GBA Property Auction: ಕೊನೆಗೂ ಆಸ್ತಿ ತೆರಿಗೆ ಕಟ್ಟದ 7000 ಆಸ್ತಿಗಳ ಹರಾಜು, ಮಾರಾಟವಾಗಿದ್ದೆಷ್ಟು?

Updated: Sunday, February 22, 2026, 15:23 [IST]

ಬೆಂಗಳೂರು: ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ಪಾಲಿಕೆವಾರು ಆಸ್ತಿ ತೆರಿಗೆ ಕಟ್ಟದ ಮನೆ, ವಾಣಿಜ್ಯ ಕಟ್ಟಡಗಳ ಮಾಲೀಕರ ವಿರುದ್ಧ ಕಠಿಣ ಕ್ರಮಕ್ಕೆ ಮುಂದಾಗಿದ್ದಾರೆ. ಐದೂ ಪಾಲಿಕೆ ವ್ಯಾಪ್ತಿಯಲ್ಲಿ ಸಾವಿರಾರು ಆಸ್ತಿಗಳಿಂದ ಒಟ್ಟು ನೂರಾರು ಕೋಟಿ ರೂಪಾಯಿ ತೆರಿಗೆ ಪಾವತಿಸುವುದು ಬಾಕಿ ಇದೆ. ಎಚ್ಚರಿಕೆ ಕೊಟ್ಟು ಸಾಕಾದ ಪ್ರಾಧಿಕಾರ ಇದೀಗ ತೆರಿಗೆ ಪಾವತಿಸದ ಸ್ವತ್ತುಗಳನ್ನು ಫೆಬ್ರವರಿ 21ರಂದು ಹರಾಜು ಹಾಕಿದೆ.

ಆಸ್ತಿ ತೆರಿಗೆ ಪಾವತಿಸದೇ ಬಾಕಿ ಉಳಿಸಿಕೊಂಡಿರುವ ಆಸ್ತಿಗಳ ಹರಾಜು ಮಾಡಲಾಗುತ್ತದೆ. ಅಷ್ಟರೊಳಗೆ ತೆರಿಗೆ ಕಟ್ಟಲು ಸಹ ವಕಾಶ ನೀಡಲಾಗಿದೆ. ಗ್ರೇಟರ್ ಬೆಂಗಳೂರು ಪ್ರಾಧಿಕಾರ ವ್ಯಾಪ್ತಿಯಲ್ಲಿ ಸುಮಾರು 7,000 ಆಸ್ತಿಗಳಿಂದ 430 ಕೋಟಿ ರೂಪಾಯಿಗೂ ಅಧಿಕ ಆಸ್ತಿ ತೆರಿಗೆ ಸಂಗ್ರಹವಾಗುವುದು ಬಾಕಿ ಇದೆ. ಈಗಾಗಲೇ ಹಲವು ಬಾರಿ ನೋಟಿಸ್ ಸಹ ಜಾರಿ ಮಾಡಲಾಗಿತ್ತು. ಆದರೆ ಪಾವತಿಸದವರ ವಿರುದ್ಧ ಈ ಹರಾಜು ಕಠಿಣ ಕ್ರಮಕ್ಕೆ ಕೈಗೊಳ್ಳಲಾಯಿತು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

GBA Property Auctio — AI Generated Image

ಇಷ್ಟು ಮಾತ್ರವಲ್ಲದೇ ಬಾಕಿ ಇರುವ ಆಸ್ತಿ ಮಾಲೀಕರಿಗೆ ನಿರಂತರ SMS ಸಂದೇಶ, IVRS ಕರೆಗಳ ಮೂಲಕ ಜ್ಞಾಪಿಸಲಾಗುತ್ತಿದೆ. ನಿರಂತರ ಫಾಲೋ ಅಪ್ ಮಾಡಿದರೂ ಕರೆಗಳನ್ನು ನಿರ್ಲಕ್ಷಿಸಿದ್ದಾರೆ. ಪಾವತಿ ಮೊಂಡುತನ ಪ್ರದರ್ಶಿಸಿದ್ದಾರೆ. ಬಳಿಕ ಆಸ್ತಿಗಳ ಜಪ್ತಿ ಆದೇಶಗಳನ್ನು ಹೊರಡಿಸಲಾಯಿತು. ಆದರೂ ಸ್ಪಂದಿಸದ ಮಾಲೀಕರ ಆಸ್ತಿಗಳನ್ನು ಹರಾಜಿಗೆ ಇಡಲಾಗಿದೆ.

7000 ಆಸ್ತಿಗಳ ಹರಾಜು ಇಟ್ಟ ಜಿಬಿಎ

ಈ ಹಿಂದೆ ಹೊರಡಿಸಿದ್ದ ಜಪ್ತಿ ಆದೇಶ ನಂತರ ಸುಮಾರು 60 ದಿನಗಳಿಗಿಂತ ಹೆಚ್ಚು ಅವಧಿ ಕಳೆದರೂ ಪಾವತಿ ಆಗದ ಕಾರಣ, ಕೊನೆಯ ಕ್ರಮವಾಗಿ ಹಾಗೂ ಗ್ರೇಟರ್ ಬೆಂಗಳೂರು ಆಡಳಿತ ಕಾಯ್ದೆ 2024 ಅನ್ವಯ, ಮೇಲ್ಕಂಡ 7000 ಆಸ್ತಿಗಳನ್ನು ಹರಾಜಿಗೆ ಇಟ್ಟಿದೆ. ಹರಾಜು ನಡೆಯುವ ಮೊದಲು ಬಾಕಿದಾರರು ತಮ್ಮ ಬಾಕಿ ತೆರಿಗೆಯನ್ನು ಪಾವತಿಸುವ ಅವಕಾಶ ಇದೆ. ಪಾವತಿ ಮಾಡಿದಲ್ಲಿ ಹರಾಜು ರದ್ದುಪಡಿಸಲಾಗುತ್ತದೆ.

ಹರಾಜಿನಲ್ಲಿ 07 ಮಾರಾಟ, ಪ್ರಕ್ರಿಯೆ ಮುಂದುವರಿಕೆ

ಆದರೆ ಹಲವರು ಇನ್ನೂ ತೆರಿಗೆ ಪಾವತಿಸಿಲ್ಲ. ಈ ಹಿನ್ನೆಲೆಯಲ್ಲಿ ಹೆಚ್ಚಿನ ಬಾಕಿ ಇರುವ ಪ್ರಕರಣಗಳಿಂದ ಪ್ರಾರಂಭಿಸಿ, ವಲಯಗಳ ಜಂಟಿ ಆಯುಕ್ತರು ಫೆ 21ರಂದು ಹರಾಜು ಪ್ರಕ್ರಿಯೆ ನಡೆಸಿದರು. ಈ ಹರಾಜಿನಲ್ಲಿ ಆಸ್ತಿ ತೆರಿಗೆ ಬಾಕಿ ವಸೂಲಿಗಾಗಿ ಒಟ್ಟು ಆಸ್ತಿಗಳ ಪೈಕಿ ಉತ್ತರ ನಗರ ಪಾಲಿಕೆಯಲ್ಲಿ 2 ಮತ್ತು ಪೂರ್ವ ನಗರ ಪಾಲಿಕೆಯಲ್ಲಿ 5 ಆಸ್ತಿಗಳು ಮಾರಾಟವಾಗಿವೆ.

ಹರಾಜು ಮಾರಾಟ ಪ್ರಕ್ರಿಯೆ ನಿಯಮಿತವಾಗಿ ಮುಂದುವರಿಯಲಿದೆ. ಹರಾಜು ನೋಟಿಸ್ ಪಡೆದಿರುವ ಎಲ್ಲಾ ಬಾಕಿದಾರರು ತಮ್ಮ ಬಾಕಿ ತೆರಿಗೆಯನ್ನು ತಕ್ಷಣ ಪಾವತಿಸಲು ವಿನಂತಿಸಲಾಗಿದೆ. ಒಂದು ವೇಳೆ ಈಗಲೇ ವಿಳಂಬ ಮಾಡಿದರೆ ನಿಮ್ಮ ಆಸ್ತಿಗಳು ಮಾರಾಟವಾಗಲಿವೆ ಎಂದು ಜಿಬಿಎ ಕೊನೆ ಬಾರಿಗೆ ಎಚ್ಚರಿಸಿತು.