂಟದ ಪ್ರಮುಖ ಆರೋಪ. ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಡಿ. ಶಶಿಕುಮಾರ್ ಅವರ ಪ್ರಕಾರ, "ಜಲಮಂಡಳಿಯ ಬಿಲ್ಲಿಂಗ್ ದಾಖಲೆಗಳನ್ನು ಪರಿಶೀಲಿಸಿದಾಗ ಶಿಕ್ಷಣ ಸಂಸ್ಥೆಗಳನ್ನು ಅನ್ಯಾಯವಾಗಿ ವಾಣಿಜ್ಯ ವರ್ಗಕ್ಕೆ ಸೇರಿಸಿರುವುದು ಸ್ಪಷ್ಟವಾಗಿದೆ. ಸಾಮಾನ್ಯ ಖಾಸಗಿ ಶಾಲೆಗಳು ಅಥವಾ ತರಬೇತಿ ಸಂಸ್ಥೆಗಳ ವರ್ಗಕ್ಕೆ ಸೇರಿದರೆ ತಿಂಗಳಿಗೆ 2,500 ರೂಪಾಯಿ ಶುಲ್ಕ ವಿಧಿಸಲಾಗುತ್ತಿದೆ. ಆದರೆ, ವಾಣಿಜ್ಯ ವರ್ಗದಡಿ ಬರುವ ಶಿಕ್ಷಣ ಸಂಸ್ಥೆಗಳಿಗೆ ಬರೋಬ್ಬರಿ 25,000 ರೂಪಾಯಿಗಳಷ್ಟು ದುಬಾರಿ BWSSB ನೀರಿನ ಬಿಲ್ ನೀಡಲಾಗುತ್ತಿದೆ."

"ಎಲ್ಲಾ CBSE ಮತ್ತು ICSE ಶಾಲೆಗಳು ಶುಲ್ಕ ವಸೂಲಿ ಮಾಡುವ ವಾಣಿಜ್ಯ ಸಂಸ್ಥೆಗಳು ಎಂಬ ತಪ್ಪು ಕಲ್ಪನೆಯನ್ನು ಈ ವರ್ಗೀಕರಣ ಹುಟ್ಟುಹಾಕುತ್ತದೆ. ಇದು ಸಂಪೂರ್ಣ ತಾರತಮ್ಯದಿಂದ ಕೂಡಿದ್ದು, ಸಂವಿಧಾನ ನೀಡಿರುವ 'ಸಮಾನತೆಯ ಹಕ್ಕು' ಹಾಗೂ 'ಶಿಕ್ಷಣದ ಹಕ್ಕಿನ' ಸ್ಪಷ್ಟ ಉಲ್ಲಂಘನೆಯಾಗಿದೆ," ಎಂದು ಶಶಿಕುಮಾರ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕೇವಲ ದುಬಾರಿ ಮೂಲ ಶುಲ್ಕ ಮಾತ್ರವಲ್ಲದೆ, ಜಲಮಂಡಳಿಯು ತನ್ನ ಬಿಲ್ಲಿಂಗ್ ವ್ಯವಸ್ಥೆಯಲ್ಲಿ ಹಲವು ಅಸ್ಪಷ್ಟ ಮತ್ತು ಇತರ ಶುಲ್ಕಗಳನ್ನು ಸೇರಿಸಿದೆ ಎಂದು ಕ್ಯಾಮ್ಸ್ ಆರೋಪಿಸಿದೆ. ಒಳಚರಂಡಿ ಶುಲ್ಕಗಳು, ಜಿಬಿಎ ಶುಲ್ಕಗಳು, ವಾಣಿಜ್ಯ ಪರ-ರಾಟಾ (Pro rata) ಶುಲ್ಕಗಳು, ನೀರಿನ ಬಳಕೆಯ ಆಧಾರದ ಮೇಲೆ ಹೆಚ್ಚುವರಿ ಸರ್‌ಚಾರ್ಜ್, ಪ್ರತಿ ತಿಂಗಳಿಗೊಮ್ಮೆ ವಿಧಿಸುವ ಹೆಚ್ಚುವರಿ ದಂಡ, ಹಾಗೂ ಹಳೆಯ ಕಟ್ಟಡಗಳಿಗೆ ಸ್ವಾಧೀನ ಪತ್ರ (OC - Occupancy Certificate) ಇಲ್ಲದಿರುವುದಕ್ಕೆ ಪ್ರತ್ಯೇಕ ದಂಡವನ್ನು ವಿಧಿಸುವ ಮೂಲಕ ಶಾಲೆಗಳನ್ನು ಆರ್ಥಿಕವಾಗಿ ಹೈರಾಣಾಗಿಸಲಾಗುತ್ತಿದೆ ಎಂದು ಡಿಸಿಎಂ ಗಮನಕ್ಕೆ ತರಲಾಗಿದೆ.

ಪೋಷಕರು ಮತ್ತು ವಿದ್ಯಾರ್ಥಿಗಳ ಮೇಲೆ ಪರೋಕ್ಷ ಪ್ರಭಾವ

ಶಾಲೆಗಳ ಮೇಲೆ ಜಲಮಂಡಳಿಯು ಈ ರೀತಿಯ ವಿಪರೀತ ಆರ್ಥಿಕ ಒತ್ತಡವನ್ನು ಹೇರುತ್ತಿರುವುದರಿಂದ ಶಾಲಾ ನಿರ್ವಹಣಾ ವೆಚ್ಚಗಳು ಗಣನೀಯವಾಗಿ ಏರಿಕೆಯಾಗುತ್ತಿವೆ. ಈ ಹೆಚ್ಚುವರಿ ಆರ್ಥಿಕ ಹೊರೆಯು ಅಂತಿಮವಾಗಿ ಶಾಲಾ ಶುಲ್ಕದ ರೂಪದಲ್ಲಿ ಪೋಷಕರು ಮತ್ತು ವಿದ್ಯಾರ್ಥಿಗಳ ಮೇಲೆಯೇ ಪರೋಕ್ಷವಾಗಿ ಬೀಳುತ್ತದೆ ಎಂದು ಒಕ್ಕೂಟ ಆತಂಕ ವ್ಯಕ್ತಪಡಿಸಿದೆ. ಸರ್ಕಾರಿ ಶಾಲೆಗಳಂತೆಯೇ ಖಾಸಗಿ ಶಾಲೆಗಳು ಕೂಡ ಸಮಾಜದ ವಿವಿಧ ವರ್ಗದ ಮಕ್ಕಳಿಗೆ ಶಿಕ್ಷಣ ನೀಡುತ್ತಿದ್ದು, ಜಲಮಂಡಳಿಯು ಶಿಕ್ಷಣವನ್ನು ಕೇವಲ ಒಂದು ವಾಣಿಜ್ಯ ಚಟುವಟಿಕೆ ಎಂದು ಪರಿಗಣಿಸಬಾರದು ಎಂದು ಆಗ್ರಹಿಸಲಾಗಿದೆ.

ಈ ಕೂಡಲೇ ಸರ್ಕಾರ ಮಧ್ಯಪ್ರವೇಶಿಸಿ ಖಾಸಗಿ ಶಾಲೆಗಳನ್ನು ವಾಣಿಜ್ಯ ವರ್ಗದಿಂದ ಕೈಬಿಡಬೇಕು ಮತ್ತು ಎಲ್ಲಾ ರೀತಿಯ ಶಿಕ್ಷಣ ಸಂಸ್ಥೆಗಳಿಗೆ ಅನ್ವಯವಾಗುವಂತೆ ಏಕರೂಪದ, ಕೈಗೆಟಕುವ 'ಶೈಕ್ಷಣಿಕ' ಶುಲ್ಕ ದರವನ್ನು ನಿಗದಿಪಡಿಸಬೇಕು ಎಂದು ಕ್ಯಾಮ್ಸ್ ಒಕ್ಕೂಟವು ಡಿ.ಕೆ. ಶಿವಕುಮಾರ್ ಅವರನ್ನು ಒತ್ತಾಯಿಸಿದೆ. ಬೆಂಗಳೂರು ನಗರಾಭಿವೃದ್ಧಿ ಸಚಿವರೂ ಆಗಿರುವ ಡಿಸಿಎಂ ಅವರು ಈ ಮನವಿಗೆ ಸ್ಪಂದಿಸಿ ಜಲಮಂಡಳಿಗೆ ಯಾವ ಸೂಚನೆ ನೀಡಲಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ.

English summary

Private educational institutions in Karnataka, under KAMS, have petitioned Deputy CM D K Shivakumar against the BWSSB for unfairly classifying schools under the commercial category