ಮತ್ತೆ ನೆನಪಾಯಿತು ಮಲ್ಯರ ಕುಣಿಗಲ್ ಕುದುರೆ ಫಾರ್ಮ್, ಷೇರು ಖರೀದಿಸಿದರೆ ಜೋಕೆ

ಬೆಂಗಳೂರು, ಅಕ್ಟೋಬರ್ 25: ಉದ್ದೇಶಿತ ಸುಸ್ತಿದಾರ- ದೇಶ ಬಿಟ್ಟು ಹೋಗಿರುವ ಉದ್ಯಮಿ ವಿಜಯ್ ಮಲ್ಯಗೆ ಸೇರಿದ 41 ಲಕ್ಷಕ್ಕೂ ಹೆಚ್ಚು ಷೇರುಗಳನ್ನು ಸಾಲ ವಸೂಲಾತಿ ಟ್ರಿಬ್ಯುನಲ್ ಅಕ್ಟೋಬರ್ 30ರಂದು ಇ ಹರಾಜು ಮೂಲಕ ಮಾರಾಟಕ್ಕೆ ಇಟ್ಟಿದೆ. ಆದರೆ ಇದನ್ನು ಸಾರ್ವಜನಿಕರು ಖರೀದಿಸದಂತೆ ಆದಾಯ ತೆರಿಗೆ ಇಲಾಖೆ ಗುರುವಾರ ಎಚ್ಚರಿಕೆ ನೀಡಿದೆ.

"ಮಲ್ಯರ ಷೇರು ಹೊಂದಿರುವ ಅವರ ಸಹವರ್ತಿ ಕಂಪನಿ ಯುನೈಟೆಡ್ ರೇಸಿಂಗ್ ಅಂಡ್ ಬ್ಲಡ್ ಸ್ಟಾಕ್ ಬ್ರೀಡರ್ಸ್ ಲಿಮಿಟೆಡ್ (URBBL)ನಿಂದ ಇ ಹರಾಜಿನಲ್ಲಿ ಷೇರು ಖರೀದಿಸಿದರೆ ಅದಕ್ಕೆ ಆಯಾ ವ್ಯಕ್ತಿಗಳೇ ಜವಾಬ್ದಾರರು. ತೆರಿಗೆ ತಪ್ಪಿಸಿದ ಅಥವಾ ತೆರಿಗೆ ವಂಚನೆ ಪ್ರಕರಣದಲ್ಲಿ ಆ ಷೇರುಗಳು ನಮ್ಮ ಸುಪರ್ದಿಯಲ್ಲೇ ಇವೆ" ಎಂದು ಆದಾಯ ತೆರಿಗೆ ಅಧಿಕಾರಿ ಎನ್.ರಾಟಿ ತಿಳಿಸಿದ್ದಾರೆ.

ಇನ್ನು ಸಾಲ ವಸೂಲಾತಿ ಟ್ರಿಬ್ಯುನಲ್ ನಿಂದ ಅಕ್ಟೋಬರ್ 30ಕ್ಕೆ URBBL ಷೇರುಗಳನ್ನು ಇ ಆಕ್ಷನ್ ಮೂಲಕ ಮಾರಾಟಕ್ಕೆ ಇಡಲಾಗಿದೆ. ಹದಿನೇಳು ಬ್ಯಾಂಕ್ ಗಳ ಒಕ್ಕೂಟದಿಂದ 2008ರಿಂದ 2012ರ ಮಧ್ಯೆ, ಸದ್ಯಕ್ಕೆ ಕಾರ್ಯ ನಿರ್ವಹಿಸದ ಕಿಂಗ್ ಫಿಷರ್ ಏರ್ ಲೈನ್ಸ್ ಗಾಗಿ ಮಲ್ಯ ಸಾಲ ಪಡೆದಿದ್ದರು. ಅದನ್ನು ವಸೂಲಿ ಮಾಡುವ ಸಲುವಾಗಿ ಈ ಹರಾಜು ಆಯೋಜಿಸಲಾಗಿದೆ.

ಈ ಷೇರುಗಳ ಮಾರಾಟ ಅಥವಾ ವರ್ಗಾವಣೆ ಸೆಕ್ಷನ್ 281 ಆದಾಯ ತೆರಿಗೆ ಕಾಯ್ದೆ 1961ರ ಪ್ರಕಾರ ನ್ಯಾಯಸಮ್ಮತವಲ್ಲ. ಯಾವುದೇ ವ್ಯಕ್ತಿ ಇಂಥ ಷೇರುಗಳನ್ನು ಖರೀದಿ ಮಾಡಿದರೆ ಅದಕ್ಕೆ ಸ್ವತಃ ಜವಾಬ್ದಾರರು ಎಂದು ರಾಟಿ ಹೇಳಿದ್ದಾರೆ.

ವಿಜಯ್ ಮಲ್ಯ 1988ರಲ್ಲಿ URBBL ಹೆಸರಿನಲ್ಲಿ ಲಿಸ್ಟ್ ಆಗದ ಕಂಪನಿಯೊಂದನ್ನು ಆರಂಭಿಸಿದ್ದರು. ಕುದುರೆ ರೇಸಿನ ಬಗ್ಗೆ ಅವರಿಗಿರುವ ಆಸಕ್ತಿ ಹಾಗೂ ಕುದುರೆ ತಳಿ ಅಭಿವೃದ್ಧಿಗೆ ಸಂಬಂಧಿಸಿದಂತೆ ಅವರಿಗಿರುವ ಆಸಕ್ತಿಯನ್ನು ಒಂದು ಕಡೆ ಕ್ರೋಡೀಕರಿಸಲು ಈ ಕಂಪನಿ ಮಾಡಿಕೊಂಡಿದ್ದರು.

1992ರಲ್ಲಿ ಐತಿಹಾಸಿಕವಾದ ಕುಣಿಗಲ್ ಕುದುರೆ ಫಾರ್ಮ್ ಅನ್ನು ವಿಜಯ್ ಮಲ್ಯ ಖರೀದಿಸಿದ್ದರು. ಉತ್ತಮ ದರ್ಜೆಯ ಕುದುರೆ ತಳಿಗಳನ್ನು ಬೆಳೆಸಲು ತುಮಕೂರು ಜಿಲ್ಲೆಯ ಕುಣಿಗಲ್ ನಲ್ಲಿ ಜಾಗ ಖರೀದಿಸಿದ್ದರು. ಈ ಸ್ಥಳ ಬೆಂಗಳೂರಿನಿಂದ 70 ಕಿ.ಮೀ. ದೂರದಲ್ಲಿದೆ.

English summary

The Income Tax Department on Thursday cautioned the public against buying over 41 lakh equity shares of fugitive tycoon Vijay Mallya's company that the Debt Recovery Tribunal-II has put up for sale through e-auction on October 30, an official said.