ಬೆಂಗಳೂರು ಸುತ್ತುವ ಬಿಎಂಟಿಸಿ ಬಸ್ಸಿಗೆ ಮೂರೇ ಬಣ್ಣ!
ಬೆಂಗಳೂರು, ಮಾ.5 : ಬೆಂಗಳೂರಿನ ರಸ್ತೆಗಳಲ್ಲಿ ಇನ್ನು ಬಣ್ಣ-ಬಣ್ಣದ ಬಿಎಂಟಿಸಿ ಬಸ್ಸುಗಳು ಸಂಚರಿಸುವುದಿಲ್ಲ. ಸಂಸ್ಥೆಯ ಎಲ್ಲಾ ಬಸ್ಸುಗಳು ಇನ್ನು ಮುಂದೆ ಮೂರು ಬಣ್ಣಗಳನ್ನು ಮಾತ್ರ ಹೊಂದಿರಲಿದ್ದು, ಪ್ರಯಾಣಿಕರಿಗೆ ಆಗುವ ಗೊಂದಲವೂ ಕಡಿಮೆಯಾಗಲಿದೆ.
ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (ಬಿಎಂಟಿಸಿ) ಎಲ್ಲಾ ಬಸ್ಸುಗಳ ಬಣ್ಣ ಬದಲಾವಣೆ ಮಾಡಲಿದೆ. ಹಸಿರು, ಕಿತ್ತಲೆ, ನೀಲಿ ಬಣ್ಣಗಳನ್ನು ಹೊಂದಿರುವ ಬಸ್ಸುಗಳನ್ನು ಮಾತ್ರ ಇನ್ನುಮುಂದೆ ಕಾಣಬಹುದಾಗಿದೆ. ಮುಂದಿನ ಒಂದು ವರ್ಷದಲ್ಲಿ ಈ ಯೋಜನೆ ಸಂಪೂರ್ಣವಾಗಿ ಜಾರಿಗೆ ಬರಲಿದೆ. [ಬಿಎಂಟಿಸಿ ಬಸ್ಸಿನ ಬಣ್ಣ ಬದಲು]
ಬಿಎಂಟಿಸಿ ವ್ಯವಸ್ಥಾಪಕ ನಿರ್ದೇಶಕಿ ಏಕ್ರೂಪ್ ಕೌರ್ ಈ ಕುರಿತು ಮಾಹಿತಿ ನೀಡಿದ್ದು, ಬಿಎಂಟಿಸಿಯಲ್ಲಿ 6,700ಕ್ಕೂ ಹೆಚ್ಚು ಬಸ್ಸುಗಳಿದ್ದು, ಸುಮಾರು 18 ಬಣ್ಣದ ಬಸ್ಸುಗಳು ಸಂಚಾರ ನಡೆಸುತ್ತಿವೆ. ಇದರಿಂದ ಗೊಂದಲ ಉಂಟಾಗುತ್ತಿದ್ದು, ಆದ್ದರಿಂದ ಬಸ್ಸುಗಳ ಬಣ್ಣ ಬದಲಾವಣೆ ಮಾಡಲು ನಿರ್ಧರಿಸಲಾಗಿದೆ ಎಂದು ಹೇಳಿದ್ದಾರೆ.[ಎಲೆಕ್ಟ್ರಾನಿಕ್ ಸಿಟಿಗೆ ಹೋಗುವುದು ಸುಲಭ]
ಕೇವಲ ಬಸ್ಸಿನ ಬಣ್ಣಗಳನ್ನು ಮಾತ್ರ ಬದಲಾವಣೆ ಮಾಡುವುದಿಲ್ಲ. ಬಸ್ಸು ಸೇವೆಗಳ ಹೆಸರುಗಳನ್ನು ಕನ್ನಡದಲ್ಲಿ ಬರೆಯಲಾಗುತ್ತದೆ. ಸುಮಾರು ಒಂದು ವರ್ಷದಲ್ಲಿ ಈ ಕಾರ್ಯ ಪೂರ್ಣಗೊಳ್ಳಲಿದೆ ಎಂದು ನಿರೀಕ್ಷಿಸಲಾಗಿದ್ದು, ಇದಕ್ಕೆ ಹೆಚ್ಚು ವೆಚ್ಚವೂ ಆಗುವುದಿಲ್ಲ. [ಬೆರಳತುದಿಯಲ್ಲಿ ಬಿಎಂಟಿಸಿ ಮಾಹಿತಿ ಪಡೆಯಿರಿ]
ಯಾವ ಬಸ್ಸಿಗೆ ಯಾವ ಬಣ್ಣ : ಸಾಮಾನ್ಯ ದರವಿರುವ ಬಸ್ಸಿಗೆ 'ಹಸಿರು ಸರಣಿ' ಎಂದು ನಾಮಕರಣ ಮಾಡಲಾಗುತ್ತದೆ. ಸಾಮಾನ್ಯ, ಬಿಗ್ ಟ್ರಂಕ್, ಬಿಗ್ ಸರ್ಕಲ್ ಸೇವೆಗಳು ಹಸಿರು ಬಣ್ಣದಲ್ಲಿ ಕಂಗೊಳಿಸಲಿವೆ.
'ಕಿತ್ತಳೆ ಸರಣಿ' ಬಸ್ಸುಗಳಲ್ಲಿಯೂ ಸಾಮಾನ್ಯ ದರವಿದ್ದು, ಫೀಡರ್ ಸೇವೆಯ ಬಸ್ಸುಗಳು ಈ ಮಾದರಿಗೆ ಸೇರ್ಪಡೆಯಾಗುತ್ತವೆ. ಇನ್ನೂ 'ನೀಲಿ ಸರಣಿ' ಬಸ್ಸುಗಳಲ್ಲಿ ವಜ್ರ, ವಾಯುವಜ್ರ ಸೇವೆಗಳು ಸೇರಲಿದ್ದು ಪ್ರಯಾಣದರ ಹೆಚ್ಚಾಗಿರುತ್ತದೆ.
ಗೊಂದಲವೇನು : ಬಿಎಂಟಿಸಿಯ ನಾನಾ ಬಣ್ಣದ ಬಸ್ಸುಗಳು ರಸ್ತೆಗಿಳಿಯುವುದರಿಂದ ಹಲವಾರು ಗೊಂದಲಗಳು ಉಂಟಾಗುತ್ತಿದ್ದವು. ಕೆಂಪು ಬಣ್ಣದ ವೋಲ್ವೊ ಬಸ್ಗಳಲ್ಲಿ ಪ್ರಯಾಣದರ ಹೆಚ್ಚು, ಸಾಮಾನ್ಯ ದರವಿರುವ ಹಲವು ಬಸ್ಸುಗಳು ಕೆಂಪು ಬಣ್ಣಹೊಂದಿದ್ದವು. ಆದ್ದರಿಂದ ಜನರು ಇದರಲ್ಲಿ ಪ್ರಯಾಣಿಸುತ್ತಿರಲಿಲ್ಲ. ಬಣ್ಣ ಬದಲಾವಣೆ ಮಾಡಿದರೆ ಈ ಗೊಂದಲ ನಿವಾರಣೆಯಾಗುತ್ತದೆ.
Click it and Unblock the Notifications
Sign in with Google