ರಾಜ್ಯಾದ್ಯಂತ ಇಂದಿನಿಂದ ಲೋಡ್ ಶೆಡ್ಡಿಂಗ್‌

By Ashwath

Updated: Monday, May 5, 2014, 16:14 [IST]

ಬೆಂಗಳೂರು, ಮೇ .5:ಎರಡು ವಾರದ ಹಿಂದೆಯಷ್ಟೇ ಈ ಬಾರಿ ಕರ್ನಾಟಕದಲ್ಲಿ ಲೋಡ್‌ ಶೆಡ್ಡಿಂಗ್‌ ಇಲ್ಲ ಎಂದು ಹೇಳಿದ್ದ ಇಂಧನ ಸಚಿವ ಡಿ.ಕೆ ಶಿವಕುಮಾರ್‌ ಈಗ ಉಲ್ಟಾ ಡೈಲಾಗ್‌ ಹೊಡೆದಿದ್ದು ಇಂದಿನಿಂದಲೇ ಲೋಡ್‌ ಶೆಡ್ಡಿಂಗ್‌ ಮಾಡಲಾಗುವುದು ಎಂದು ಹೇಳಿದ್ದಾರೆ.[ಲೋಡ್ ಶೆಡ್ಡಿಂಗ್ ಮಾಡೋಲ್ಲ, ಸಚಿವರ ಭರವಸೆ]

ರಾಜ್ಯದಲ್ಲಿ ಗಣನೀಯ ಪ್ರಮಾಣದಲ್ಲಿ ವಿದ್ಯುತ್ ಉತ್ಪಾದನೆ ಕುಸಿದಿರುವ ಹಿನ್ನೆಲೆಯಲ್ಲಿ ಲೋಡ್‌ ಶೆಡ್ಡಿಂಗ್‌ ಅನಿವಾರ್ಯ‌ ಎಂದು ಸಚಿವರು ಸಮರ್ಥ‌ನೆ ನೀಡಿದ್ದಾರೆ.

ಈ ಹಿಂದೆ 8522 ಮೆಗಾವ್ಯಾಟ್ ಉತ್ಪಾದನೆಯಾಗುತ್ತಿದ್ದರೆ, ಈಗ ಕೇವಲ 7527 ಮೆಗಾವ್ಯಾಟ್‌ ವಿದ್ಯುತ್‌ ಮಾತ್ರ ಉತ್ಪಾದನೆಯಾಗುತ್ತಿದೆ. ಈ ವಿದ್ಯುತ್‌‌ನಲ್ಲಿ ಕೇರಳ ಮತ್ತು ತಮಿಳುನಾಡು ರಾಜ್ಯಗಳಿಗೂ ಸುಮಾರು 650 ಮೆಗಾವಾಟ್ ವಿದ್ಯುತ್ ರವಾನೆ ಮಾಡಬೇಕಿದೆ. ಒಟ್ಟು 1165 ಮೆಗಾವ್ಯಾಟ್ ವಿದ್ಯುತ್ ಕೊರತೆ ರಾಜ್ಯದಲ್ಲಿರುವುರಿಂದ ಲೋಡ್‌ ಶೆಡ್ಡಿಂಗ್‌ ಅನಿವಾರ್ಯ‌ ಎಂದು ಸಚಿವ ಡಿ.ಕೆ. ಶಿವಕುಮಾರ್‌ ಹೇಳಿದ್ದಾರೆ.

ಎಲ್ಲೆಲ್ಲಿ ಎಷ್ಟು ಗಂಟೆ: ಅತಿ ಹೆಚ್ಚು ಬೇಡಿಕೆ ಇರುವ ಬೆಂಗಳೂರು ಉತ್ತರದಲ್ಲಿ ಪ್ರತಿದಿನ ಕನಿಷ್ಟ 1.5 ರಿಂದ 2 ಗಂಟೆಗಳವರೆಗೆ ಇತರ ಕಡೆ 2 ಗಂಟೆಗಳ ಕಾಲ ಲೋಡ್‌ ಶೆಡ್ಡಿಂಗ್‌ ಇರಲಿದೆ. ರಾಜ್ಯದ ಉಳಿದ ಕಡೆಗಳಲ್ಲಿ ಲೋಡ್‌ ಶೆಡ್ಡಿಂಗ್‌ ಪ್ರಮಾಣವನ್ನು ಆಯಾ ಸ್ಥಳೀಯ ವಿತರಣಾ ಕಂಪೆನಿಗಳು ನಿರ್ಧರಿಸಲಿವೆ.

ವಿದ್ಯುತ್‌ ಕಂಪೆನಿಗಳು ಲೋಕಸಭಾ ಚುನಾವಣೆ ನಡೆಯುವ ಮೊದಲೇ ಲೋಡ್‌ಶೆಡ್ಡಿಂಗ್ ಹೇರುವಂತೆ ಸರ್ಕಾರಕ್ಕೆ ಸಲಹೆ ನೀಡಿದ್ದವು. ಆದರೆ ಆ ಸಮಯದಲ್ಲಿ ಈ ಸಲಹೆಯನ್ನು ತಡೆ ಹಿಡಿದ ಸರ್ಕಾರ ಈಗ ಲೋಡ್‌ ಶೆಡ್ಡಿಂಗ್‌ ಹೇರಲು ಮುಂದಾಗಿದೆ.