ಲಾಲ್ ಬಾಗ್ ನಲ್ಲಿ ಜನವರಿ ಹೊತ್ತಿಗೆ ಮಿನಿ ನಯಾಗರ ಜಲಪಾತ
ಬೆಂಗಳೂರು, ನವೆಂಬರ್ 10: ಇಲ್ಲಿನ ಲಾಲ್ ಬಾಗ್ ಬಹು ದೊಡ್ಡ ಆಕರ್ಷಣೆ ಎಂಬುದರಲ್ಲಿ ಎರಡು ಮಾತಿಲ್ಲ. ಮುಂದಿನ ಜನವರಿ ವೇಳೆಗೆ ಈ ಆಕರ್ಷಣೆಗೆ ಮತ್ತಷ್ಟು ಮೆರುಗು ಸೇರ್ಪಡೆಯಾಗಲಿದೆ. ಅಂದುಕೊಂಡಂತೆ ಎಲ್ಲವೂ ನೆರವೇರಿದರೆ ಲಾಲ್ ಬಾಗ್ ನ ಸಸ್ಯೋದ್ಯಾನದಲ್ಲಿ ಮುಂದಿನ ಜನವರಿ ಹೊತ್ತಿಗೆ ಮಿನಿ ನಯಾಗರ ಜಲಪಾತ ನಿರ್ಮಾಣವಾಗುತ್ತದೆ.
ಕೃತಕವಾಗಿ ನಿರ್ಮಿಸುವ ಈ ಜಲಪಾತ 25 ಅಡಿಯಷ್ಟು ಎತ್ತರ ಇರಲಿದೆ. 120 ಅಡಿಯಷ್ಟು ವಿಸ್ತಾರವಾಗಿ ನೀರು ಧುಮ್ಮಿಕ್ಕಲಿದೆ. ಈ ಯೋಜನೆಗೆ 2.7 ಕೋಟಿ ರುಪಾಯಿ ವೆಚ್ಚ ತಗುಲಲಿದ್ದು, ಆ ಮೊತ್ತವನ್ನು ರಾಜ್ಯ ತೋಟಗಾರಿಕೆ ಇಲಾಖೆಯಿಂದ ನೀಡಲಾಗಿದೆ. ಕಳೆದ ಒಂದು ವರ್ಷದಿಂದ ಲೋಕೋಪಯೋಗಿ ಇಲಾಖೆಯಿಂದ ಈ ಕಾಮಗಾರಿ ನಡೆಯುತ್ತಿದೆ.
ಲಾಲ್ ಬಾಗ್ ಕೆರೆಯ ಬಳಿಯೇ ಈ ಜಲಪಾತ ನಿರ್ಮಿಸುತ್ತಿದ್ದು, ಕೆರೆಯ ನೀರನ್ನೇ ಇದಕ್ಕಾಗಿ ಬಳಸಿಕೊಳ್ಳಲಾಗುತ್ತದೆ. ಇದು ಹೇಗೆ ಕೆಲಸ ಮಾಡುತ್ತದೆ ಎಂಬುದನ್ನು ತಿಳಿಯಲು ಇನ್ನು ಹದಿನೈದು ದಿನದಲ್ಲಿ ಪ್ರಾಯೋಗಿಕ ಪರೀಕ್ಷೆ ನಡೆಯಲಿದೆ ಎಂದು ಮೂಲಗಳು ತಿಳಿಸಿವೆ.
ಕಳೆದ ಮೇನಲ್ಲಿ ಈ ಮಿನಿ ನಯಾಗರ ನಿರ್ಮಾಣ ಆಗುವ ಬಗ್ಗೆ ವರದಿಯಾಗಿತ್ತು. ಮಿನಿ ನಯಾಗರ ನಿರ್ಮಾಣಕ್ಕಾಗಿ ಲಾಲ್ ಬಾಗ್ ನ ದೊಡ್ಡ ಕೆರೆಯಿಂದ ಸಣ್ಣ ಕೆರೆಗೆ ನೀರು ಪಂಪ್ ಮಾಡಲಾಗುತ್ತದೆ. ಅದಕ್ಕಾಗಿ 250 ಎಚ್ ಪಿ ಸಾಮರ್ಥ್ಯದ ಮೋಟಾರ್ ಬಳಸಲಾಗುತ್ತದೆ.
ಈ ರೀತಿ ವಿಶ್ವ ಪ್ರಸಿದ್ಧ ಜಲಪಾತವೊಂದರ ತದ್ರೂಪು ಮಾದರಿ ನಿರ್ಮಿಸುವುದರಿಂದ ದೇಶ- ವಿದೇಶದ ಪ್ರವಾಸಿಗರನ್ನು ಸೆಳೆಯುವುದಷ್ಟೇ ಅಲ್ಲ, ಸ್ಥಳೀಯರ ಪಾಲಿಗೂ ಪ್ರಮುಖ ಆಕರ್ಷಣೆ ಆಗಲಿದೆ ಎಂಬ ನಂಬಿಕೆ ವ್ಯಕ್ತವಾಗಿದೆ.
Click it and Unblock the Notifications
Sign in with Google