53 ಡಿಗ್ರಿ: ಅಮೆರಿಕಕ್ಕೆ ಹೋದ್ರೆ ರೋಸ್ಟ್ ಆಗಿಬಿಡ್ತೀರಿ

ಲಾಸ್‌ ವೇಗಾಸ್, ಜುಲೈ1‌: ಅಮೆರಿಕಕ್ಕೆ ಹೋದ್ರೆ ರೋಸ್ಟ್ ಆಗಿಬಿಡ್ತೀರಿ! ಅದರಲ್ಲೂ ಹವಾನಿಯಂತ್ರಿತ ಬೆಂಗಳೂರಿನ ಮಂದಿ ಅಮೆರಿಕಕ್ಕೆ ಹೋದ್ರೆ ಅಷ್ಟೆ. ಏಕೆಂದರೆ ಅಮೆರಿಕದ ಕೆಲ ಭಾಗಗಳಲ್ಲಿ ಮತ್ತೆ ಭಯಾನಕ ಬೇಸಿಗೆ ಅಮರಿಕೊಂಡಿದೆ. ಅಮೆರಿಕದ ನೈಋತ್ಯ ಭಾಗಗಳಲ್ಲಿ (southwest) ಸುಡುಬಿಸಿಲು ಕಾಡತೊಡಗಿದೆ. ಪಶ್ಚಿಮ ರಾಜ್ಯಗಳು ಕೊತ ಕೊತನೆ ಕುದಿಯುತ್ತಿದೆ.

ಅಮೆರಿಕದ ಈ ಸುಡು ಬಿಸಿಲು ಸಾರ್ವಕಾಲಿಕ ದಾಖಲೆಯ ನಿರ್ಮಾಣದತ್ತ ಸಾಗಿದೆ. ಇದರಿಂದ ಜನಸಾಮಾನ್ಯರು ಹೈರಾಣಗೊಂಡಿದ್ದಾರೆ. ಭೂಮಿಯ ಮೇಲೆ ಗರಿಷ್ಠ ತಾಪಮಾನ ದಾಖಲಾಗುವ ಇತಿಹಾಸ ಕ್ಯಾಲಿಫೋರ್ನಿಯಾದ ಡೆತ್‌ ವ್ಯಾಲಿಯದ್ದಾಗಿದೆ.

ಇಲ್ಲಿ ಭಾನುವಾರ 128 ಡಿಗ್ರಿ ಫ್ಯಾರನ್‌ ಹೀಟ್‌ (53 ಡಿಗ್ರಿ ಸೆಲ್ಸಿಯಸ್‌) ಉಷ್ಣಾಂಶ ದಾಖಲಾಗಿದೆ. ಸದ್ಯದಲ್ಲೇ ಈ ಉಷ್ಣಾಂಶದ ಪ್ರಮಾಣ ಮತ್ತಷ್ಟು ಹೆಚ್ಚುವ ಭೀತಿಯೂ ಇದೆ.

ತಾಪಮಾನ, ಶತಮಾತನದ ಹಿಂದಿನ ದಾಖಲೆಯತ್ತ:
ಡೆತ್‌ ವ್ಯಾಲಿಯಲ್ಲಿ (ಫೀನಿಕ್ಸ್ ನಲ್ಲಿ) ಈ ಹಿಂದೆ 1913ರಲ್ಲಿ 134 ಫ್ಯಾರನ್‌ ಹೀಟ್‌ (56.66 ಡಿಗ್ರಿ ಸೆಲ್ಸಿಯಸ್‌) ಉಷ್ಣಾಂಶ ದಾಖಲಾಗಿತ್ತು. ಇದು, ಈವರೆಗೆ ಭೂಮಿಯಲ್ಲಿ ಯಾವುದೇ ಪ್ರದೇಶದಲ್ಲಿ ದಾಖಲಾದ ಗರಿಷ್ಠ ತಾಪಮಾನವೆಂದು ಹೇಳಲಾಗಿದೆ.

ಡೆತ್‌ ವ್ಯಾಲಿಯಲ್ಲಿ ಕಳೆದ ಕೆಲವು ದಿನಗಳಿಂದ ತಾಪಮಾನದಲ್ಲಿ ಉಂಟಾಗುತ್ತಿರುವ ಏರಿಕೆ ಗಮನಿಸಿದರೆ, ಈ ಬಾರಿ ಹಳೆಯ ದಾಖಲೆಗಳು ಮುರಿಯುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ (National Weather Service) ಮುನ್ನೆಚ್ಚರಿಕೆ ನೀಡಿದೆ.

ಲಾಸ್‌ ವೇಗಾಸ್‌, ಆರಿಜೋನಾ, ನೆವಾಡಾ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ತಾಪಮಾನ ಈಗಾಗಲೇ 48 ಡಿಗ್ರಿ ಸೆಲ್ಸಿಯಸ್‌ ದಾಟಿದ್ದು, ಭಾರೀ ಬಿಸಿಗಾಳಿ ಸಾಮಾನ್ಯ ಜನಜೀವನದ ಮೇಲೆ ಪ್ರತಿಕೂಲ ಪರಿಣಾಮ ಬೀರಿದೆ.

ಬಿಸಿಲಿನ ಹೊಡೆತಕ್ಕೆ ಸಿಕ್ಕಿ ನೂರಾರು ಸಂಖ್ಯೆಯಲ್ಲಿ ಜನರು ಅಸ್ವಸ್ಥಗೊಂಡಿದ್ದಾರೆ. ಲಾಸ್‌ ವೇಗಾಸ್‌ ನಲ್ಲಿ ಬಿಸಿಲ ತಾಪ ತಾಳಲಾರದೆ ಶನಿವಾರ ಒಬ್ಬರು ಮೃತಪಟ್ಟಿದ್ದಾರೆ.

English summary

The forecast for Death Valley, California, called for 128 degrees (53 degrees Celsius) on Saturday, but it was 3 degrees shy of that, according to unofficial reports from the National Weather Service. Death Valley's record high of 134 degrees (56.6 degrees celsius), set a century ago, stands as the highest temperature ever recorded on Earth. Health officials warned people to be extremely careful when venturing outdoors. The risks include not only dehydration and heat stroke but burns from the concrete and asphalt.