ಕೆಎಂಎಫ್ ಅಧ್ಯಕ್ಷ ಹುದ್ದೆ ಹಗರಿಬೊಮ್ಮನಹಳ್ಳಿ ಶಾಸಕ ಭೀಮಾ ನಾಯಕ್ ಪಾಲು!
ಬೆಂಗಳೂರು, ಜುಲೈ 10: ರಾಜ್ಯ ಸರಕಾರವನ್ನು ಉಳಿಸಿಕೊಳ್ಳುವ ಸಲುವಾಗಿ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಅವರು ಕೆಎಂಎಫ್ ಅಧ್ಯಕ್ಷ ಸ್ಥಾನವನ್ನು ಹಗರಿಬೊಮ್ಮನಹಳ್ಳಿ ಶಾಸಕ ಭೀಮಾನಾಯಕ್ ಗೆ ನೀಡಲು ಒಪ್ಪಿಕೊಂಡಿದ್ದಾರೆ ಎನ್ನಲಾಗಿದೆ. ಆ ಸ್ಥಾನದ ಮೇಲೆ ಲೋಕೋಪಯೋಗಿ ಸಚಿವ ಎಚ್.ಡಿ.ರೇವಣ್ಣ ಕಣ್ಣಿಟ್ಟಿದ್ದರು.
ಕೆಎಂಎಫ್ ನಲ್ಲಿ ಕಾಂಗ್ರೆಸ್ ಅತಿ ಹೆಚ್ಚು ಸ್ಥಾನವನ್ನು ಹೊಂದಿದ್ದು, ಒಕ್ಕೂಟದ ಅಧ್ಯಕ್ಷ ಸ್ಥಾನ ಕಾಂಗ್ರೆಸ್ ಗೆ ದೊರೆಯಬೇಕು ಎಂದು ಪಟ್ಟು ಹಿಡಿಯಲಾಗಿತ್ತು. ಎಲ್ಲಿ ಕೆಎಂಎಫ್ ಅಧ್ಯಕ್ಷ ಸ್ಥಾನ ಭೀಮಾ ನಾಯಕ್ ಗೆ ಸಿಗದೆ ಇದ್ದರೆ ಅವರು ಕೂಡ ಅತೃಪ್ತರ ರೀತಿಯಲ್ಲಿ ತಮ್ಮ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಬಹುದು ಎಂಬ ಆತಂಕದಲ್ಲಿ ಕೆಎಂಎಫ್ ಅಧ್ಯಕ್ಷ ಸ್ಥಾನ ನೀಡಲಾಗಿದೆ ಎನ್ನಲಾಗುತ್ತಿದೆ.
ಅಧ್ಯಕ್ಷ ಪಟ್ಟಕ್ಕಾಗಿ ರೇವಣ್ಣ ಹಾಗೂ ಭೀಮಾನಾಯಕ್ ಮಧ್ಯೆ ತೀವ್ರ ಪೈಪೋಟಿ ಇತ್ತು. ಇದೇ ವಿಚಾರವಾಗಿ ಎಚ್.ಡಿ.ದೇವೇಗೌಡರ ಬಳಿ ಕೂಡ ಮಾತುಕತೆ ನಡೆಸಿದ್ದರು ರೇವಣ್ಣ. ದಶಕಗಳ ನಂತರ ಮತ್ತೆ ರೇವಣ್ಣ ಅವರಿಗೆ ಈ ಹುದ್ದೆಯನ್ನು ಕೊಡಿಸುವುದಾಗಿ ದೇವೇಗೌಡರು ಕೂಡ ಮಾತು ನೀಡಿದ್ದರು ಎಂದು ಸುದ್ದಿಯಾಗಿತ್ತು. ಇದೀಗ ಕೆಎಂಎಫ್ ಹುದ್ದೆ ಭೀಮಾ ನಾಯಕ್ ಗೆ ಪಕ್ಕಾ ಆದಂತಾಗಿದೆ.
Click it and Unblock the Notifications
Sign in with Google